Suliffeqarfiit inuussutissaleriffiusut akuerineqartarnissaat

Niuertarfimmik inuussutissaarniarfimmik aallartitsiniaraanni imaluunniit suliffeqarfik inuussutissaleriffioreersoq alliniaraanni/allanngortiteriffiginiaraanni Avatangiisinut Pinngortitamullu Pisortaqarfiup uumasut nakorsaannut immikkoortortaqarfianit akuersissummik piniartoqassaaq. Uumasut nakorsaqarfiata kommunit kajumissaarpai tamanna nunaminertamik tunniussineqartillugu, sananissamut atuilernissamullu akuersissuteqartoqartillugu aammalu suliffeqarfimmut inuussutissaleriffiusumut inuussutissarsiutiginninnissamut allagartamik tunniussisoqartillugu eqqumaffigineqartinniartaqqullugu.

- kioskit tamarmik nerisassaarniartut
- siaasagaarniarfiit assigisaallu
- sullissiviit kantiinallu assigisaallu ulluinnarni inunnut 12-inut amerlanerusunulluunniit nerisassiortartut
- nerisassanut toqqorsiveqarfiit

uumasut nakorsaqarfianit akuerineqartussaapput, niuertarfimmik inuussutissaarniarfimmik/inuussutissanut toqqorsivimmik aallartitsinermi imaluunniit suliffeqarfimmik inuussutissaleriffimmik pioreersumik alliliinermi/allanngortiterinermi.

Inatsisitut tunngavissarititaavoq Suliffeqarfiit inuussutissaleriffiusut pillugit Namminersornerullutik Oqartussat nalunaarutaat nr. 21, 27. juuli 1998-imeersoq.

§ 3. Suliffeqarfiit inuussutissarsiutigalugu inuussutissanik suliarinnittut, toqqortarinnittut, assartuisut nioqquteqartulluunniit Naalakkersuisunit akuerineqarsimassapput. Akuerineqarnissaq anguniarlugu suliffeqarfiup nalunaarummi matumani piumasaqaatit eqqortissimassavai.

§ 4. Akuersissummik nutaamik piniartoqassaaq

1. illutanik aaqqissuussaanernilluunniit annertuumik allanngortitsisoqassappat, imaluunniit
2. akuersinermut tunngaviusoq annertuumik allanngortinneqassappat.