Oqarasuaat angallattagaq mikisuaranngorlugu isatigaq
Ukiorpassuunngitsut matuma siorna oqarasuaatit angallattakkat qarmasissiatut angitigaat, peqarnissaminnullu akissallit ikittuinnaapput. Ullumikkut amerlanerit mikisunnguamik qalipaatigissaaqaluni pilerinavissumik peqarput – mikinerulluni torranneruguni tassa aatsaat. Kisianni oqarasuaatit angallattagaq isigigaangakku – aammalumi ullormut amerlasoorpassuariarlutit taamaaliortanngitsoornavianngilatit – taava eqqarsaatigisarnerpiuk immikkoortunit assigiinngitsunit qassinit katitigaanersoq:
· Ledning ikkuffittalik
· Sarfalersuut
· Igalaasaq takutitsisarfik elektronisk-iusoq
· Printkort
· Plastic-ertaa ikuallajaallisagaq
· Puua
· Toortartagartai
· Mikrofon
· Højttaler
· Batteri
Immikkoortuararpassuit tamakku tamarmik immikkut atortussianit aammalu kemi-kkut sananeqaatinit assigiinngitsunit katitigaapput. Oqarasuaatit angallattagaq isatersinnaagaluarukku - pisaarigakku puua ilanngullugu - amiakkuisa makku missiliussagaluarpaat: sisak 26%, pappiara qeratasooq 20%, nikkel 19%, polycarbonatplast 12%, cadmium 9%, nysølv 5%, glasfiber 2,6%, kanngussa 1,4%, pappiara 1,4%, epoxyresin 1,3%, aluminium 1,2% kiisalu PVC 0,4%. Tamakku saniatigut allanik annikinerusunik akoqarpoq.
Aqerloq, batteriit aamma innikillisaatit bromertallit
Nioqqutissiat innaallagiartortut imaluunniit elektroniskiusut tamakkulu puui tamangajammik tamakkuninnga akoqarput. Nioqqutissiat ilaat aamma tamakku saniatigut aqerlumik, kviksølv-imik, hexavalente kromforbindelse-nik aamma lithiumforbindelse-nik annertunngikkaluanik akoqarsinnaasarput.
Oqarasuaatip angallattakkap elektronikkertamigut innaallannikkut ikuallassinnaanera pinngitsoortinniarlugu oqarasuaatip qaava, toortartagartai, ledning-ii printplade-ilu innikillisaatinik bromertalinnik akuneqarsimasarput. Tamakkuninnga nioqqutissiortut ilaasa ikuallajaallisaatit allat, ilinnut avatangiisinullu pitsaanerusut, atortarpaat.
Oqarasuaativit angallattakkap batteriia imaarukkaangat ilisarnavissumik uinngiarsuusartarnera qularnanngitsumik oqaluussaqarlualeruttorlugit qinngarisarsimassavat. Tassami oqarasuaativit angallattakkap batteriivi nikkel-cadmium-batteriiusimagunik immikkut ajornartorsiutitaqartut puigussanngilavut. Cadmium aatsitassaavoq oqimaatsoq avatangiisitsinni uumasunilu nerisariiaattuni eqiterutiinnartartoq. Taamaattumik batteriivit atorunnaartup tamakkununnga tunniussivissamut tunniunnissaa pingaartuuvoq.
Oqarasuaatini angallattakkani nutaaliaasuni taarsiullugit lithium-batteriit atorneqartarput. Taamaattut nikkel-cadmium-batteriinit minnerugaluaqisut aammalu taakkunatulli avatangiisitsinnut navianartiginngikkaluartut aamma tamakkuninnga katersuiffinnut tunniuttassavatit.
Nukimmik atuisorujussuit
Oqarasuaatit angallattagaq nioqqutissiarineqarnermini nukimmik atuiffiungaatsiartarpoq. Kisianni atorneqartilluni nukimmik atuinerpaasarpoq. Tamatumani ajornartorsiutissat allat aamma nillikartarput, soorlu qinngorneqarnera nukinnillu aalajangersunik ilungersortitsineq. Eqqarsaatigiinnarummi ullut tamaasa SMS-erlutit nalunaartarnitit qanoq amerlatigisut.
Kisianni tassa oqarasuaatit angallatagaq atorunnaarlugu igikkaangakku avatangiisinut ajoqutaanerpaasarpoq. Taamaattumik oqarasuaatit angallattagaq naggataamik SMS-erutigereerukku qanoq iliorlutit igitassanngortissinnaanerit nammineq paasiniartariaqarpat. Tassami illoqarfimmi najukkanni sumi taamaaliortoqarsinnaanersoq paasiniarsinnaavat: Niuertarfissuarmi, nakorsaataarniami, oqarasuaammik pisiffigisimasanni allamiluunniit. Aamma avatangiisinut tunngasunut oqartussaasut imaluunniit kommunersi sianerfigalugit aperisinnaavatit.
Milliartorlutik pitsanngoriartorput
Oqarasuaatinilli angallattakkanik sanaartortartut oqarasuaatit tamakku avatangiisinut ajoqusiisinnaanerat milliartortittuarpat. Atortussianik pitsaanerusunik ulorianaateqannginnerusunillu nassaartuarput. Aamma oqarasuaatit angallattakkat milliartuinnarput. Tassalu tamakku siunissami iluarsaruminarneruleriartussappata aamma ajornannginnerusumik pisinnaasaqarnerulersillugit nutarterneqartarsinnaalissappata taava oqarasuaatit angallattagaq taarsikulaartariaqarutissavat.
Paasissutissanik pissarsivik: http://www.chemicaldays.dk – Miljøstyrelsen
Nittartagaq ”Chemical Days” atuartitsinermi atortussanik akeqanngitsunik Miljøstyrelsemit suliaritinneqarsimasunik imaqarpoq. Atuartitsinermi atortussat atuarfimmi klassinut annernut tunngatitaapput kemiimik atuartitsissutaallutik, kisiannili aamma tamalaanik atuartitsinermi atorneqarsinnaallutik. Oqaatsinik ilinniartitsinermut aamma piukkunnaateqarluarput – oqaatsinut 19-inut nutserneqarsimagamik!
