Kommuninut pisiniartarnernut politikkissatut siunnersuut

Kommunit pisiniarnermut politikkimikkut anguniarpaat niuernerpalaartumik nakerisarsiorfiunngitsumillu Kalaallit Nunaanni inuussutissarsiuteqarnerup aaqqissuussaanera pinngortitarlu eqqarsaatigalugit pisiniartarnissaq.

Tamatumunnga peqatigitillugu kommunit kissaatigaat pinngortitamik asattuussinermik aallaaveqartumik pisiniartarnermut politikkeqarnikkut avatangiisinik ajoqusiisarnerit millisaaviginissaat avatangiisinullu ajoqutaannginnerusunik atortunik sullissinernillu ineriartortitsinerup atuisarnerullu siuarsarnissaat.

Nunatsinni pinngortitap ataqatigiinnera malussajasuummat aammalu piujuaannartitsinissamik aallaaveqartumik atuineq atortunillu eqqagassalerinermik ineriartortitsineq ukiuni kingullerpaani aatsaat aallartimmat pisortat tamatumani iliuusaat pingaaruteqartorujussuusussaapput. Tamanna ingerlanneqassaaq assersuutigalugu eqqagassat malunnaatilimmik ikilisinneratigut aammalu atortut avatangiisinut ajoqutaasinnaanerannik nunatsinni ingerlatsivinni sulisuni innuttaasunilu ilisimaarinninnerulernikkut. Kommunit atortussanik avatangiisinut asattuussisunik ujartuinerat aamma pilersuisut atortussanik avatangiisinut asattuussisunik ineriartortitsinissamut tuniniaanissamullu piumassuseqarnerat annertusaavigineqassaaq.

Anguniagaq
Pisiniarneq pisisarnissamillu isumaqatigiissuteqartarnerit ataatsimut isiginnilluni akit, pitsaassutsit, avatangiisit, tunniussinissamut qularnaarinerit, sullissinerit il.il. tunngavigalugit pisassapput. Sumiiffigisani pilersuisut salliutinnissaat anguniarneqarpoq, akitigut allatigullu pissutsit eqqarsaatigalugit sumiiffinni pisiniarnissaq atussallugu naleqquttuujunnaarsinneqanngippat.

Anguniagaq tassaavoq 2005-ip aallartinnerani "Annertussuseq" pillugu immikkoortumi atortut salliutinneqartutut taagorneqartut eqqarsaatigalugit pisiniarnerni tamani avatangiisinut asattuussisunik piniartarneq aallartinneqassasoq. Eqqarsaataavoq piffissaq ungasinnerusoq eqqarsaatigalugu atortussanik sullissinernillu pinerni tamani avatangiisinut asattuussineq aallaavigineqartalerumaartoq.

Pinngortitamik asattuussineq
Nioqqutissat pisortanit atorneqartussatut Kalaallit Nunaanut eqqussorneqartut piunertik tamaat avatangiisinut asattuussisuunissaat kommunit sulissutigaat. Taamaattumik atortussat pilersinneqarnerannut, atorneqarnerannut iginneqarnerannullu atatillugu avatangiisinut sunniutaasut pisinermi isumaliutersuutinut tamarmik ilaatinneqassapput. Avatangiisinut sunniutaasut makkua pingaartinneqarput:

· 1. Eqqagassat ikuallatassat eqqaavimmulluunniit igitassat annikillisarnissaat
· 2. Saffiugassanik arrortikkuminaatsunik assigisaannillu pinngortitami kissaatiginangitsunik siaruarterinerup annikillisarnissaa
· 3. Nunap iluani sinnikunik pinngorteqqinneqarsinnaanngitsunillu ikuallaasarnernik atuinerup millisarnissaa

Tamatumuuna qulakkeerneqassaaq nunatsinni avatangiisit immikkut ittuusut asattuunneqarnerat, peqatigitillugulu nunat tamat akornanni avatangiisinik ilisimaarinniffiusumik niuerfiit taperserneqassallutik.

Ingerlatsisuusut
Pisiniartarnermut politikki KANUKOKA-p inassuteqarnerani kommunit tamarmik pineqarput. Peqatigitillugulu suliffeqarfiit kommunit ataanniittut kaammattorneqarput pisiniartarnermut politikki maleqqullugu.

Ilimagineqarpoq Namminersornerullutik Oqartussat aalajangersakkamik assingusumik atortussanngortitsissasuttaaq.

Annertussuseq
Kommunini pisiniartarnermut politikkimi pineqarput atortussanik pisiniartarnerit sullissinernillu atuinerit fakturalersorneqartut tamarmik, tamatumani attartornerit ilanngullugit. Aammalu pisiniartarnermut politikkip piffissaq ungasinnerusoq eqqarsaatigalugu tuniniaanerni suliarinnittussarsiuinernilu atuutilernissaa anguniarneqarpoq.

Aallaqqaasiutitut atortussat toqqagaasut makkua pinngortitamut asattuussiniarnermi pineqarput:

· Pappiaqqat
· Allaffimmi atortut
· Allaffimmi maskiinat
· Printerini qalipaatissat
· Pequtit
· Errorsinermut eqqiaanermullu atortut
· Annoraamerngit
· Qulliit atortuilu

Pinngortitamut asattuussisumik atortussanik salliutinneqartunik pisiniarnissamut ilitsersuusiortoqarsimavoq. Ilitsersuutit nunatsinni pissutsinut naleqqussagaapput, pisiniartartut pinngortitamut asattuussinermi pingaaruteqartunik piumasaqaateqarsinnaanerat pisariitsunngorlugu.

Akisussaassuseq aaqqissuussinerlu
Kommunalbestyrelse allakkiaq manna najoqqutaralugu pisortani pinngortitamik asattuussisumik pisiniarnermut politikki kommunimut atuuttussanngorlugu aalajangersaassaaq.
Kommunalbestyrelse akisussaavoq pisiniartarnerup aaqqissuussamik pisiniartarnermut politikki malillugu ingerlanneqarnissaanut, sulisunillu toqqaaneqassaaq politikkimik malinninnissamut pisussaaffiligaasunik.
Kommunimi pisiniartarnermik ingerlatsineq pisiniartartut pisiniarnermut piginnaassuseqarnertik aallaavigalugu pisiniartarnerannik tunngaveqassaaq.

Nalunaarsuineq uppernarsaasersuinerlu
Pisiniartarnerni allaffissornikkut nalinginnaasumik periuseqarnerup saniatigut pisariitsumik nalunaarsueriaaseqarnikkut uppernarsarneqartassaaq pisiassat pisiarineranni pinngortitamut asattuussinermik piumasaqaateqarnersoq tamakkulu naammassineqarnersut.