Ummannap Kommunia

Uummannap Kommuniani qimmit qitsuillu pillugit ileqqoreqqusaq.

Qimmit qimuttut qitsuuteqarnerlu pillugit Inatsisartut inatsisaanni nr. 18-imi, ulloq 30. oktober 1998-imeersumi §13-imi imm. 1 naapertorlugu aalajangersarneqarput:

§ 1. Uummannap kommuniani qimmeqarneq qitsuuteqarnerlu pillugit immikkut akuersissummik piumasaqaateqanngilaq. Immikkoortoq 2-mi nunaqarfiit killeqarfiisa iluini nunavinni qimmeqarneq qitsuuteqarnerlu inerteqqutaavoq, kiisalu immikkoortortani taaneqartuni makkunani:

1) Uummannap eqqaani qeqertani:

a) Salliaruseq
b) Inussulinnguaq
c) Alannguata Qeqertaa

2) Saattut eqqaanni qeqertani:
a) Iliarsuit qeqertaat
b) Naggorfik

3) Illorsuit eqqaanni qeqertani:
a) Qeqertat (Schades Ø)
b) Upernivik

4) Ukkusissat eqqaanni qeqertani:
a) Qeqertat (nunaqarfikoq)
b) Mallaap Qeqertaa

5) Nuugaatsaap eqqaani qeqertani:

a) Qinngusap Qeqertai
b) Karrat
c) Umiiviup qeqertai
d) Itsakuarsuk

6) Ikerasaap eqqaani qeqertani:
a) Itissaap Qeqertaa
b) Akulliup Qeqertaa
c) Qeqertarsuup Qeqertaa

7) Niaqornat eqqaanni qeqertani:
a)Qeqertaq (Nuussuup Qeqertaa)

Imm. 3. Sumiiffiit ukiup ilaani imermik qarsunneqartartut taamaalinerani qimmilivigineqassanngillat

Imm.4. Qimmit qeqertanut nunningunneqarsimasut sikuunerani pitussimaneqassapput.

§ 2. Qimmit qitsuillu arfinillinik qaammateqalereersimasut tamarmik qungaseruteqartinneqassapput allagartalimmik uppernarsaatitut piumasarineqartutut kapitissimanerannut.

§ 3. Illuni qitsuuteqartoqarsinnaavoq illumik piginnittoq akuersissuteqarsimappat. Qitsuuteqarneq pillugu eqqaamiorisat arlaleriarlutik naammangittaalliuuteqarpata, qitsuit tamarmik pilattaanikkut nakorsaatitortitsinikkulluunniit kinguaassiorsinnaajunnaartinneqarnissaat kommunalbestyrelse-mit piumasarineqarsinnaavoq. Tuniniagassanik qitsuuteqarnermut akuersissutip saniatigut kommunalbestyrelse-mit akuersissuteqartariaqarpoq.

§ 4. Kommunemi qimminut inspektøri akisussaavoq qimmeqarfinnut qitsuuteqarfinnullu.

Pineqartoq makkuninnga piginnaatitaaffeqarpoq pisinnaatitaaffeqarlunilu:
1. Qimminik qitsunnillu suliaqarneq maleruaqqusamut matumunnga naapertuuttumik
ingerlanneqassaaq, aammalu qimmiutillip eqqaamiorisallu qimmeqarneq pillugu
assortuussutigisaannik isumaqatigiissitsiniarluni misiliinermi.

2. Qimminik akiuussusersuinermik nakkutilliineq, tamatumunnga inatsisit malillugit.

3. Qimmit tuloriaajarneqartarnerinik nakkutilliineq, tamatumunnga inatsisit malillugit.

4. Qimminik qitsunnillu napparsimasunik ikilinnilluunniit toqutsinermik suliaqarneq.

§ 5. Nunaminertat qimmilivissat tassaapput piffissami aaliangersimasumi nunaminertamik atuinissamut akuersissutit, pineqarsinnaallutillu Nunaminertamik atuinissamut Pilersaarusiornermullu Inatsisartut peqqussutaat malillugu aammalu kommunimut pilersaarummi aalajangersakkat malillugit qinnuteqarnikkut. Qimminut illuaraliornermi ungaluukkiornermilu aamma nunaminertanik atuinerit akuersissutaasussaapput.
Nunaqarfinni Nunaqarfiup Aqutsisui qimminut pituttuivissanik piffissami aaliangersimasumik nunaminertamik atuinissmut akuersissutinik tunniussisuusassapput, illoqarfimmilu qimminik nakkutilliisoq aaliangiisuusassalluni. Nunaminertamik ataavartumik atuisorqarnialertillugu, soorlu sanaartornermi, aqqusinniornermi assingisaannilluunniit ataavartumik toqqavissamik atuisussaasunik pilersitsisoqarniartillugu qimmit qimmilivigineqartumiit peerneqartassapput.

§ 6. Qimmit pitunneqarsimassapput inuinnaat aqqutaanniit aqqusinerniilluunniit illunut aqqutit tamarmik ajornaquteqanngitsumik ingerlaffigineqarsinnaassallutik.

Imm. 2. Qimmit imatut pitunneqarsimassapput aqqusinernut, biilit unittarfiinut,

aqqusineeqqanut, tummeqqanut allanullu pisortatigoortumik tamanit aqqutigineqarsinnaasunut tamatigut minnerpaamik 2 meterinik qanillinerpaangaangamik ungasissuseqartassallutik.

Imm. 3. Qimmit ima pitunneqarsimassapput atuartut anitsiartarfiinut, paaqqinnittarfiit pinnguartarfiinut, inuussutissanik suliffissuit ungaluungaannut ungaluukkanullu allanut imaluunniit ujaqqanik ungaluliinernut qanillinerpaangaangamik tamatigut minnerpaamik 7,5 meterinik ungasissuseqartassallutik.

Imm. 4. Qimmit pitussimaneqartassapput inuup allap illuanut qanillinerpaangaangamik minnerpaamik 7,5 meter-inik ungasitsigisumi, eqqaamiorisaq allakkatigut akuersissuteqarsimanngippat.

§ 7. Pisortat pigisaannut atortuutinut sunulluunniit imaluunniit kikkunnit tamanit

tikinneqarsinnaasunut ingerlatsivinnut qimminik pituttuinissaq inerteqqutaavoq, aammalu qimminik pituttuineq inerteqqutaavoq taaneqartunik aseruisinnaasunngorlugit. Qimmit pituutaat qajannaatsumik aalajangerneqarsimassapput, qimmit pituussaarsinnaajunnaarlugit.

Imm. 2. Qimmit pitunneqarsimassapput minnerpaamik 3 meterinik takitigisunik pituutserlugit, qimmillu pitussimasut akornanni imaluunniit qimmit nuliariit pituutaat isukkaarsimatillugit minnerpaamik 1 meter-imik ungasissuseqassallutik. Qimmit pitussimasut kalunneri ikinnerpaamik ataatsimik qissallannaveeqquteqassapput.

Imm. 3. Qimmiutillip nunaminertat atugassiissutigineqartut ipiittuutillugillu torersuutissavai.

Imm. 4. Qimmivilik piginnittup aqqanik adressianillu erseqqissumik allassimasulimmik allagartalerneqassaaq.

§ 8. Qimmit naartusut sarlialluunniit kiisalu qimmiaqqat inaat imaluunniit taamattoqarpat

ungaluukkat naammattumik qajannaassuseqassapput inituujussallutillu. Ungaluugartaat ima sananeqarsimassapput qimmit nammineerlutik anisinnaajunnaarlugit.

Imm. 2. Qimmit naartusut sarlialluunniit ima pitussimaneqassapput, tamatigut ajornanngitsumik iniminnut isersinnaatillugit.

§ 9. Kommunalbestyrelse-p toqutsittassavai imaluunniit tigusassavai qimmit angalaaginnartut, qimmit qitsuillu pigineqanngitsut kiisalu qimmit qitsuillu unioqqutitsinikkut eqqussat pigineqartullu. Qimmit angalaaginnartut imaluunniit qimmit inuttaqanngitsut imaluunniit qimmit qitsuillu akuerisaanngitsumik pigineqartut toqunneqannginneranni ullunik marlunnik piffissaliisoqartassooq, tamannalu allagarsiinikkut pisassaaq, kommunep allafiani imaluunnit nunaqarfinni allaffinni.

§ 10. Qimmeqarnermut qitsuuteqarnermullu ajoqusiinernut naammagittaalliuutit kommunalbestyrelse-mut ingerlatinneqarsinnaapput. Peqqissaarussinnginnermut tunngasunut naammangittaalliuutissat politiinut ingerlatinneqarsinnaapput.

§ 11. Maleruaqqusap matuma §-iinik unioqqutitsinermi Inatsisartut Inatsisaanni nr. 18-imi, 30.10.1998-imeersumi § 28 Imm. 2 malillugu akiliisitsinermik pillaatissiisoqarsinnaavoq.

Imm. 2. Sakkortuumik imaluunniit arlaleriarluni maleruaqqusami uani §-ini aaliangersakkanik unioqqutitsinermi Inatsisartut Inatsisaanni nr. 18-imi, 30.10.1998-imeersumi § 28 Imm. 4 malillugu uumasuuteqaqqusaajunnaarnermik imaluunniit uumasuutinik attuumassuteqarsinnaajunnaarnermik pillaatissiisoqarsinnaavoq.

§ 12. Qimmeqarneq qitsuuteqarnerlu pillugit ileqqoreqqusaq manna atuutilerpoq ullormiit atortuulersinneqarfimminiit sap.ak. 4 qaangiuppata.

§ 13. Manna tikillugu qimmeqarneq pillugu ileqqoreqqusaq 7.2.1992-imeersoq matumuuna atorunnaarsinneqarpoq ileqqorequsaq una atortussanngortinneqarpat.

§ 14. Ileqqoreqqusaq Kommunalbestyrelsemit akuerineqarpoq ulloq __.__.2004.

______________________________

Jakob Petersen Borgmester

Uummannap Kommuniata Qimmeqarnermut qitsuuteqarnermullu ileqqoreqqusaa . .2004-meersoq Qimmeqarnermut qitsuuteqarnermullu Inatsisartut Inatsisaanni nr. 18-imi, 30. Oktober 1998-imeersumi § 13, imm. 3. Malillugu aaliangersarneqarpoq. Uummannap Kommuniata ileqqoreqqusaa ulloq __.__.2004 atulersinneqarpoq.

Namminersornerullutik Oqartussat, ulloq . .2004

_______________________________
Johan Lund Olsen
Naalakkersuisunut ilaasortaq

Qimmeqarneq qitsuuteqarnerlu pillugit ileqqoreqqusamut oqaaseqaatit:

Ileqqoreqqusami uani aalajangersakkat § 1. Imm. 1, 7. Imm. 2, 7. Imm. 4 aamma 8. Imm. 2 aalajangersarneqarput Namminersornerullutik Oqartussat nalunaarutaanni nr. 7 ulloqartoq 14.juni 1999 kommunit qimmit qitsuillu pillugit ileqqoreqqusaanni, taamaalillunilu allanngortinneqarsinnaanani kommunep ileqqoreqqusaatigut.

Perlerornermut akiuussutissanik kapuineq peqqussutaavoq Namminersornerullutik Oqartussat nalunaarutaanni nr.22 ulloqartoq 17.9.1997 § 14, taannalu innersuunneqarpoq. Inatsisartut inatsisaat nr. 18 ulloqartoq 30.10.98 qimmit qimuttut pillugit kiisalu qimmit qitsuillu pillugit § 9 malillugu qimmit tamarmik 6-nik qaammateqalereersimasut pitussimaneqartussaapput, aammalu qimmit arnavissat.

Inatsimmi tassani aamma § 18-mi pamiunik siutaasalu nuuinik kipisinerit inerteqqutaapput aammalu maskiinat atorlugit allatulluunniit iliorluni qimmit tuloriaannik ajortitsinerit inerteqqutaapput.

Qimmit tuloriaajarneqartarnerat pillugu innersuunneqarpoq landsrådip ileqqoreqqusaa 22.6.1957 § 6-7.

§6-imi Imm. 3-mi “ inuup allap illua”-nik taaneqartoq isumaqarpoq illumik akisussaaffiginnittoq imaluunniit illumik attartortuusoq. Taaneqarneratut allanneqarpoq Nalunaarut 7-imut 14.6.1999-imeersumut naapertuuttuutinniarlugu.

01.01.2004 aallarnerfigalugu Nalunaarut nr. 7, 14.06.1999-imeersoq Qimmeqarnermut Qitsuuteqarnermullu maleruaqqusassat Nalunaarummik nr. 15-imik, 19. Juni 2003-meersumik taarserneqassooq. § 7-imi Imm. 2-mi aaliangersagaq Nalunaarutissaq malillugu ilanngunneqarsimavoq.