Una tooruk: Avatangiisinut tunngasumik ilitsersuutit

Tunisassianut assigiinngitsunut arlaqartunut tunngasunik pinngortitamut nanertuutaanngitsumik pisiniarninni ikiorsiissutaasinnaasunik ilitsersuutinik peqarpoq. Tassami assigiinngitsut tunisassiat killeqartumik amerlassuseqartut kisimik avatangiisinut tunngasumik meqqiligaammata.

Ilitsersuutini pissutsit paasisaqarfigissallugit pingaaruteqartut sammineqarput. Qulequtaasutut maluginiagassat pingasut pingaartinneqarput, tassalu "Eqqagassat", "Avatangiisinut peqqissutsimullu ulorianartut" aamma "Nukimmik atuineq", taakkua ataatsimoorlutik Kalaallit Nunaanni silarsuullu sinnerani avatangiisini ajornartorsiutinut annertuumik attuumassuteqartuummata.

Avatangiisit pillugit ilitsersuutini pissutsit makkununnga tunngasut isiginiarneqarput:

• Siulequtsiissutip tunisassiat suut pineqarnersut pisariaqartitallu naammassineqartussat oqaluttuarai. Tassani aamma atorfissaqartitat allatut iliornikkut naammassineqarsinnaanissaat imaluunniit allamik toqqaanikkut ajornartorsiutip pinngitsoortinneqarsinnaanissaa siunnersuuteqarfigineqartarluni.

• Kingornatigullu avatangiisit eqqarsaatigalugit sianiginiagassat allaaserineqarput, qulequttani ukunani "Eqqagassat", "Avatangiisinut peqqinnissamullu ulorianaatillit" aamma "Nukiit". Tamatumani naatsumik oqaatiginninnikkut sammineqarluni tunisassiat "pitsaasut" aamma "ajortut" assigiinngissutaat.

• "Periusissamut siunnersuut"-mi pinngortitamut nanertuutaanngitsumik pisiniarniarlutit illit nammineq qanoq iliuuseqarsinnaanerit tuniniaasullu sunik paasiniussinnaaneraatit allaaserineqarput. Imaassinnaavoq avatangiisinut tunngasunik meqqi sorleq toqqarneqassanersoq pineqartoq, aammali imaassinnaavoq apeqqutit arlaqartut akissuteqarfigineqarnissaat pisariqartinneqartoq. Apeqqutit ilusilersugaapput piumasaqaat aalajangersimasoq naammassinneqarsimanersoq akissuteqarfigineqartussanngorlugu. Apeqqutit tamarmik ""ap"-imik akineqarpata tunisassiaq avatangiisinut immikkut nanertuutaanngitsoq pineqassaaq, allatulluunniit oqaatigalugu pinngortitamut nanertuutaanngitsoq. Apeqummut ataatsimut arlaqartunulluunniit "naagga"-mik akissuteqartoqarpat ilisimalissavat tunisassasiaq avatangiisinut ajornartorsiutitaqarsinnaasoq. Taamaattoqartillugu tuniniaavinni allamik pitsaanerusumik pisinissamut periarfissaqarnersoq misissussallugu qinersinnaavat. Imaassinnaasarporli pisiassamik piumasaqaatinik tamaginnik naammassinnissinnaasumik nassaarneq ajornartoq. Taamaattoqartillugulu tunisassiat piumasaqaatinik taakkartorneqartunik amerlanerpaanik naammassinnissimasumik toqqaanissaq silatusaarnerpaajuvoq, soorunami akitigut allatigullu pisiariniagaq allanit ajornerunnginnissaa aamma alaatsinaallugu.

• Naggasiullugu ilitsersuutit ilaanni allaaserineqarpoq qanoq iliorluni pisinerup kingornatigut malinnaatitsisariaqartarnissaq. Tamanna ilanngunneqartarluni pisiap avatangiisinut naleqquttuunissaa "kisimi" naammanngikkaangat; aammali eqqortumik atorneqartariaqartuugaangata avatangiisinut iluaqusiineq tamakkiisumik anguneqassappat.

Apeqqutit taamaattut apeqqutigisimagukkit, tuniniaasullu akissutai pissarsiaralugit pisimaguit, nakkutigisassat periarfissaqarfigisatit naammassissavatit. Tamatumunngalu peqatigitillugu tuniniaasoq paasitinneqassaaq siunissami tunisaqarnissaminut aalajangiisuusinnaasoq apeqqutinut tamanut "aap"-imik akissuteqarsinnaaneq, tamatumuunalu immaqa – neriussaagut - ineriartortitsinermik aallartitsineqarsinnaassalluni.

Pinngortitamut nanertuutaanngitsumik pisiniarsinnaanerup ajornaatsuunissaa siunertarineqarpoq. Amerlassuutigut avatangiisinut naleqquttumik toqqaanissaq annertunerusumik piffissaajaataaneq ajorpoq, pisiniarnernili allani periarfissanik misissuinermut piffissaq annertunerulaartoq atorneqartariaqassalluni, pingaartumik siullermeerutaasumik misiliininni.

Una tooruk: Avatangiisinut tunngasumik ilitsersuutit

Una tooruk: Avatangiisinut tunngasumik meqqit

Hot-line aamma e-konference

Nalunaarsuineq

Paasisaqarnerorusukkuit ...

 

Una tooruk: Avatangiisinut tunngasumik meqqit