|
Nuummi 2004-mi septembarip arfernannit arfineq pingajuannut ineriartortitsiniarluni isumattorsaqatigiinneqarmat siunissami asilerisoqarnikkut aaqqissussinissaq oqaluuserineqarpoq. Taama oqallinneq tunngavigalugu nassuiaasiortoqarpoq taaneqartumik ”Kalaallit Nunaanni asilerisoqarneq”, tassani ilaatigut inassutigineqarluni ataatsimiittartoqatigiiliortoqassasoq nunamut tamarmut atuuttussamik, asilerisoqarnikkut aaqqissuussinermik ataqatigiissaarisuusussamik.
Taamaattumik asilerisoqarnermut ataatsimiititaliortoqarpoq ataani taagorneqartunik suliassalimmik:
Asilerisoqarnermut ataatsimiititaliap suleqataaffigissavai:
1. nunamut tamarmut atuuttumik asilerisoqarnikkut aaqqissuussineq ataqatigiissaassallugu
2. Asilerisut ilinniartitaasarnissaannut najoqqutassiornissaq
Tamakkununnga atatillugu asilerisoqarnermut ataatsimiititaliat suliassaraat
- asilerisut asilerisoqarnerup ataani kommunini atorfinitsinneqartut ingerlanissaannut suliassaannullu pilersaarusiaq akuersissutigissallugu,
- asilerisoqarnerup ingerlanneqarnissaata pilersaarusiorneranut peqataanissaq,
- asilerisoqarnerup ingerlaavartumik naliliiffigisarnissaa,
- asilerisoqarnikkut aaqqissuussinerup aallartinneqartup nalunaarusiarineqartarnissaanut peqataanissaq aamma apeqqutit asilerisoqarnermut attuumassuteqartut pillugit Inatsisartunut inassuteqartarnissaq,
- iliuusissanik asilerisoqarnikkut aaqqissuussinermut nakussassaataasinnaasunik siunnersuuteqartassalluni,
- nuna tamakkerlugu attavigisartagassanik pilersitsisartutut atuunnissaq sumiiffinnilu attavigisartakkanik tapersersuisarnissaq,
- nunat allat asilerisoqarnikkut aaqqissuussiviusut suleqatiginissaat aallartinneqassanersoq nalilissallugu
Ataatsimiititaliami makku ilaasortaapput:
KANUKOKA
Silami iliuusissanut siunnersuisoqatigiit, Friluftsrådet
Nuup Kommunea
Inerisaavik/Pilersuiffik
Kalaallit Nunaata Katersugaasivia Allagaasivialu
Ilinniarfissuaq
Kalaallit Nunaanni Takorniariartitsinermut Inuussutissarsiornermullu Siunnersuisoqatigiit
Pinngortitaleriffik
KNAPK
Uppik
Isaavaraq Petrussen
Avatangiisinut Pinngortitamullu Pisortaqarfik
Avatangiisinut Pinngortitamullu Pisortaqarfik ataatsimiititaliani siulittassutut allatseqarfittullu atuuppoq.
Ataatsimiititaliani siulittaasoq sammineqartumi tamarmik isumaqatigiissinnaanngippata aalajangiisuussaaq.
Asilerisoqarnermut ataatsimiititaliat pisariaqaraangat ataatsimiittassapput, taamaattorli 2005-imi 2006-imilu ukiumut minnerpaamik marloriartarlutik. Ataatsimititaliani ilaasortat amerlanerussuteqartut tamanna isumaqatigiissutigippassuk ilaasortassanik nutaanik sukkulluunniit toqqaasoqarsinnaavoq.
| 
