|
Maarmorilimmi aatsitassarsiorfiup 1990-imi matunerata kingorna tamaani avatangiisit misissorneqartuarput imaata, naasuisa tamaanilu uumasut aqerlumik zinkimillu akoqassusiat uuttortarneqartarluni. Danmarkimi avatangiisinik misissuisoqarfiup nalunaarusiaani nutaami 1999-imi 2000-imilu misissuinerit inerneri nassuiaatigineqarput. Nalunaarusiaq qulequtaqarpoq ”Miljøundersøgelser ved Maarmorilik 1999-2000” (taanna tooruk), kalaallisullu eqikkaanertaqarpoq. Pujoralak, imaq, qeqqussat, uillut, aalisakkat raajallu tigulaariffigalugit misissorneqarsimapput. Paasinarsivorlu suli aqerlumik zinkimillu mingutsitsineqartoq, taamaattorli avatangiisit mingutsitsinermit sunnigaanerat ukiut ingerlaneranni milliartuinnarsimavoq. Qanoq mingutsitsisoqartiginera uuttorluarumallugu uillut mingoqanngitsut Maarmorilimmut nuunneqarsimapput ukiullu ataatsip qaangiunneratigut aqerlumik zinkimillu qanoq akoqalersimatiginerat misissorneqarluni. Taamaalilluni paasineqarpoq aatsitassarsiorfik matoreeraluartoq suli mingutsitsineqartoq, taamanerniilli mingutsitsineq minnerulersimaqisoq. Kisiannili Affarlikassaa, Qaamarujuk Perlerfiullu kangerlua suli ima aqerlussaqartigipput uillut taakkunanngaanneersut katersorneqarnissaat nerineqarnissaallu nangaasaarutigineqarluni. Aalisakkat raajallu aqerlussamik akoqarnerat ingasagisassaanngitsutut nalilerneqarpoq, taamaattumillu nerissallugit navianarsorineqaratik. Nalunaarusiortuupput Per Møller, Gert Asmund, Poul Johansen aamma Frank F. Riget, tamarmik issittuni avatangiisit pillugit immikkoortortaqarfimmi sulisut. |
