Teknikikkut ataatsimiititaliamut paasissutissiineq

Nuuk, 10.08.2006

Tusagassiorfinnut nalunaarut  16. aggusti 2006-meersoq - una tooruk

Kommunit ataatsimoorullugu saviminikunik saffiugassakunillu saliinissamut misissueq-qaarnissaq pillugu

Kommunit saviminikunik saffiugassakunillu ataatsimoorullugu saliinissaannut eqqaanissaannullu misissueqqaarnissap ingerlannissaa pillugu Carl Bro A/S KANUKOKA’p isumaqatigiissuteqarfigisimalermagu nuannaarlunga kommunimi teknikkikkut ataatsimiititaliaq ilisimatissinnaalerpara. Kusanartutut nalilerpara iliuuseqaqatigiinniarnermut kommunit tamangajavimmik aningasaleeqataarusussimammata. Aamma Avatangiisinut Pinngortitamullu Pisortaqarfik suliap ingerlanneqarsinnaanissaa anguniarlugu aningaasaliissutissanik tunisiniarmat tamatta qujassutigaarput.

Taama misissueqqaarnikkut kommunini saviminikut saffiugassakullu eqitiinakkat annertussusi nalunaarsorneqarlutillu akissaat aalajangersarneqassaq aammalu suliarinnittussarsiuussinissamut atortussat saviminikunik nioqquteqartartunut nassiussugassat ilusilernissaannut tunngavissaliissalluni. Tamatuma kingorna suliarinnikkumallutik neqeroorutaajumaartut takutikkumaarpaat Kalaallit Nunaanni tamarmi naammaginartumik akilimmik kommunit peqatigiissillugit saviminikunik saliinissaq ingerlanneqarsinnaassanersoq.

Carl Bro isumaqarpoq saliinissaq akikitsuararsuarmik ingerlanneqarsinnaassasoq, ilami allaat Kalaallit Nunaanni kommuninut aningaasartuutitaqanngissinnaalluni saviminikut akornanni saffiugassat naleqarnerusut annertussappata, aamma kommunit akornanni naligiissaarisoqassappat.

Taama naliliinermut tunngavivoq savimernit saffiugassallu allat aatsaat taama akisutiginerat, tamannalu Kalaallit Nunaanni illoqarfinni saviminikut saffiugassallu katersuinnakkat biilikullu ataatsimoorullugit piiarneqarnissaanni aningaasartuutissat ikilisarnissaannut iluaqutigineqarsinnaasoq.
Taamaalinerani teknikikkut ingerlatsisoqarfiit arlallit 2006-imi upernaakkut saviminikunik nioqquteqartartunit saviminikunik saffiugassakunillu – taamaattorli saffiugassanik qaffasissumik nalilinniinnaq – pisiumasunit attavigineqartarsimapput. Taamali aaqqiinissaq pitsaasuunngilaq, tassami kommunit suliassaasa ilagimmassuk illoqarfinni nunaqarfinnilu eqagassanik tamanik passussineq. Taamaammat nunani allani saviminikunik nioqquteqartartut eqqaavissuarni naleqarnerusunik piiaallutik imminut akilersinnaannginnerusunik, soorlu biilikunik, ilaginnaanissaat uagut soqutigisarisinnaanngilarput.

Allakkatigut ukunatigut kommunini teknikikkut ataatsimiititaliat ingerlatsiviillu misissueqaarnissap sapinngisamik pitsaanerpaamik ingerlanissaanut suleqataaqqullugit kajumissaarusuppakka, tassa imaaliorlutik:

1) savimikunik eqqaavissuit ujaraaqqanik, aamakunik allanillu matoortikkunnaarlugit
2) biilikut, elektronikikut, errorsiviit, sanaartornermi maskiinarsuit saffiugassakullu allat arlaannut tikilertorneqarsinnaasumut katersorlugit
3) suliffiit innuttasullu Carl Bro’p siunnersortaasa tikinnissaat sap. akunnerinik arlalinnik sioqqullugu eqqakkanik ikumasinnaanngitsunik akeqanngitsumik tunniussisinnaatillugit
4) savimikunik nioqquteqartartut saviminikunik saffiugassatut angisuumik nalilinnik pisiniarlutik saaffiginnittut itigartittarlugit
5) inummik attaveqaataasussamik, siunnersortit ”sunik tamanik” takusaqarnissaannik aaqqissuussisussamik toqqaallutik
6) inatsisinik eqqortitsininngortitsiartuaarnissaq aallartillugu, tassa imaappoq saviminikut saffiugassakullu kikkunnit pigineqarneri nalunaarsorlugit atorunnaarsiterlugillu.

Misissueqqaarnissap immaqalu saliinissap ingerlaneranni ajornartorsiutip tamatuma siunissami ataavartumik aaqqiiffiginissaanut KANUKOKA suleqataassaaq, taamaalilluta saviminikut saffiugassakullu katersuinnarneqarlutik illoqarfinni nunaqarfinnilu kusanaallisaataanissaat pitsaaliorsinnaassagatsigu, taarsiullugulu saviminikut saffiugassakullu atoqqinneqartarnissaannut periarfissanik imminut akilersinnaasunik nuna tamakkerlugu atuuttussamik pilersitsisinaassalluta.

Suliassamik suliarinnittussarsiornermi piumasariniarparput sumiiffinni atortuutigineqartut sulisussallu atorneqassasut, kiisalu sumiiffimmi sulisussat saffiugassat aggortarnissaannut aamma immikkoortitertarnissaannut/suliareqqittarnissaannut ilinniartinneqassasut. Tamatuma saniatigut kommunini eqqaasut tigooraavinni Mokanap pikkorissartitsisarnerini ilinniartinneqarnerat aallartereerpoq, tamatumani saffiugassanik suussusiliisarneq aamma elektronikinik passussineq i-lanngunneqarlutik.

Pilersinniakkap ingerlanissaata pingaarnerusutigut piffissalersornera:

Misissueqqaarneq: 2006-imi aasami kingusissukkut
Misissueqqaarnerup naliliiffigineqarnera 2006-imi ukiakkut
Kommunit isumaqatigiissuteqarfiginissaat naammassisimassallutik kingusinnerpaamik 2006-ip naanerani,
Saviminikunik nioqquteqartartumik isumaqatigiissuteqarneq kingusinnerpaamik jan/feb 2007,
Saliinissap ingerlanneqarnissaa 2007-imi aasakkut.

Pilersinniakkamut tamatumunnga tunngasumik atortussatut paasissutissat ingerlaavartumik teknikikkut ingerlatsisoqarfimmi sulisunik aqutsisuusumut ingerlaavartumik nassiuttassavavut.