Ammassallip Kommunea

Qimmit qimuttut kiisalu qimmeqarneq qitsuuteqarnerlu pillugit Inatsisartut inatsisaanni nr. 18-imi, 30. oktober 1998-imeersumi § 13 naapertorlugu aalajangersarneqarput:

Qimmeqarnermut qitsuuteqarnermullu akuersissut

§ 1. Ammassallip Kommuniani qimmeqarnermi taamaallaat pineqarput kalaallit qimmiat qimuttoq akusaanngitsoq.
Imm. 2. § 2, imm. 1-imi aalajangersagaq apeqqutaatinnagu suliamut atatillugu qimmeqarnermut aamma innarluuteqarneq pissutigalugu qimmimik ikiorteqarnermut akuersissuteqartoqarsinnaavoq. Akuersissut taamaattoq naalakkersuisunut qinnuteqartoqarnikkut pissarsiarineqarsinnaavoq.

§ 2. Ammassallip Kommuniani qitsuuteqarneq akuerisaavoq.

§ 3. Qimmeqartoqarlunilu qitsuuteqartoqarsinnaavoq aatsaat Ammassallip Kommunia, Teknikkeqarfik, Box 120, 3913 Tasiilaq-mut allakkatigut akuersissummik pissarsisimagaanni.
Imm. 2. Akuerineqarnissamut qinnuteqaammi uppernarsarneqassaaq, uumasut nappaataannut tunngatillugu aalajangersakkat atuuttut eqqortinneqarnerat.
Imm. 3. Qimmeqarsinnaanermut akuersissut ukioqa atasiakkarlugu atuuppoq. Akuerineqarnissamik qinnuteqaammi makku ilisimatitsissutigineqassapput:
1. Qimmit inersimasut (ataatsimik ukioqalereersimasut) aamma taakkunannga akiuussutissamik kapitissimasut qassiuneri.
2. Qimmiaqqat qaammatit sisamat qaammatillu aqqaneq-marluk akornanni utoqqaassusillitt qassiuneri taakkunanngalu akiuussutissamik kapitissimasut qassiuneri.
3. Qimmiaqqat qaammatinit sisamanit ikinnerusunik utoqqaassusillit qassiuneri.
Imm. 4. Qimmeqarnermut qitsuuteqarnermullu akuersissut inummut namminermut tunngatitaavoq allanullu tunniunneqartussaanani.

§ 4. Danmarkimit nunanilluunniit allanit qitsunnik nunatsinnut eqqussisoqartillugu Kalaallit Nunaanta sinniisoqarfianiit eqqussinissamik akuersineq nalunaarutigineqassaaq.
(Adresse: Strandgade 91, box 2151, 1016 København K)

Imm. 2. Qitsuit naartusut eqquteqqusaanngillat.
Imm. 3. Eqqussinermi qitsuit arnavissat naartusinnaajunnaarsinneqarsimassapput.
Imm. 4. Eqqussinermi qitsuit angutisissat naartutitsinaveersinneqarsimassapput.
Imm .5. Qitusuti naartusinaajunnaarsinneqarsimangitsut / naartutitsinaveersinneqarsi-manngitsut periarfissami siullermi naartusinnaajunnaaritnneqassapput / naartutisisinnaajunnaartinneqassapput. Qkitsut naaartusinnaajunaarsagaanngitsut / naartistisinnaajunnaarsimanngitsut naartunaveersaatitortinneqassapput. Taamaakkalurtoq kinguaasiulissagaluarpata piaraat toqorarneartassapput.

§ 5. Qitsunnik tunisaqartarnissaq siunertaralugu perortitsisarnerq inerteqqutavoq.

§ 6. Qimmit qitsuillu malittarisassat atuuttuusut malillugit akiuussutissamik kapitissimassapput.
Imm.2. Qimmit qitsuillu perlerornermullu akiuussutissamik kapitissimanermut nalunaaqutaqartinneqassallutik.

§ 7. Qimmit arfinilinnik qaammateqalereersimasut kalunnernik pitussimassapput, mattusimaneqarlutik, ungaluukkani mattusimaneqarlutik imaluunniit ingerlanneqarnerini pituutaqartinneqassallutik.
Imm. 2. Imm. 1-mi aalajangersakkanut ilaatinneqanngillat aalajangersimasumik suliaqarnermut atatillugu qimmiutigineqartut naalakkersugaasut, qimmit illoqarfiup avataani aallaaniarnermut sunngiffimmiluunniit sammisaqarnernut atorneqartut naalakkersugaasullu kiisalu qimmit qeqertani qimmilivinniittut.

Qimmeqarnermik nakkutilliisoq

§ 8. Kommunalbestyrelsip qimmeqarnermik nakkutilliisoq toqqassavaa taassumalu qimmeqarnermut qitsuuteqarnermullu tunngasut akisussaaffigissavai.
Imm. 2. Qimmeqarnermik nakkutilliisup pisinnaatitaaffi piginnaatitaaffiilu:
1. Qimmeqarnermik nakkutilliisup qimminik qitsunnillu perlerornermut akiuussutissanik kapuinerit nalunaarsugarissavai.
2. Qimmeqarnermik nakkutilliisup qimmiutillit qimminullu inissiisarfiit nalunaarsussavai.
3. Qimmeqarnermik nakkutilliisup qitsuutillit taakkulu najugaat nalunaarsussavai.
4. Qimmeqarnermik nakkutilliisoq qimminik angalaannartunik qaammatinik arfinilinnit amerlanerusunik utoqqaasuseqartunik aamma qitsunnik pigineqanngitsunik kiisalu qimminik qitsunillu unioqqutitsilluni eqqunneqartunik toqoraasinnaavoq.

Qimminut ungaluukkiat qimmiliviillu

§ 9. Qimminut ungaluukkiortoqarlunilu qimmiliviliortoqarsinnaavoq aatsaat nunaminertamik tamakkununnga atugassamik Teknisk Udvalg-imiit. Qimmiqarfittut ungalusat, qimmit illuaraat, qimminut nerisassaasiviit teknikkeqarfimmiit akuerisaassapput. Nunaminertat ukiup ingerlanerani piffissani aalajangersimasuni immattartut qimminut uninngatitsivittut atorneqassanngillat.
Imm. 2. Aqqusinernut aqqusineeqqanullu qimmip kalunnera aqqusernup killinganiit minnerpaamik 1 meteriussaaq.
Imm. 3. Qimmit atuarfinnut, paaqqinnittarfinnut, suliffeqarfinnut inuussutissaleriffiusunut imearfinnut killeqarfinnut assigisaannullu sapinngisamik ungasinnerpaamik pitunneqassapput. Pilersaarusiukkamik periarfissaqarneq naapertorlugu.
Imm. 4. Qimmit kalunnera siaarsimalluni allap illuanut inuttaa allakkatigut akuerseqqaartinnagu 7,5 meterinik qaninnerusumut pitunneqassanngillat.
Imm. 5. Illumut isersinnaaneq taassumalu eqqaanut pineq ajornarunnaarlugit qimmit pitunneqassapput.
Imm. 6. Tamanut atugassanngorlugit pisortanit atortulersuutaasunut qimminik pitussineq inerteqqutaavoq.

§ 10. Teknikkeqarnermi Ataatsimiititaliamiit akuersissummik tunineqarsimatinnani kommunimi qeqertani qimmiliisoqarsinnaanngilaq.

§ 11. Kialuunniit qimmeqarlunilu qitsuuteqartup taakku ikinnerpaamik ullormut ataasiarlugit takusartarnissaat isumagissavaa.

§ 12. Qimmiliviit ima aaqqissuunneqassapput, qimmit minnerpaamik 3 meteriusunik pituutserlugit taamaalilluni qimmit ataasiakkaat imaluunniit illugiiaat akornanni ungasissuseq minnerpaamik kalunneq siaarlugu 1 meteriussalluni.
Imm. 2. Qimmit pitunneqarsimallutik minnerpaamik qungasequmminnik ataatsimimik qillaateqartumik kalunneqssapput. Qimmit tamarmik pituutaat minnerpaamik ataatsimik atorsinnaasumik qissaruteqassaaq.
Imm. 3. Nunaminertat atugassiissutigineqartut ipiitsuullutillu torersuussapput.
Imm. 4. Qimmilivik piginnittup aqqanik erseqqissumik allassimasulimmik allagartaqartinneqassaaq.

§ 13. Qimmit naartusut sarliallilluunniit pitussimassapput tamatigut ajornanngitsumik qimmit inaannut isersinnaanngorlugit.
Imm. 2. Qimmit naartusut sarliallilluunniit inaat ima iluseqartinneqassaaq, anorimut, silammut nittaallamullu isumannaatsumik oqqiuffiusinnaassalluni. Qimmit inaat minnerpaamik 60 cm-inik portussuseqassaaq naqqanilu toqqinnersaq minnerpaamik 0,6 m²-ussalluni.

Qimmit qitsuillu inuttaqanngitsut unioqqutitsillunilu eqqunneqartut

§ 14. Ammassallip Kommuniata qimmit pitutaanngitsut aamma qimmit qitsuillu pigineqanngitsut kiisalu qimmit qitsuillu unioqqutitsilluni eqqunneqarsimasut toqutissinnaavai.
Imm. 2. Imm. 1 naapertorlugu toqutsineq piginnittumut taarsiinertaqanngitsumik pissaaq.

Naammagittaalliorsinnaaneq

§ 15. Qimmeqarnermut qitsuuteqarnermulluunniit atatillugu ajoqutaasunik naammagittaalliutaasinnaasut Ammassallip Kommuniani, Teknikkeqarnermi Ataatsimiititaliamut tunniunneqassapput. Naammagittaalliuutit pissuserissaarnissamut tunngasut politiinut nalunaarutigineqassapput.

Pineqaatissiisarneq aamma atuutilersitsineq pillugu aalajangersakkat

§ 16. § 1-mi aamma §§-ini 3 - 7-mut aamma §§-ini 9 - 13-imi aalajangersakkanik unioqqutitsisoqartillugu eqqartuussinikkut akiliisitsisoqarsinnaavoq.
Imm. 2. § 3, imm. 3 naapertorlugu imaluunniit nangeqqittunik arlaleriarluni sorraatsunik ileqqoreqqusamik matuminnga unioqqutitsisoqartillugu paasissutissanik tuniussiumanngitsoqartillugu, inuit qimmeqarnissamut qitsuuteqarnissamulluunniit Ammassallip Kommuniani Teknikkeqarnermi Ataatsimiititaliaata itigartissinnaavai.

§ 17. Qimmeqarneq qitsuuteqarnerlu pillugit ileqqoreqqusaq atuutilerpoq
ulloq . 2004.
Imm. 2. Peqatigitillugu Ammassallip Kommuniata qimmeqarnermut ileqqureqqusaq 13. marts 1996-simeersoq 30. oktober 1996-imi atuutsilerneqarsimasoq atuukkunnaarpoq.

Taamaalillugu Ammassallip kommunalbestyrelsianit akuerineqarpoq ulloq 15. marts 2004.

Tasiilaq, ulloq 20. april 2004