Asilerisoq Naja Habermann asilerisoqarnermi ataqatigiissaarisuusoq nersornaammik 25.000 kr.-inik aningaasartalimmik Asi sinnerlugu tigusisuuvoq:
 

 

Peqqinnissamut Avatangiisinullu naalakkersuisup Agathe Fontainip nersornaasiineq ima tunngavilersorpaa:

 

“Namminersornerullutik Oqartussanit nersornaammik tigusisussatut siullertut toqqarneqartut, innuttaasunut sunniuteqarnerpaamik suliniuteqarsimanermikkut nersorneqartariaqarput. Nersornaatisisussat sulianut aalajangersimasunut najukkami innuttaasut akuutissimavaat,  iliuutsitigut inoriaatsikkullu pinngortitamut sunniuteqartarnermut inunnik eqqarsalersitseqataallutik.

 

Uani oqaaseq ”Eqeersimaartuuneq” atussallugu tulluavippoq. Eqeersimaartuunermikkut, ilisimasamikkut ingerlatitseqqillaqqinnermikkullu piffissami sivikitsuinnarmi ”piunerminni” suliniutinik mikisunik angisuunillu avatangiisinut pinngortitamullu iluaqutaasumik naammassisaqartarsimapput, inuusuttut, utoqqaat, illoqarfinni nunaqarfinnilu innuttaasut, piniartut, atorfillit, politikerit sulinialersillugit. Nunatsinni pinngortitamik assigiinngisitaaqisumik immikkuullarissusianillu takunnilersitsisunik – eriaginissaannullu akisussaaffeqarnitsinnik.

 

(...) 

 

 ” Inuit, suliffeqarfiit kattuffiilluunniit maligassiuisut eqeersimaartullu pinngortitamut avatangiisinullu tunngasunik ilisimasatsinnik annerulersitsisut avatangiisinulluunniit pitsanngorsaataasumik aalajangersimasumik suliniuteqartut inuiaqatigiinnit nersorniarlugit nersornaat pilersinneqarpoq.”