Tunuliaqutaa siunertaalu

Tulukkamik taallugu paasisitsiniaaneq tassaavoq Namminersornerullutik Oqartussanit aallartinneqartoq. Siunertaavoq pisuussutit uumassusillit piujuartitsinissaq tunngavigalugu iluaqutiginiarneqarnissaannut ilisimasanik ingerlatitseqqittarnissaq paaseqatigiinnerunissarlu.

Pisuussutinik uumassusilinnik piujuartitsisumik iluaqutiginninniarneq inuiaqatigiit ataatsimut isigalugit suliassaqarfiuvoq pingaaruteqartoq, minnerunngitsumik kommuninut. Kommunit arlaleriarlutik apeqqutinut pisuussutinut uumassusilinnut tunngatillugu annertunerusumik akissussaaqaataanissamik kissaateqartarsimapput. Tulukkamik taallugu paasisitsiniaanermi pingaartuuvoq piujuartitsinissaq tunngavigalugu iluaquteqarniarnerup najukkani tunngavissiuunneqarnissaa. Ilaatigut tamatumunnga pissutaavoq taamaaliornikkut inuiaqatigiinni inunnut amerlanernut piujuartitsisumik iluaquteqarniarnissap anguniagaaneranut akisussaanerup siammarterneqarnissaa, ilaatigullu kommunit innuttaasunut qaninnerummata taamaalillutillu innuttaasut peqataatinneqarnerunissaannut periarfissaqarnerummata. Tamanna tunngavigalugu Tulugaq pillugu allagaqaat pineqartoq suliarisimavarput.

Tunuliaqutaa

Nunani allani arlalinni piujuartitsinissaq tunngavigalugu ineriartortitsinermik sulissuteqarfiusuni ilisimaneqalersimavoq, innuttaasut piujuartitsinermik tunngaveqarluni inooriaaseqalissappata aamma innuttaasut inuiaqatigiinni apeqqutinut pingaaruteqartunik peqataanerussappata piumasaqaateqartussaasoq arlalinnik. Ilaatigut tassaapput:

• Akuutitsinissaq aalajangeeqataanissarlu: Innuttaasut ajornartorsiutit suunerat namminnerlu isumaqataaffiginninnertik naapertorlugu aaqqiissutissat pingaaruteqartut tunngavilersornissaat peqataaffigissavaat. Taamaaliornermikkut ajornartorsiutit aaqqinneqarnissaannut akisussaanertik misigissavaat. Ilaatigut taamatut pisoqartarpoq Tulukkami paaseqatigiiffiunerusumik ataatsimiinnerni.
• Kommunalbestyrelse siuttuussaaq: Innuttaasunut pingaaruteqartumik takkorliunneruvoq kommunalbestyrelsip oqaatsitigut iliuuseqarnermigullu piujuartitsinissamik tunngaveqarluni iluaquteqarniarnerup pimoorunneqarnissaa innuttaasullu siunnersuutaat iliuusaallu isumaqataaffigissallugit.
• Iluaqutissartaqartariaqarpoq: Innuttaasut ileqqulersuutaasa allanngortinneqarnissaannut kajumilersitsinissami pingaaruteqartuuvoq, ileqqulersuutaannik allannguinerup iluaqutissartaqarnera. Taakkua tassaasinnaapput aningaasarsiornikkut, inuuniarnikkut, kulturikkut allatigulluunniit iluaqusersuutissat.
• Iliuuseqarnissamut periarfissaqassaaq: Innuttaasut ileqqulersortarnerisa piujuartitsinermik tunngaveqannginnerat qitiusuniit uparuartuiffigissallugu naammanngilaq. Pingaartuuvoq tamatumunnga peqatigitillugu inuit ataasiakkaat iliuuseqarnissaannut periarfissinneqarnissaat. Taamaaliortoqanngippat paatsiveerunneqaliinnassaaq. Pingaartuuvoq innuttaasut ulluinnarni inuuneranni allaanerusunik iliuuseqarnissaannut periarfissinneqarnissaat. Assersuutigalugu taakkua tassaasinnaapput killilersuisoqalernerani aningaasanik isertitassanik piniarnissanillu allanik periarfissinneqarnissaat imaluunniit assersuutigalugu najukkani piujuartitsinissaq tunngavigalugu iluaquteqarniarneq pillugu oqallinnernut sammisaqartitsinernulluunniit aaqqiissutissanik ilapittueqataatinneqarnissaat. Innuttaasut iliuuseqarnissamut periarfissinnerisigut ajornartorsiutinut ilanngutiinnarnagit aaqqiissuteqarnissamulli aamma periarfissinneqarnerat pingaaruteqarpoq.
• Attaveqaateqarneq pitsaavoq: Najukkani attaveqaateqarneq soqutigisaqaqatigiit susassaqartut ilaatigut imminnut paaseqatigiinnissaannik isummaminnillu ilisimasaqaqatigiilernissaannik ilaatigullu kommunimut attaveqarnissamut periarfissiisinnaavoq. Attaveqatigiinnerup isummiussat paaseqatigiissutiginissaannik annerusumik pilersitsisinnavoq taamaalillunilu aalajangiinernik ataqqinninnerulersitsisinnaalluni. Akuutitsinissaq qularnaarneqarpat aalajangersakkanik akisussaaqataalersitsisoqarsinnaavoq. Assersuutigalugu attaveqaateqarneq tassaasinnaavoq kommuuni siunnersuisoqatigiinnik suleqatigiissitalianilluunniit piujuartitsinissaq tunngavigalugu iluaquteqarniarnermik suliaqartussanik pilersitsippat. Assersuutigalugu siunnersuisoqatigiit pisuussutit uumassusillit iluaqutiginiarneqarnerisa aqunneqarnissaannut tunngatillugu kommunip suliassaanut kiisalu pisuussutit uumassusillit pillugit inatsisinik tusarniaassutiginninnermut tunngatillugu katersuutsinneqarsinnaapput isumasiorneqarlutillu.

Tulugaq pillugu allagaqaatissamik suliaqarnikkut kommunip innuttani imaattunik pisussaaffeqartilersinnaavai:

• Aaqqiissutissanik sunniuteqaqataaneq akisussaaqataanerlu
• Tulugaq pillugu allagaqaatissami ingerlatat aqqutigalugit iliuuseqarnissamut periarfissiineq
• Kommunimi paaseqatigiiffiunerusumik ataatsimiinnermi aaqqiissutissatut nammineq siunnersuutigisanik suliaqaqqinnissamut periarfissiineq
• Paaseqatigiinniarnerup ingerlaannarnissaanut periarfissiineq attaveqaatinillu nutaanik pilersitsineq

Siunertaa

Tulugaq pillugu allagaqaatip siunertaraa piujuartitsinissaq tunngavigalugu iluaquteqarniarnermi kommunit pimoorussillutik suliaqarnissamik kissaatigisaqartut inuiaqatigiinnut, nunarsuarmiunut kommuninullu allanut suliamut tassunga tapersiillutik ingerlatanillu erseqqissunik naammassisaqarnissaminnik takussutissiinissamut periarfissinneqarnissaat.

Taamatut isumaqataaffiginninneq kommunimut imaattunik iluaqutissartaqarpoq:

• Kommunip siuttuunerminik takutitsinissaa: Tulugaq pillugu allagaqaammut ilanngunnikkut kommunip innuttani, inuiaqatigiit nunallu allat pineqartup pingaaruteqartuunera iliuusissanillu aallartitsinissani takutissavai. Kommunittaaq takutissavaa, ajornartorsiutinut aaqqiissutissanullu akisussaaqataanini.
• Allagaqaat isiginialersitsissaaq iliuusissanillu pilersaarusiortitsilerluni: Allagaqaammut pisussaaffeqalernikkut kommunalbestyrelse aqutsisoqarfillu pineqartumut isiginninnialissapput iliuusissallu ingerlanneqartussat erseqqissuliuutigilerlugit. Taamaaliornikkut iliuusissatut pilersaaruteqartoqalissaaq.
• Allagaqaatip paaseqatigiinnissaq qularnaassavaa: Allagaqaatip iliuuseritinniagai ingerlanneqalerpata, kommunalbestyrelse pineqartoq pillugu innuttaasunik qanimut paaseqatigiissitsinissaa qularnaarneqassaaq.
• Allagaqaat iliuusissanik sunniissinnaavoq: Kommunit allagaqaammik atsiugaqartut attaveqaatinik pilersitsisinnaapput, pineqartoq pillugu isumassarsianik misilittakkanillu paarlaateqatigiiffigisinnaasaminnik. Attaveqaatikkut susassaqartunik naapeqatigiissitsisoqalissaaq, kommunip nammineerluni pineqartumik isumaginninneranut sanilliullugu inuiaqatigiinnut naammassisaqarnerulersitsisussamik.

Allagaqaat atsiorneqareerpat

Kommunalbestyrelse allagaqaammik atsiuinissaminik akuersippat imatut pisoqassaaq:

• Atsiuineq tamanut tusarliunneqassaaq allagaqaatip Tulukkap aamma KANUKOKA-p nittartagaanut immiunneqarneratigut, taamaalilluni peqataalerneq inuiaqatigiinnut tamanut takuneqarsinnaasunngorlugu. Tusagassiorfinnut nalunaaruteqartoqassaaq.
• Attaveqaatit pilersinneqassapput: Kommunit allagaqaammut ilanngunneqarsimasut KANUKOKA-p nittartagaatigut attaveqaatinut ilanngunneqassapput, tassuunakkut isumassarsianik misilittakkanillu paarlaateqatigiittoqalersinnaalersillugu.
• Ukiumoortumik killiffimmik naliliisarnermillu suliaqartarnissaq siunnersuutigineqarpoq: Kommune ukiumut ataasiarluni (assersuutigalugu KANUKOKA-p sinniisaasa ataatsimiilinnginneranni) allagaqaammi allassimasutut iliuuserineqartut pillugit suliaqarnissamut taakkualu nalilerneqartarnissaannik kajumissaarneqarpoq. Killiffimmik nalunaarusiaq taanna KANUKOKA-p nittartagaanut immiunneqarsinnaassaaq. Sinniisuutitat ataatsimiinneranni KANUKOKA-p siulittaasuata nittartakkami allassimasut najoqqutaralugit Tulugaq pillugu allagaqaammik suliaqarneq nalunaarumminut ilannguttassavai.
• Siunertat iliuusissatullu pilersaarutit nutaat isumaqatigiissutigineqarsinnaapput: Kommunit ukiumoortumik killiffimmik nalunaarusiornerminnut atatillugu misilittakkanik paarlaateqatigiittarneq tunngavigalugu ataatsimoorlutik iliuusissatut pilersaarutinik siunertanik sammisassanillu nutaanik suliaqartarsinnaapput. Iliuusissatut pilersaarutit isumaqatigiissutillu nutaat kommuninut allanut kajumissuseqalersitsisussatut KANUKOKA-p nittartagaanut immiunneqarsinnaapput.