Pinngortitamut nanertuutaanngitsumik pisiniarneq
Pinngortitaq mingutsinneqaraluttuinnavippoq, eqqagassallu annertusiartuinnarnerat erseqqilluinnarluni. Tamatumunnga pissutaavoq inuiaqatigiinni kikkut tamarmik atuinerisa annertusiartornerat. Atortussat tunisassiarineqarneranni mingutsitsineq pinngitsoortinneqavisinnaasanngilaq, atortullu atorsinnaajunnaaraangamik eqqaavimmut iginneqartarput allatulluunniit avatangiisinut ajoqutaalersarlutik.
Namminersornerullutik Oqartussat kommunillu annertuumik atortussanik atueqataasuupput. Taamaammat oqartussaasut atortussanik avatangiisinut minnerpaamik ajoqutaasunik pissarsiniarnermi (pinngortitamut nanertuutaanngitsumik piniarneq) siuttuunissaat eqqumiigisassaanngilaq. Aammataarlu atortussanik avatangiisinut ajoqutaannginnerusunik qinertuineq namminersorlutik inuussutissarsiortunut innuttaasunullu tuniluussinnaavoq.
Sooq & Qanoq?
Atortussaq avatangiisinut ajoqutaannginnerpaaq tassaavoq pisiarineqanngitsoq! Tusarlugu eqqumiilaavissorpoq, ilaatigulli periarfissaviusinnaasarpoq. Ullumikkut assersuutigalugu allaffimmi atortoq printeriulluni, kopimaskiinaallunilu telefaxiusoq pineqarsinnaavoq. Taamaasilluni atortussaq ataasiinnaq naammagineqarsinnaalluni atortussat pingasut tamaasa immikkut pinnagit, soorunalimi maskiinamik atuisussat kopeerinermik naqiterinermillu qanoq atorfissaqartitsitiginerat eqqarsaatigilluaqqaagassaavoq.
Sunarpiaq atofissaqartinneqarnersoq suleqatinnik oqaloqatiginneqqaarnissat pisariaqarpoq atortussamik pisitinnak, kukkusumik pisisinnaanissaagaluaq pinngitsoortinneqaqqullugu. Assersuutigalugu computerisinermi eqqaamasariaqarpoq maannakkut programmit atorneqartut sinnerlugit imaqarsinnaasumik computerisinissaq. Taamaasillutit pingaaruteqartunik programmit atorneqartut nutarterneqarneranni inissaq annertunerusoq pisariqartinneqassappat nutaamik computerisinissaq pinngitsoortissagakku. Pequtit annoraamerngillu pitsaassusii annertunngikkunik nungullalertortartut isikkuminaallilertortartullu eqqarsaatigalugit pissutsit aamma taamaapput. Matuma siornani eqqartorneqartuni tamani isumalluutinik, nukinnik aningaasanillu sipaarneqartarpoq pisiniarnerup aallartinnginnerani eqqarsarluaqqaaraanni.
Periutsit marluusut arlaat aqqutigalugu pinngortitamik ajoqusiinngitsumik pisiniartoqarsinnaavoq. Siulleq tassaavoq takusinnaasanik tunisassiortunit avatangiisinut nukinnullu atorneqartunut tunngasunik takussutissiissutigineqartut maluginiarnerat. Immikkoortuni tulliuttuni avatangiisinut naleqquttuunermut nukinnullu atorneqartunut takussutissiissutit pitsaanerpaat allaaserineqarput, aammalu tunisassiani piumasaqaatinik naammassinnissimasuni ilisarnaatinut atorneqartunut nalunaarsuut. Periutsip aapaatut tunisassiat avatangiisinut tunngatillugu qanoq ittuunerinik paasissutissat apeqquteqartarnikkut pissarsianerineqarsinnaapput. Atortussat avatangiisinut atatillugu qanoq ittuuneri pillugit annertunerusumik paasisaqarniarninni apeqqutit suut apeqqutigissallugit naleqqunnerpaaneraannut ilitsersuummik sananeqarsimavoq.
Avatangiisinut tunngasunik aqutsineq siulersuinerlu
Meqqit assigiinngitsut avatangiisinullu tunngatillugu ilitsersuutit saniatigut aamma tunisassianik avatangiisinut tunngasunik siulersueriaatsimik tunisassiornermi soorlu EMAS imalt. ISO 14001 -imik atuisumik tunisassiarineqartunik pisinissaq toqqarsinnaavat. Avatangiisinut tunngasunik siulersuineq isumalluutinik (soorlu nukimmik, imermik atortussiassanik) atuinermik killilersimaarinninnermi sakkuuvoq tunisassiornermilu avatangiisinik nanertuinermik appartitsiniarnermi, tunisassianulli ataasiakkaanut aalajangersimasunut toqqaannartumik atasuunani. Aqqissuussaasumik avatangiisinik sammisaqarneq avatangiisinut akuerisaasutut allagartalerneqarnissamut tunngaviuvoq, tunngaviusumilli isumaqarluni tunisassiat avatangiisit sianigalugit sanaajussasut.
EMAS aamma ISO 14001 imminnut assingusorujussuupput, suliffeqarfiulli avataaniittunit nalunaaruteqartarnermik nalunaarsuinermillu piumasaqaatit EMAS-imi annertunerpaallutik, taamatullu EMAS-mi peqqussummi avatangiisit pillugit aqutsinermi periutsip avatangiissinut tunngasut suut minnerpaamik imarissanerai piumasaqaateqarluni. Suliffeqarfiit EMAS-imik allagartaqartut meqqi matuma taperliata tu-ngaaniittoq atussallugu akuerisaapput. Suliffeqarfinnut ISO 14001-imut akuerisaasunut ilisarnaammik peqanngilaq. Tamannali takuneqarsinnaakkajuppoq tunisassiorfiit tuniniaanermut atatillugu atugassiaanni, avatangiissinut tunngatillugu akuerisatut allagarsigaappata, qaqutiguinnarli tunisassiani puuinilu tamanna takuneqarsinnaasarluni. Taamaattumik annertuumik pisiniarnerni suliffeqarfimmik attaveqarneq iluaqutaasarpoq imaluunniit paasissutissanik tuniniaasoq aqqutigalugu piniartarneq.
Una tooruk: Avatangiisinut tunngasumik ilitsersuutit
