Iliuusissanik isumassarsiorfik

· Oqallitsitsinerit: Ataatsimiititsillusi oqallitsitsigitsi imaluunniit ataatsimiititseqattaaritsi assersuutigalugu paaseqatigiiffiunerusumik ataatsimiinnermi aaqqiissutissatut siunnersuutit oqallisigalugit imaluunniit Tulukkap paasisitsiniaanermi quppersagaaqqamit ”Apeqqutit najugarisani oqallisissat” oqallisigitillugit. Kommunilli innuttaasunit siunnersuutit ersarissut iliuuseqarfigineqarnissaat isumagissavai.

· Suleqatigiissitaliat: Suleqatigiissitaliamik ataatsimik arlalinnilluunniit pilersitsigitsi, paaseqatigiiffiunerusumik ataatsimiinnermi aaqqiissutissatut siunnersuutit timitalerneqarnissaannik suliaqartussanik.

· Unnukkut atuarfiit: Piniartoq, ilinniartitsisoq piniarnermillu nakkutilliisoq ilinniartitsisoralugit pisuussutit uumassusillit pillugit unnukkut atuartitsinernik aaqqissuussigitsi. Pisariaqarpat Tulukkami quppersagaaqqat Tulukkallu nittartagaani uumasut pillugit paasissutissat (www.nanoq.gl/tulugaq) aammalu Namminersornerullutik Oqartussat nittartagaanni pisuussutit uumassusillit pillugit inatsiseqartitsinerit (www.nanoq.gl/piniarneq) tunngavigalugit.

· Atuarfinni sap. akunnera sammisaqarfiusoq: Piniartut, utoqqaat arnallu peqatigiiffii, piniarnermik nakkutilliisoq aamma inuussutissarsiornermik siunnersorti pisariaqarpallu katersugaasiviup pisortaa ilinniartitsisoralugit atuarfinni sap. akunneranik sammisaqarfiusumik aaqqissuussigitsi. Sap. akunnera sammisaqarfiusoq piniartut ilagalugit pinngortitamut pisuttuarnermik ilaqartinneqarsinnaavoq. Atortussat Inerisaavimmit Tulukkallu quppersagaani nittartagaanilu pissarsiarineqarsinnaapput.

· Ulloq ataaseq saliisitsigitsi: Ukiumoortumik ulloq ataaseq saliisitsigitsi, tamatumani atuartut, peqatigiiffiit, suliffeqarfiit innuttaasullu illoqarfimmi/nunaqarfimmi peqatigalugit eqqakkanik katersuitillugit. Saliisunut eqqakkanik kiilunngorlugit oqimaannerpaanik katersuisunut akissarsisitsigitsi.

· Pisuussutit uumassusillit pillugit ullormik paasisitsiniaanermik aaqqissuussigitsi: Ullormik paasisitsiniaanermik aaqqissuussigitsi, assersuutigalugu aalajangersimasunik pinialernernut atatillugu. Arfininngornerup ullaatungaani Brugsenip Pisiffiulluunniit eqqaani innuttaasut amerlasuut ornittagaanni Tulukkap quppersagaaraanik, pineqartumut inatsisinik atortussanillu tassunga tunngassuteqartunik tunniussuigitsi. Piniarnermik nakkutilliisoq inuussutissarsiornermilu siunnersorti peqataatissigik, taamaaliornikkut innuttaasut aallaaniarneq piniarnerlu pillugit apeqqutinik akissuteqarsinnaatillugit.

Pisarisimasanik nalunaarsuutit eqqortuunissaat peqataaffigiuk:
Ingerlatsivinnut biologillu siunnersuisarnerannut pingaaruteqarluinnarpoq Piniarneq-mut pisarisimasanik nalunaarsuutit tamakkiisuunissaat eqqortuunissaallu. Kommune tamatumunnga ilapittuisinnaavoq KNAPK-mi TPAK-milu ilaasortat ”Piniarneq pillugu ulloqartitsinermigut”, tamatumani piniartut Piniarneq-rup eqqortumik immersorneqarnissaanut piniarnermik nakkutilliisumit inuussutissarsiornermillu siunnersortimit katersuutitillugit ilitsersorneqassallutik. Peqatigitillugu inatsit nutaanerpaaq misissuataartinneqassaaq tunniunneqarlunilu.

· Kommunimi pisuussutit uumassusillit takussutissaliorsigik: Kommune suleqatigiissitalianik pilersitsisinnaavoq, kommunimi pisuussutit uumassusillit qanoq amerlatigineri pillugit paasissutissanik katersuisussanik allattuisussanillu. Tamatuma kommunimi pineqartumi pisuussutit uumassusillit qanoq annertutiginerannik kommune, piniartut, innuttaasut Pinngortitaleriffillu takussutissaqartilissavai.