Ilisarnaammut ataatsimiititaliap inassuteqarneratigut asilerisoqarnermut ataatsimiititaliaq aalajangerpoq QUPALORAARSUK asilerisumut ersiutaatinneqassasoq, pissutigalugu:

Tunngavilersuutaavoq:
Qupaloraarsuup mikisunnguugaluarluni angisuumik oqariartuuteqarnera. Upernalernera kaleriiuttarpaa.
Upernaaq tassaavoq inuuneq naajartornerlu, qupaloraarsuillu tikittut siulliit nuannaarnermik inuunermillu pajuttuusarput.
Asilerisup nungukkiartuutaanngitsumik atuinermik, inuunermik naajartornermillu nalunaarut oqariartuutigisarpaa.
Qupaloraarsuk piniagaanngilaq – Asilerisoq aallaaniarnikkut piniarnikkullu soqutigisanik assortuisuunngilaq
Qupaloraarsuit Asilerisullu uummaarissuupput, sukkasuujullutik qasujaatsuullutillu.

Angutivissap qalipaatai qernertoq qaqortorlu grafiskimik assilialiornermut naleqqulluinnartuupput. Aamma amerlasuujullutik kisimiillutillu takussaasarnerat pisariaqartitsineq naapertorlugu ilisarnaasiornissamut amerlanerusunik periarfissiipput.

Ilisarnaatitut iluatinnaataa

Ilisarnaatitut logop ilassaata toqqarsimasatta taassuma Kalaallit Nunaannut qangaanilli (ullumikkullu) pissutsinut atatinneqartarnera qulakkeerumallugu Finn Lynge aamma Niels-Henrik Lynge qinnuigisimavavut toqqagarput oqaaseqarfigilaaqqullugu. Taakku tamarmik siunnersuut assut tapersersorpaat.

Ilisarnaatitut logoliortitsilluni unammisitsisoqarpoq

Ilisarnaatitut logoliassamik unammisitsinermi siunnersuutigiumasat tunniuffissaat 2006-imi januraarip 25-annut killiligaavoq, tamatumani akissarsiassat annerit 10.000 kr.-ullutik. Ilisarnaatitut logoliortitsilluni unammisitsineq pillugu uani allanik atuagassaqarpoq.

Qupa nuannarsaatigalugu

Takorloorparput qupaloraarsunnguaq inequnartoq, sorraalaartoq, quianartoq, akisussaassuseqarpalaartoq, meeqqat inequgalugulu kakkagisinnaasaat pilersikkumaarlugu – allaanavianngilarlu Qupa’mik ateqalerumaarpoq.

Qupa’ uumasunnguuvoq quianartoq meeqqanik oqaluttuussisussaq pinngortitaq paarilluassallugu torrattuummat, pappialap eqqaavimmut igittarnissaa torrattuummat, Qussuk (avatangiisinut pitsaasutut ilisarnaat) saqqumitissallugu torrattuummat…..

Kalaallit Nunaata eqqiluitsuutinnissaanut Qupa ikioruk! – Qupa tuttunut minguitsunut! – Qupa nungukkiartuutaanngitsumik ineriartornermut! il.il.

Ungasinnerusoq isigalugu Qupa asilerisup ikiortaatut titartarlugit uiguleriiaanik assilialiortalersaarpugut.

Ilisarnaammut ataatsimiititaliat ukuupput :

Bjarne Pedersen, Avatangiisinut Pinngortitamullu Pisortaqarfik

Anders U la Cour Vahl, Kalaallit Nunaanni takornariartitsisinermut Siunnersuisoqatigiit

Kitte Vinter-Jensen, Suliniut Kommunini Avatangiisit, KANUKOKA