Niels Henrik Lynge qupaloraarsuk pillugu

 
Fotograf: Lars Witting Arc-pic.com

Inunnut uatsinnut avannaarsuarmiusunut seqernup saniatigut upernaamut ilisarnaataalluinnartoqarpoq – tassalu qulaporaarsuk, allanngornissarsuarmut nalliutilersumut oqariartuutaasoq kukkussanngitsoq.
Ullut ilaanni kujasimmik anorleqaluni nittaattorsuaq amerlasuukkuutaarlutik tikiussortut takuleraraavut – timmiaaqqat qaqortumik tarrajuttunillu qalipaatillit ukiup taamaalinerani nunap qalipaataanut tulluaqisumik.
Tamarmiulluta nunatsinni maani pisariaqartitatik tamaasa pissarsiarisarpaat. Tamaani mamarinerusaminnik nerisassarsisarput, maani piaqqisarput, tassami maani ilorrisaarluartarput. Taavalu ukiup qeqqa sinnerlugu maaneereerlutik oktobarimi unnulluartoq tarrup ataani avissaartuukkumanatik qarlulullutik ingerlaartaleraangata – taava qamuuna sakimmereqalugit inuulluaqquinnartariaqartarpavut.
Ataaserli qularutigineq ajorparput – tamarmik Kalaallit Nunaanni tukertuupput, ukiup taarnerani kujasinnerusumiittarput, kisiannili ullut nuannersut qaamasullu nalliunnissaannut isumalluarneq nalliuteriaraangat piaraaffimminnut utertarlutik. Tassami ima qilanaartigisarput ilaanni upernarnissaanik suli malunniuttoqanngitsorluunniit tikereertarlutik.

Qupaloraarsuit angutiviartaat tamarmik immikkut qarluuseqartarput – soorlu oqaluttuunniartaraatigut ”timmissat tamarmik siggumminnik qarlortarmata”, tassuunali aamma ersersittarlugu najugartik, piaqqatik, illersorusukkitik. Pigisatta pitsaanersaannik – pinngortitamik – ataatsimoorullugu atuinitsinni immikkoorumassueq.

Silarsuarmik qallermik, pingaartumik ilungersunarsiffiani, pisariaqartitsinitsinnut ersiutitut, nunani kialaarnerusuni ukiisarput – puigussanaguli angerlarsimaffik tamanit pitsaanerpaammat – avatangiisivut paarilluarutsigit.

Piaqqaminnik isumaginnillaqqilluinnartuupput. Angutiviaq arnaviarlu piaqqat perortinniarneranni ikioqatigiittarput – aammalu nunanut allanut angalaqqaarnissarsuup tungaanut piffissap naggataani nammineertikkumasarlugit – kisianni ataatsimoorlutik kujammukaartarput, aammalumi piaqqat piaraaffimminnut uterlutik ingerlaaqqaarneranni ilisimasortaasarlutik. Navianartut puigortanngilaat – timmissat tigutsisillit, terianniat, qitsuit – taamaakkaluartoq uteqqiattuartarput. Nunarpummiuna ajunngitsoqarsimasoq. Tamarmik nunamut pisuumut utertarput.

Qupaloraarsuk nuannaarnermik tusarliiartortuuvoq – uumasup ukiuni tuusintilippassuarni ukiup kaajallakkiartornerani nunatta tunniussinnaasaannik aaqqissuulluakkamik atorfissaqartitsiuartarneranik nuannaarutiginninnitsinnik – taanna nunatta pinngortitatut ineriartornermini piuinnartitsisutut taaneqarsinnaaneranut ilisarnaataavoq – naatsumik oqaatigalugu qupaloraarsuk nunarsuarmi maanilu nunatsinni suli atugarissaarnitsinnik oqariartortuuvoq.

Qupaloraarsuk ajunngitsuinnarmik pisarsimanngilarput – inunnguuseralugu piniarumatussuseqaratta siornatigut pingaartumik meeqqat ujaqqanik milloorlugit timmiaararniartaraluarput – tamannali oqaluttuaannanngorpoq. Ilisarnaatinnguarput taanna allaat illoqarfinni nipiliorfioqisuni angalaarlunilu piaqqiortarpoq, tamatumuunalu ersersittarpaa inuit pissusilersornerat avatangiisitta uumassusilinnik sernissuisinnaanerannut aalajangiisuusoq. Tassami eqqissisimatitsinikkut tupinnaannartunik angusaqarsinnaavugut – eqqissisitsineq malinneqarpat.

Nuna aserortigaanngitsoq nipinik tamanik tusaasassaqarfik avatangiisitta eqqissinassusiannut ersiutaatittarparput. Tassaqami qupaloraarsummit najukkani illersorniarlugu qarlortumit eqqissinarnerusoqarpa, ilisimasaratsigu qupaloraarsuk qanittumi eqqissilluni ivasoq. Qarlornerata pissutsit qanorpiaq innerat ersersittarpaa – tassalu eqqissineq.