|
Inatsisit, peqqussitit nalunaarutillu sumi takuneqarsinnaappat?
Attavimmi http://www.kanukoka.gl/3019/ inatsisit avatangiisinut tunngassuteqartut qatersorsimavagut. Matuma ataani peqqussutinut nalunaarutinullu ataasiakkaat kommunimi malittarisassanut tunngavissaasut attaveqaasersugaapput.
-Avatangiisit innarlitsaaliornissat pillugu Inatsisartut peqqussutaat nr. 12, 22. decem ber 1988-imeersoq , peqquussut nr. 7, 13. maj 1993-imeersukkut, peqqussut nr. 14 31. oktober 1996-imeersukkut aamma peqqussut nr. 1, 21. maj 2004-meersukkut allanngortinneqartoq.
(nalunaarutinut sinaakkutissanik aalajangiisuusoq)
-Anartarfiit imaannik errortuivikunillu eqqaaneq pillugu Nammainersornerullutik oqartussat nalunaarutaat nr. 27, 17. september 1993-imeersoq.
“§ 13. Kommunip illoqarfiani nunaqarfiinilu katersuineq eqqaanerlu pillugit maleruaqqusat erseqqinnerusut kommunalbestyrelsip aalajangersassavai.”
- Namminersornerullutik Oqartussat nalunaarutaat nr. 28, 17. september 1993-immersoq igitassanik eqqaasarneq pillugu.
“§ 18. Kommunimi illoqarfimmi nunaqarfinnilu katersuinissamik eqqaanissamillu aaqqissuussinerit pillugit maleruaqqusani malittarisassat erseqqinnerusut kommunalbestyrelsimit aalajangersarneqassapput.”
- Namminersornerullutik Oqartussat nalunaarutaat nr. 29, 17. september 1993-imeersoq uuliakut kemikaliallu perlukui pillugit.
“§ 17. Kommunip illoqarfiani nunaqarfiinilu oliakunik akuutissianillu igitassanik tigooraasarnermi aaqqissuussinerit pilersinneqartut pillugit kommunalbestyrelsi maleruaqqusanik aalajangersaassaaq.”
Sumi isumassarsiortoqarsinnaava:
Kommunit amerlanerpaat eqqagassat pillugit malittarisassaat tassani katersorsimapput, katersukkalli naqqissugaanngimmata tamanna sianigalugu atorneqartariaqarlutik. Kiisalu eqqarsaatigisariaqartuuvoq malittarisassami sammisami immikkoortortat tamarmik nammineq kommunerisamut nuuginnarneqarsinnaassanersut - arlaqartutigut kommunit assigiinngitsut suliassat assigiinngitsumik periuseqarlutik naammassiniartarpaat, minnerunngitsumik nunap suatungaaniinneq eqqarsaatigalugu. Isumassarsiornissaq arlaatigulluunniit inerteqqutanngilaq, tamannalu kaammaattuutigineqassaq, kommunini malittarisassalioreersimanngitsuni imaluunniit inatsisinit piumasaqaataasunit malittarisassat ilaannik amigaateqartut malittarisassaliornerni malittarisassat pioreersut aallaavigisaqqullugit.
Ilisimatitsissutigineqassaaq Avatangiisinut Pinngortitamullu Pisortaqarfiup Eqqagaasat pillugit inatsisinik naliliineq allanngortiterisinnaanissarlu pillugit ingerlataq - ingerlatamik nalunaarusiaq uani aajuk - 2004-mi upernaakkut naammassimmagu.
Tamanna tunuliaqutaralugu qularnanngilluinnartumik Kalaallit Nunaanni eqqagassat pillugit inatsisit iluarsaateqqinneqassapput ilimagisinnaavarpullu nalunaarutit nutaat 2004/2005-p ingerlanerani suliarineqassasut. Tamatuma kingunerissavaa taamanikkumut kommunit tamarmik malittarisassanik nutaanik sanassasut imaluunniit pioreersut iluarsaateqqillugit, eqqartorneqartumi malittarisassanut nutaanut naleqquttunngorlugit.
Malittarisassani suut pinngitsooratik allassimassappat ?
Malittarisassat pinngitsooratik imarisassaannut piumasaqaatit:
Anartarfiit imaannik errortuivikunillu eqqaaneq pillugu Namminersornerullutik Oqartussat nalunaarutaat nr. 27, 17. september 1993-imeersoq:
Malittarisassat makku pillugit paasissutissanik imaqassapput:
1) Imermut errortuivikumut katersuivittut tankit imaasa anartarfiillu imaartakkat imaasa eqqarneqarfigisinnaasaat, tak. § 7.
2) Anartafiit imaartakkat akuerisat suussusii.
3) Kommunimi katersinermik aaqqissuussinerit. Matumani illoqarfiup/nunaqarfiup immikkoortukkuutaavini ataasiakkaani piffissat katersuiviusartut ilanngullugit.
4) Anartarfilerisut anartarfinnik imaartakkanik imaarsinissaannut imaluunniit siparnit anartarfiilluunniit puussiartaasa illup silataani inissinneqarnissaat pillugit malittarisassat.
5) Imermut errortuivikumut tankit imaarneqartarneri pillugit aaqqissuussinerit.
6) Kommunit katersuinermik aaqqissuussinerinik atuinermut akiliutit.
Igitassanik eqqaaneq pillugu Nanmminersornerullutik Oqartussat nalunaarutaat nr. 28, 17. september 1993-immersoq.
Malittarisassat makku pillugit paasissutissanik imaqassapput:
1) igitassanut § 5-imi taaneqartutut ittunut eqqaanermut aaqqissuussinerit, matumani eqqaavinni ataasiakkaani igitassat suut tiguneqarsinnaanersut, taakkulu sumi inissisimaneri pillugit paasissutissat ilanngullugit,
2) igitassanut containerit atorneqarnissaat taakkulu sumi inissisimaneri,
3) kommunimi katersuinissanik aaqqissuussinerit,
4) ataasiakkaat eqqaavinnik karsinik imaluunniit eqqaavinnik puussialertakkanik ikkuisuinissaminnut pisussaaffii pillugit,
5) suliffimmi avatangiisit aamma passussinermi ajornartorsiutit pissutigalugit igitassat eqqarneqarnerini immikkut ittumik malittarisassaasinnaasut, aamma
6) kommunit igitassanik katersisarnermi aaqqissuussinerinik igitassanillu eqqagassanik tigooraanernik atuinermi akiliutit.
Imm. 2. Maleruaqqusat nammineq piumassuseq naapertorlugu katersinernik aaqqissuinernut tunngasunik aamma imaqartinneqarsinnaapput, tak. § 10.
Uuliakut kemikaliallu perlukui pillugit Namminersornerullutik Oqartussat nalunaarutaat nr. 29, 17. september 1993-imeersoq. Malittarisassat mallu pillugit paasissutissanik imaqassapput:
1) suliffeqarfiit § 4-mi taaneqartut sumi qanorlu iliorlutik oliakunik akuutissianillu igitassanik tunniussisassasut,
2) namminersortut sumi qanorlu iliorlutik oliakunik akuutissanillu igitassanik tunniussisassasut, aamma
3) kommunit tigooraanermik aaqqissuussaannik atuinermut akiliutit.
Imm. 2. Suliffeqarfiit igitassaataat pillugit maleruaqqusat malittarisassanik makkuninnga imaqassapput:
1) § 4 malillugu oliakunik akuutissanillu igitassanik nalunaaruteqartarneq,
2) oliakunik akuutissanillu igitassat tunniunneqarnerinut atatillugu paasissutissiisussaatitaaneq, tak. § 11,
3) suliffeqarfinni ataasiakkaani igitassat eqiteruttuulernissaat pinngitsoorsimatinniarlugu piffissani aalajangersimasuni pinngitsoorani tunniussisarnissami piffissarititaasut, tak. § 15, imm.2 kiisalu
4) piffissat tigooraasarfiillu pinngitsoorani tunniussivissat, tigooraanermik aaqqissuussinermi passusinissamut periarfissanik ukiuuneranilu immikkut ajornartorsiutaasinnaasunik sillimmaassisut.
Aammalu makku pillugit allassimasoqartariaqarluni:
Inatsimmik tunngavigisaq:
Malittarisassq una suliarineqarpoq una tunngavigalugu:
- .....pillugit Namminersornerullutik Oqartussat nalunaarutaat nr. X, 17. september 1993-imeersoq
- -Avatangiisit innarlitsaaliornissat pillugu Inatsisartut peqqussutaat nr. 12, 22. decem ber 1988-imeersoq, peqquussut nr. 7, 13. maj 1993-imeersukkut, peqqussut nr. 14 31. oktober 1996-imeersukkut aamma peqqussut nr. 1, 21. maj 2004-meersukkut allanngortinneqartoq
Malittarisassaq sumi atuuttuuva?
Malittarisassaq kikkunnut atuuttuuva?
Malittarisassami suna pineqarpa?
Suut malittarisassami aamma allassimassappat/-sariaqarpat?
Malittarisassami makku eqqaaneqartariaqarput:
Kommunimi aaqqissuussinermut atuilernermi atuiunnaarnermilu nalunaarnissamut pisussaaffeqarneq.
Malittarisassamik unioqqutitsineq qanoq kinguneqartinneqassava.
Naammagittaalliornissamut periarfissaq
Malittarisassami aamma allassimassaaq malittarisassaq qanga atuutilersoq.
Malittarisassami suut allanneqarsinnaappat/piumasaqaataasinnaappat: (Kommunini malittarisassanik misissuineq tunuliaqutaralugu suliat)
Suliffeqarfinnut aalajangersimasumik akiliuteqartitsineq?
eqqartorneqartumi inatsiseqartitsineq malillugu inuussutissarsiutinut annerpaanut eqqaavimmik atuinermut aalajersimasumik ukiumortumik akiligassiisoqarsinnaanngilaq. Akiliut suliffeqarfiiit ataasiakkaat eqqagassanik qanoq annertutigisumik tunniussisarnerannik immikkut nalilliinermik tunngaveqatumik annertussuseqartinneqassaaq.
Innuttaasut assigiinngitsut akornanni immikkoortitsineq?
- Innuttaasut assigiinngitsut akornanni immikkoortitsineqarsinnaanngilaq. Taamaattumik allanneqarsinnaanngilaq pisortanit pigisaanni attartukkani najugaqartut eqqaanermut akiliutit illumut akiliutitigut akilissagaat, inuit namminneq illuminni najugaqartut akliisinniarnerannut allaffissornikkut sjornakusoorutaanerusut ulluunerani eqqagassanik eqqaanermut akiliissanngitsut. Imaassammat tamarmik akiliuteqassasut imaluunniit akiliisoqassanngitsoq. Akerlianilli kommunip iluani akiliut assigiinngissitaartinneqarsinnavoq, tassa imaappoq illoqarfimmi nunaqarfinnilu aammalu nunaqarfiit akornanni, Assigiinngissuteqarneq tunngaveqartariaqarluni sumiiffinni assigiinngitsuni sullissinerit assigiinnginnerinik eqqagassanillu suliaqarnerup annertussusiata aammalu tamatumunnga atatillugu immikkut aningaasartuutaasut assigiinnginnerinik.
Oliakut kemikaliallu perlukuinik igitassatut oqarnermi suut pineqarnerannik nutaamik nassuiaanerit?
- Kommunalbestyrelsip oliakunik kemikaliallu sinnikuinik oqarnermi suut pineqarnerat nassuiaasiorsinnaanngilaa, (takukkit Oliakut kemikaliallu perlukuinik nalunaarummut ilanngussat) Avatangiisinut Pinngortitamullu Pisortaqarfiup kisimi tamanna suliassaraa. Avatangiissinut Pinngortitamullu pisortaqarfiup aalajangissavaa nalunaarummut nr. 29-mut ilanngussami suut ilanngutissallugit tunngavissaqarnersoq.
Akisussaassutsimik tunniussineq?
Kommunalbestyrelsip malittarisassami pingaaruteqannginnerusunik allannguinissamut akisussaassuseq Teknikkimut Avatangiisinullu Ataatsimiititaliamut tunniussinnaanngilaa. Eqqagassat pillugit malittarisassaq, inatsisitigut pisussaaffiliisoq - pillaanermi iliuusissanik aalajangiinerit ilanngullugit - ataannartumik ataatsimiititaliamit allanngortinneqarsinnaanngilaq. Taamatut aalajangiinerit kommunalbetyrrelsip kisimi aalajangiivigisinnaavai.
- Kommunalbestyrelsip Teknikkimut Avatangiisinullu Ingerlatsivik sunulluunniit tunngasunik malittarisassaq tunngavigalugu aalajangigassanik aalajngiisinnaanermut pisinnaatissinnaanngilaa. Pingaartumik akiliutit annertussusilerneqarnerannik naliliineq Kommunalbestyrelsip kisimi aallangiiffigisinnaasaa eqqarsaatigalugu tamanna atuuppoq.
Eqqagassanik immikkoortiterineq?
- Maannakkut eqqagassat ikuallassinnaasunut ikuallassinnaanngitsunullu immikkoortiternissaanik taamatullu eqqagassat pinngorfiini immikkoortiterinissamik piumasaqaateqarnissaq ajornarpoq. Qularnanngilluinnartumik eqqaggassat
pillugit inatsisit aaqqissuusseqqinnissap pisussap kingornatigut tamanna ajornarunnaassaaq.
Malittarisassaliornermi eqqarsaatersuutit suut pisariaqarpat?
- Malittarisassami innuttaasut pisussaaffii pisinnaatitaaffiilu aalajangersaavigineqarput. Taamaattumik malittarisassaliornermi innuttaasoq/suliffeqarfik aallaavigalugu eqqarsarnissaq pingaaruteqarpoq, taassuma malittarisassaq paasisinnaasariaqarlugulu iliuutsiminut aallaavigisussaammagu.
a)Taamaattumik naammagittaalliorsinnaanermut periarfissaq erseqqissumik nassuiarsiuk (innuttaasup pisinnaatitaaffii naammagittaalliuutaasinnaasullu sumut nassiunneqassasut, innuttaasup tamatuminnga ilisimasaqareernissaa ilimagineqarsinnaanngimmat).
b)Taamatullu aamma erseqqissumik allassimasariaqarpoq suliffeqarfiit kommunip avatangiisinut ulorianaatilinnik eqqaanermut aaqqissuussineranit immikkut akuerineqarnissamik sumut qinnuteqarsinnaanersut (qinnuteqaat sumut nassiiunneqassanersoq taamatullu qinnuteqaammik naliliinermi suut tunngavissanut ilaatinneqartarnersut).
c)Kiisalu aamma eqqaanermut akiliutip annertussusia pillugu annertunerusumik paasissutissanik sumi pissarsineqarsinnaaneranik innuttaasut paasitinneqarnissaat qulakkeerneqartariaqarluni (assersuutigalugu Teknikkimut Ingerlatsivimmut saaffiginninnikkut, tamanut takussaasumik allagartaliinikkut, akit nutaat aallangerneqarneranni kommunip nittartagaani).
d)Aallaavigisat malittarisassami tamarmi assigiittariaqarput (kikkunnut atuutsinneqarnera, eqqagassatut suut isigineqarnersut il.il.).
e)Nalorninaatsitsineq. Oqaasertalersuinerup nalorniaatsuunissaa pingaaruteqartorujussuuvoq. Taamaammat pingaaruteqanngitsuunngilaq malittarisassami eqqaavinnut puut qassiunissaannut immikkoortumi qanoq allassimasoqarnera “inissiat tamarmik eqqaavimmut nivinngaaveqassapput” imaluunniit “inoqutigiikkuutaartumik eqqaavimmut nivinngaavik ataaseq”. Siullermi “inissiat”-mik oqarnermi illuinnarnmt ilaqutariinnik taamaallaat najorneqartumut malittarisaassiineqanngilaq. Taamaammat naleqqunneruvoq oqaaseq inoqutigiit atoraanni. Taamatuttaaq aamma pingaartuuvoq malittarisassaq kikkunnut atuunnersoq oqaatiginissaani eqqarsarluarnissaq oqaatigisallu malittarisassami tamarmi atornissaa (nalunaarut immiikkoortunut assigiinngitsunut assersuutigalugu suliffeqarfinnut immikkoortunik malittarisassaqartitsinngipopat)
f) Eqqarsaatigisiuk ataatsimmoortumik malittarisassasiornissaq naleqquttuunersoq, imaluunniit innuttaasunut ajornaannerussanersoq immikkoortitikkanik malittarisassaliorneqarpat makkununnga
1) anartarfiit imaannik eqqaaneq (anartarfiit imaannik errortuivikunillu eqqaaneq),
2) Ulluunerani eqqaaneq - igitassanik eqqaasarneq aamma
3) uuliakut kemikaliallu perlukui igitassat.
g) Eqqarsaatigisiuk ullumikkut kommuni malittarisassaa ullumikkut pissutsinut naleqquttuunersoq (malittarisassat eqqagassat eqqarsaatigalugit kommunimi pissutsinut naleqqussarneqassapput, assersuutigalugu kommuni malittarisassat pilersinneqarnerisa kingorna katersuivimmik ikuallaavimmillu peqalersimappat. Kiisalu aamma eqqarsaatigisariaqarluni malittarisassami allassimappat naleqquttuunersoq oliakunik kemikalianillu perlukut eqqaavimmi sulisunut tunniunneqassasut, eqqaavik inoqartinneqanngippat.)
Eqqaamasiuk:
- akiliummik akiliisitsineqarsinnaavoq aatsaat kommuni malittarisassaliorsimappat kommunip katersuinernut aaqqissuussinerinik atuinermut akinik aalajangersaasumik. Malittarisassaqanngippat tamatuminnga oqaatiginnittumik, kommuni akiliutinik akiliisitsiniarsinnaanngilaq.
- Avatangiisinut Pinngortitamullu Pisortaqarfik malittarisassat allanngortinneqarneri tamaasa ilisimatinneqartussaavoq.
(Matuma qulaani allakkamik allattuuvoq Fuldmægtig Laura Henriksen, Avatangiisinut Pinngortitamullu Pisortaqarfik)
| 
