Saviminikunut saffiugassanullu eqqaavinnik saliineq

Suliariniakkamut tunuliaqutaasoq:
- Saviminernut saffiugaasanullu allanut Nunarsuarmi akigitinneqartut aatsaat taamak pitsaatigipput
- Misissueqqaarnissami missorneqassapput saviminikkut saffiugassallu allat akinik naammaginartunik akilersillugit – ilami immaqa kommuninut aningaasartuutaanngitsumik Kalaallit Nunaannit piiarlugit atoqqitassatut/aatseqqitassatut tuniniarneqarsinaaneri.

Misissueqqaarnissamik pilersaarummi susoqarpiassava?

Carl Bro-p eqqakkanut suujunnaarsitassanullu immikkut ilisimasalittaasa kommunit tamangajaasa tikeraassavaat, paasiniarlugu saviminikut saffiugassallu allat eqqakkat qanoq annertutiginersut, qanorlu pitsaassuseqarnersut. Tamanna pissaaq aggustip naanerani/ septemparip aallartinnerani. Nalunaarusiussapput igitassanut tuniniaasartunut suliarinnittussarsiuussinermi atorneqarsinnaasumik. Suliarinnikkusuttut Kalaallit Nunaat saviminikunik saffiugasanillu allanik igitassaarullugu sulissapput.

Kikkut tikeraarneqassappat?

Kommunit tamarmik – taamaallaat Qaanaaq, Uummannaq aamma Ivittuut ilanngunneqassanngillat, taakkunaniit assartuinissaq akisuallaassaqimmat. Tikeraarneqartut eqqakkanik taaneqartunik eqqagaatiminnut allattuiffissanik immersugassanik immersuinissaminnut nalilersuinissminnullu ilitsersorneqassapput. Immersugaat suliarinnittussarsiuussinermi tunngavissatut ilanngunneqassapput.

Siunertaq:
- Saviminernut eqqaaviit kusanaaqisut imaarneqassapput
- Saviminikut tamarmik katersorneqassapput
- Tamaasa .- amma saviminikut naleqanngikkaluartut ilanngulugit nalunaarsorneqassapput, igitassanik tuniniaasartut tikitsinnagit piiaalersinnagillu
- Eqqakkavut nalillit atoqqinneqarsinnaasullu tappiffigilerniassagatsigit
- Saleeqqulluta siunissaq eqqarsaatigalugu periusissatsinnik nassaaqqulluta.

Saliisoqareerpat susoqassava?
Eqqaavilerisut eqqakkanik siunissami naliliisinnaalissapput suut akilersilluarlugit suullu akikinnerusunngorlugit tuniniarsinnaaneri immikkortissinnaanerilu ilikkarlugit. Tamanna eqqakkanut allanut aamma tuniluussinnaavoq, Nunatta eqqiluinnerulernissaa anguneqarsinnaalluni eqqaanermullu aningaasartuutikillisaataasinnaalluni. Eqqaavinni immikkoortiterinermik pikkorissartitsisarnitsinni Mokana ilinniartitsisassaaq. Sulisussarsiuussinissatsinni najukkani assigiinngitsuni sulisut ilinniartinneqarnissaat piumasarissavarput.

Kalaallit Nunaat tamarmi saviminikuerutissava?
Taamaassagunanngilaq sumiiffiimi ilaat umiarsuarnik eqqakkanik katersisussanik tikikkuminaannertik pissutigalugu katersiffigssallugit imminut akilersinnaassanngilaq. Pisinnaasarpulli tamaat eqqagaajaaniarpugut. Sumiifiit ilaanni saviminikut nunamut matoorunneqartarput, assaqqinnissaallu imminut akilersinnaanngilaq. Saviminernut eqqaaviit ulikkaarniinnannginiissat kommuninut innersuusutigaarput.

Saviminikut saffiugassallu allat avatangiisinik mingutsitsisuuppat?
Naamik. Saviminikut saffiugassallu allat ataatsimut eqqarneqarsimagunik eqqakkanillu allanik akulersorneqanngikkunik ulorianartuunngillat – kusanaaqaalli akigissaartillugillu tunisinnaavagut.

Kina akiliissava?

Misissueqqissaarnermut missingersuut: 454.000 kr.

- Kommunit tamarmik 10.000 kr.-nik akiliissapput. Nuuk aamma Sisimiut 20.000 kr.
- Avatangiisit pillugit Qullersaqarfik 300.000 kr.nik tapiissuteqassaaq.