|
2004-mi Folketingip aningaasanut inatsisissaani Issittumi avatangiisit pillugit suliniutinut tapiissutissat immikkoortinneqarsimapput (§ 23.26.13). Aningaasanillu taakkuninnga qinnuteqarumaarsinnaasut pilersaarusiornissaminnut piffissaqarniassammata maanna kajumissaarutigineqareerpoq qinnuteqartoqaqqullugu. Kajumissaarummi matumani pineqarput suliniutissat 10 mill. kr-it tikillugit aningaasaliiffigineqartussat. Danmarkimi suliffeqarfiit inuilluunniit ataasiakkaat issittuni avatangiisit pillugit paasissutissarsiortut kisimik qinnuteqarsinnaapput. Suliniutit Kalaallit Nunaanni avatangiisit pinngortitallu illersorneqarnissaannut tunngatillugu ilisimasanik nalunaarsuinissamut saqqummiussuinissamullu tunngassuteqartut salliutinneqassapput. Issittumi avatangiisit pillugit suliniutinut tapiissutit Miljøstyrelsep Avatangiisinut ministeqarfiup ataaniittup ingerlatarai. Aaqqissuussinermi tamatumani tapiiffigineqarsinnaapput Issittumi suliniutit tamalaat, pingaartumik Kalaallit Nunaanni ingerlanneqartut. Aamma Ruslandip issittortaani suliniutit kiisalu Savalimmiuni suliniutit issittunut attuumassuteqartut tapiiffigineqarsinnaapput. Tapiissuteqartarnermik aaqqissuussinermi tassani siunertaavoq avatangiisini piujuartitsinissaq tunngavigalugu pinngortitami pisuussutinik atuisoqarnissaa, pinngortitap allanngutsaaliorneqarnissaa aammalu issittumi avatangiisit mingutsitaanerata nakkutiginissaa, pinaveersaartinneqarnissaa killilerneqarnissaalu. Suliniutit qanoq ittuusariaqarnerannik pingaarnersiuilluni nassuiaatit nittartakkap qallunaatuuaniipput. Qinnuteqaatit Miljøstyrelsemit tiguneqareersimassapput kingusinnerpaamik 19. januaari 2004 nal. 12.00 . Qinnuteqaatit akineqarsinnaassapput 2004-mi marsimi/apriilimi. Qinnuteqarnermi immersugassaq uaniippoq: http://www.mst.dk/inter/01050000.htm |
