Naartut sitsiaallisaatinit sunnigaasarput

Allaatigisaq atuagassiami Miljøstyrelsens Nyhedsbrev nr. 14, oktobari 2004-meersumiippoq

Kamippassuit ukiorsiutit qaatigoorsuillu apummut masannartuliornermullu akiuussinnaanngorlugit sitsiaallisarneqartussanngoraangata (imprægnererneqartussanngoraangata) qillertuusaq sitsiaallisaammik imalik tissalukaartittagaq saqqummerneqartarpoq. Miljøstyrelsen-illi nutaamik misissuineratigut paasineqarpoq sitsiaallisaatit ilaat arrorsaatinik uumassusilinneersunik naartunik ajoqusiisinnaasunik akoqartut. Tassalu aamma silamiluunniit tissalukaartinneqaraluarunik ajoqusiisinnaasunik.

- Sitsiaallisaatit ilaat arrorsaatinik uumassusilinneersunik 90 % tikillugu akoqarput, tamannalumi kakkaginaqaaq. Taamaattut peqqinnissamut navianaateqarput, taamaattumillu inassutigissavarput naartugaanni sitsiaallisaatit attornaveersaaqqissaarneqassasut, aammalu meeqqat tamakku pallinnaveersaaqqissaassagaat, Frank Jensen, Miljøstyrelsen Kemikalier-imeersoq oqarpoq.

Arrorsaatit uumassusilinneersut tassaapput imerpalasut uuliamik, orsumik allarpassuarnilu imermi arrorsinnaanngitsunik arrortitsisartut. Arrorsaatit amerlanersaat aalangujasuupput taamalu niaqorlunnermik, aassinganermik, misikkarissinermik anersaartorniarnerullu ilungersornarsineranik ajornartorsiortitsilersinnaallutik. Arrorsaatit sitsiaallisaatini nassaarineqartut ilaatigut tassaapput 1-butanol, 2-butanon-oxim, butylacetat, propan-2-ol aamma heptan.

Sitsiaallisaalersinnak innersuussutit atuaqqaakkit
Naartunngikkaanni qaatigooq ukiorsiut imaluunniit kamippassuit sitsiaallisarneqarsinnaapput. Sitsiaallisaatit tissalukaartittakkat atorniaraanni illup iluani taamaaliornaveersaartariaqarpoq. Aamma ajunnginnerpaavoq aaqqaserluni taamaalioraanni, sananeqaatit ulorianartut amermut attuutinnginniassammata. Periarfissaq alla tassaavoq sitsiaallisaatit maskinami errorsivimmi atugassiat imaluunniit imerpalasunngortitat.

Sitsiaallisaatit sunik akoqarnerisa nalunaarsorneqarnerat nioqqutissiani tamanit atugaasuni akuusiunneqartut annertuumik misissorneqarnerannut atasumik ingerlanneqarpoq. Tamatumani paasisat ingerlaavartumik MiljøNyt.dk aqqutigalugu nalunaarutigineqartassapput.

Attavigineqarsinnaasut tamakkununnga tunngasut

www.mst.dk –mi ”kemi i forbrugerprodukter” attavigineqarsinnaavoq

Nalunaarusiaq www.mst.dk -mi atuaruk

Innersuussutit www.mst.dk –mi atuakkit