|
Avatangiisit mianerinerulernissaannut iliuusissat ilarpassui aallartinneqalersut aningaasartuuteqarnerulernermik kinguneqarnavianngitsut imaluunniit aningaasartuutitigut sipaarutaassasut nalunaarusiap Danmarks Tekniske Universitetimeersup uppernarsarnerarpaa. Politikkikkulli iliuuseqarpallaannginnerup avatangiisinillu takussutissartalimmik mingutsaaliuinnginnerup pitsaasumik ataqatigiissaakkamillu avatangiisinik mingutsaaliuinissaq akornusersorpaa. Paasissutissanik ataqatigiissunik pilersitsigaanni – soorlu ”qorsunnik” naatsorsuusiornikkut – kommunimi aalajangiisartut, inissiaatileqatigiiffik, pilersuisut, inuutissarsiortut ineqarfiillu assigiinngitsut pitsaasunik najoqqutassaqalissagaluarput aammalu aaqqissuussamik avatangiisinik illersuinerulernissamut tunngavissaqalissagaluarluni, taama nalunaarusiortut naliliipput. Kisiannili Sisimiut Kommunianni imaaliallaannaq qorsunnik naatsorsuusiortoqarsinnaanngilaq. Pilersaarusiaagallartumi pilersuinermut tunngasuinnaat pineqarput: Imeqarneq, imeq atornikoq, eqqagassalerineq, innaallagissiorneq aamma kiassaateqarneq. Taakkununngalu atatillugu naatsorsuutit qorsuit takussutississavaat avatangiisit qanoq mingutsinneqartiginerat pineqartunilu qanoq aningaasanik atortussanillu atuitigineq. Nalunaarusiami inerniliullugu oqaatigineqarpoq pisariaqarluinnartoq paasissutissanik pilersuinermut tunngasunik katersinissaq nalunaarsuinissarlu avatangiisit siunertalimmik tangilimmillu mingutsaaliorneqassappata. Sisimiut Kommunianni ”Avatangiisinik mianerinnittumik siulersueriaaseqarnissaq qorsunnillu naatsorsuusiortarnissaq pillugit pilersaarusiaagallartoq” Danmarks Tekniske Universitetimit juunimi 2003-mi ilusilersorneqarlunilu saqqummersinneqarpoq. Pilersaarusiagallartumi qorsunnik naatsorsuusiortalernissamut avatangiisinillu mianerinnittumik Kalaallit Nunaanni kommunini siulersueriaaseqalernissamut periarfissat Sisimiut aallaavigalugit eqqartorneqarput, pilersaarusiorluakkamik mingutsaaliuisoqassappat iliuuserineqarsinnaasut iliuuseqarfiusinnaasullu suuneri sumiinnerilu taakkartorlugit. Links – qorsunnik naatsorsuusiornermut tunngasut atuakkat sakkussallu |
