Danmarkimi avatangiisinik misissuisoqarfiup, Danmarks MiljøUndersøgelser, uiluiit Nuup sioraani inuussutissarsiutigalugu aalisarfinni qallukkat misissorsimavai. Misissuinertigut paasisat takutippaat Kalaallit Nunaanni uiluiit cadmium’imik EU’p killissaliussaata pingasoriaataanik annertussusilimmik akoqartut. Cadmium’illi 90 %-ia uiluiit tartuiniippoq. Uiluiit tartuerneqarpata aarlerinani nerineqarsinnaapput. Cadmium annertuallaaq eqiterussimasoq saarngit siggilalernerannik, naartut ajoqusernerannik kræft-eqalersinnaanerullu aarlerinarnerulerneranik nassataqarsinnaavoq.
