KANUKOKA Kalaallit Nunaanni ataqatigiissaarisutut kommunit peqataaqqullugu kajumissaassava, taamaaliornikkut Kalaallit Nunaanni kommunit nunarsuarmi silap pissusiinut nukissiuutinullu tunngatillugu unammilligassanut aaqqiissutissanik nassaarniarnermut suleqataanerat immikkut isiginiarneqarnissaannut anguniarlugu.
Kommunit suliniummut Nunani Avannarlerni Nukissiuutitigut kommuninngornissamut unammisitsinermut peqataanermigut Kalaallit Nunaanni avataanilu nunarsuarmut nunanullu avannarlernut allanut kommunip nukissamik sipaarniarnikkut CO2-millu aniatitsinermik annikillisaanikkut suliniutiminik nittarsaassinissaminut asseqanngitsumik periarfissinneqassaaq.
Nunani Avannarlerni kommunit tamarmik aqqutissiuisuullutik nukissiuuteqartitsiniarnerup tungaatigut nutaamik aallarniisut taamak taaguuteqarsinnaanermut qinnuteqaqataasinnaapput. Kommunit tamarmik annerpaamik nukissiuuteqarsinnaanissamut pilersaarusiamik ataatsimik saqqummiussaqarsinnaapput. Kommunimit nukissiuuteqartitsinermut tunngasunut pilersaarusiap isumaa nassuiarneqarsimavoq, tassaasoq pilersaarusiaq, kommunip aaqqissuunneqarsimaneranut kisartullusooq atalluinnartoq, pisariaqanngilarli kommuni pilersaarusiami aqutsisuusimanissaa. Pilersaarusiap ilagaa ikummatissaqartitsinikkut/imaluunniit ikummatissaqartitsinerup sunniuteqarluartuunissaa kommuneqarfiusup iluani aammalu annertussutsip uuttuutaa imaassinnaalluni angallassinermut tunngasut pillugit eqqarsaatigineqarsimanissaa. Pingaartuuvoq pilersaarusiap pilersitsisimanissaa/ pilersitsillunilu mingutsitsinngitsunik ikummatissaqartitsinermi atuisuusinnaanissanik, nunap immikkoortuani ineriartortitsineq, kiisalu tapersiutaalluni iluaqutaasussaq siumut takorluukkanut uumaatsunik CO2 -qanngitsumillu inuiaqatigiit isumalluuteqarnerat attaviitsunngortissallugu.
Kommuni ataaseq nukissiuutinik atuinermik aamma/imaluunniit CO2-mik aniatitsinermik annikillisaataasumik suliniutiminik ataatsimik suliniuteqarluni peqataasinnaavoq. Suliniutip kommunimi inissisimanissaa suliniutillu 2011-mi upernaakkut ajugaasup toqqagaaffigisaata nalaani tigussaasunik angusaqarfiusimanissaa piumasaqaataavoq. Soorlu aamma pilersaarusiaq maannakkut pisuussalluni naammassineqarsimassallunilu annerpaamik ukiut marluk qaangertinnagit. Suliniutit qanoq ittut ingerlanneqarsinnaanerinut killiliussat siammasissuupput; Suliniutit assersuutigalugu teknikkikkut nukissiuutitigut aaqqiissutaasinnaapput, aaqqissuussaanikkut ilusilersuinerit, aningaasaqarnikkut sakkussat, ingerlatitseqqiineq pissuserisanillu allannguutaasussanik suliniutit, ilinniartitaanikkut sammisat, innuttaasunik akuutitsineq allarpassuillu.
Suliniutit nassiunneqartut nunagisami nalilersuinermi komitemit nalilersorneqassapput, komitelu suliniutit Kalaallit Nunaanneersut pitsaanersaannik nunani avannarlerni ataatsimoorussamik nalilersuinermi komitemut ingerlaqqittussatut inassuteqassaaq, tassanilu ajugaasoq toqqarneqassalluni. Nuna ataaseq suliniutinik pingasunik inassuteqarsinnaavoq. Kalaallit Nunaanni kommunit sisamaannaammata toqqagaanissamut periarfissaqarluarpoq.
Taamatut kajumissaaruteqarluni suliaq annertuumik naammassisaqarfiussaaq nukissiuuteqarnissaq pillugu pilersaarusiaasimasut piukkunneqartut avataani ilisimaneqalernissaannut aammalu pilersaarusiaasimasup ajugaasussap ilisimaneqalernissaanut, taamaalilluni Nunani Avannarlerni kommunit allat silarsuarmilumi isumassarsiffigisinnaaniassammassuk ilinniarfigisinnaaniassallugulu. Nunani Avannarlerni, piujuartussamik nukissiuuteqarnermut tunngasut pilersaarusiaasimasut pillugit angusat tamaasa ataatsimoortillugit atuakkamut quppersakkamut allattorneqassapput, Nunani Avannarlerni allanit isumassarsiffiusinnaanngorlugit. Takoqqusaarinissaq pissaaq nittartakkami uani www.nordicenergymunicipality.org, toqqaaniarnerni toqqaanermullu atatillugu ataatsimiiuaarnerit iluatsillugit, Nunat Avannarlerni nunat akornanni nunallu assigiinngitsut akornanni ataatsimeeqatigiittarnerni kiisalu pilersaarusiaasimasut takuteqqaarnerini atortorinerineqartut atorlugit. Tamatuma saniatigut kommunit piukkunneqartut, kommunillu nukissiuuteqarnerup tungaatigut siuarsaasimanerpaatut toqqarneqartut, periarfissaqassapput, Nunani Avannarlerni kommunit nukissiuuteqartitsiniarlutik siuarsimanerpaat ilisarnaataannik takoqqusaarinerminni atuisinnaatitaassallutik.
Taakku kommunit piukkunneqarsimasut pisussaaffigissavaat paasissutissat allaaserisallu, pilersaarusiarisimasaminnut tunngasut, tuluttuunngortinnissaat isumagissallugu, ataatsimut paasissutissiarinissaannut atorneqarsinnaanngorlugit.
Paasissutissat sukumiinerusut Kalaallit Nunaanni suliniummi ataqatigiissaarisumut Zenica G. Larsenimut, KANUKOKA, saaffiginninnikkut pineqarsinnaapput, e-mail: zegl@kanukoka.gl, oqarasuaat 36 21 12.
