|
Upernaviup Kommuniani isumalluutit uumassusillit iluaqutigineqarnissaannut nangitsissutitut 16. aamma 17. februaari 2004-mi soqutiginartumik seminareqareqarpoq. Isumasioqatigiinneq (una tooruk tassani assilisat takujumallugit) komunalbestyrelsimit aaqqissuussaavoq 2003-mi Tulukkap isumasioqatigiissitsineranut pissusissamisoortumik pisariaqartumillu aammalu kommunip Tulukkamut ilaalerneranik malittareqqiinertut. Borgmester Jens Emmanuelsen siuttoralugu kommunalbestyrelsip kissaatigaa pingaaruteqaqisoq tamanna attuumassuteqartut tamarmik sulissutigissagaat, kommunip tamatumuuna periusissaminik pilersaarusiornissaanut siumut isigisumik siunnersuusiornissamut peqataasut tamakkerlutik ilaanissaat siunertaralugu. Taamaattumik isumasioqatigiinnermi ujartorneqarput suulluunniit kommunip attuumassuteqartullu allat sulissutigeqqitassaat, taamaalilluni suliap ingerlanera Tulukkap kingorna unittooqqunagu, akerlianilli sakkortusarneqaqqullugu ingerlaavartunngortinneqaqqullugulu, ilanngullugulu piareersarneqaqqullugu piviusorpalaartunngortinneqaqqullugulu. Inuit 65-it miss. isumasioqatigeeqataapput. Upernaviup illoqarfiani nunaqarfiinilu inuit pingaaruteqartut saniatigut Namminersornerullutik Oqartussanit peqataasoqarpoq. Peqataasut tamarmik tamatumani ajornartorsiutit qulaajarneqarnissaat sukumiisumik pimoorussisumillu sulissutigilluarpaat, pingaartumillu isumalluutit uumassusillit mianerineqarnerisigut siunertap qulakkeerneqarnissaanut ajornartorsiutit suunersut aaqqiiffigineqarnissaat. Isumasioqatigiinnerup ullua ilivitsoq siulleq atorneqarpoq peqataasut isummersuuffiattut ilisimasanillu paarlakaassiffiattut, tassa Namminersornerullutik Oqartussaneersut, kattuffinnit attuumaneqartuneersut, illoqarfimmi aalisakkerivimmeersut il.il. katerisimasunut assigiinngitsorpassuarnik isumassarsiffiusunik qaammarsaataasunillu saqqummiussuimmata, arfanniarneq pillugu inatsisinit nutaanerpaanit Upernaviup eqqaani nalinginnaanngitsunik aalisarnernut, aallaaniarnermik nalunaarummut, tunisinermi akinut allarpassuarnullu tunngasunik. Isumasioqatigiinneq tamakkerlugu naalakkersuisut siulittaasuannit Hans Enoksenimit peqataaffigineqarpoq. Kikkunnut tamanut soqutinarluarpoq qaammaasaqarnarlunilu, oqallittoqarluarpoq apeqqarissaartoqarluarlunilu, apeqquterpassuillu akissutissarsineqarput. Isumasioqatigiinnerup ulluata aappaani siunnerfiuvoq kommunalbestyrelsip periarfissinneqarnissaa suliassat ingerlateqqinnissaannut piviusunik periusiornissaminut. Borgmesterip pingaartillugu taavaa namminneq qanoq iliuusissanik kommunip innuttaasa annertunerpaamik ukkassinissaat, ilimagineqarsinnaanngimmat Namminersornerullutik Oqartussat sunut tamanut aaqqiissuteqartarnissaat. Isumasioqatigiinnerup naammassinerani borgmester Jens Immanuelsenip uppernarsivaa peqataasut assorsuaq suliaqarsimasut, suliallu nanginnissaanut pitsaasorpassuarnik siunnersuuteqartoqarsimasoq. Angusat tulluusimaarutissaalluarput, pineqartullu pingaaruteqarluinnartup suli piorsarnissaanut peqataalluarneq ilippanaateqarluinnartoq. Isumasioqatigiinnermi aaqqissueqataavoq siunnersuisoqatigiiffik Nuna Connector Aps Sisimiuneersoq, ingerlanneqarluni siunnersortimit Søren Lennert Mortensenimit, isumasioqatigiinnerup ingerlanneqarneranut akisussaasumit. KANUKOKA kajumissaarivoq Kommunaldirektør Juliane V. Sørensen imaluunniit siunnersorti Søren Lennert Mortensen nunacon@greennet.gl isumasioqatigiinnermik paasissutissiinerusinnaapput. Søren Lennert Mortensenilu attavigineqarsinnaavoq kommuninit allanit uppernarsaammut Tulukkamut ilanngussimasunit, taamatut isumasioqatigiinnissanut pilersaarusiornissamik ingerlatsinissamillu, isumalluutillu uumassusillit attanneqarsinnaasumik iluaqutigineqarnissaannik kissaateqartunit.
|
/Nuna_Connector_logo.jpg){kind=logo}