|
Suliniummi siunissaq ungasinnerusoq eqqarsaatigalugu anguniagaavoq avatangiisinut peqqinnissamullu naleqqunnerusumik eqqagalerisinnaalernissaq Upernaviup illoqarfiani kommunimilu nunaqarfinni qulingiluaasuni ukunani: Upernavik Kujalleq, Kangersuatsiaq, Aappilattoq, Naajaat, Innaarsuit, Tasiusaq, Nutaarmiut, Nuussuaq Kullorsuarlu. Upernaviup eqqaatalu qangatut piniartoqarfiujunnaarluni aalisartutut piniartutullu akuleriimmik inuussutissarsiornermut ikaarsaarnerani kommunalbestyrelsip kommunimut pilersaarut illoqarfimmi nunaqarfinnilu ineriartortitsinissamik pilersaarutinik nalilersuinermi tunngavittut atorsimavaa. Aalisakkeriit piorsarneqarnerat, innuttaasut amerliartupiloornerat innuttaasullu atueriaasiisa allanngoriartornerat ilutigalugit eqqakkat ajornartorsiutaagaluttuinnarput. Illuliassanik titartaasartoq Niels Bennetzen siunnersortigalugu Danmarkimilu Miljøstyrelsep aningaasaleeqataaneratigut kommunimut pilersaarutip immikkoortua taanna maanna piareersarneqarpoq. Innuttaasut ataatsimiisinneqartarsimapput, nunaqarfinni aqutsisut ataatsimeeqatigineqartarsimallutik tamanullu ammasumik oqallitsitsisoqartarsimalluni una qulequtaralugu: ”ILLOQARFIK SALIGAATSOQ – NUNAQARFIK SALIGAATSOQ – KOMMUNE SALIGAATSOQ - NUNAQARTUUVUTIT, PEQATAANIARIT”. Kommunimut pilersaarutip immikkoortua taanna Upernavimmi kommunalbestyrelsip 2004-mi upernaakkut aalajangersarsinnaassavaa. Tamatuma kingorna suliassat naammassiniarneqalissapput. Quppernerup matuma ataani pineqarsinnaavoq Kullorsuarmi nunaqarfiup aqutsisuinut allakkap ilaatigut innuttaasunut ataatsimiititsinissamik siunnersuummik imaqartup kopiia. |
