Siunnersuisoqatigiinnut suliassiissutissaq

Siunnersuisartut suliassaat

Piujuartitsinissaq tunngavigalugu iluaquteqarniarnermut siunnersuisartut Kommunalbestyrelsimut siunnersuisartuupput apeqqutini atuinermut, aqutsinermut kiisalu isumalluutit uumassusilit illersorneqarnerannut tunngasuni.

Siunnersuisartut apeqqutit suliarisassavaat kommunalbestyrelsimit kissaatigineqaraangat siunnersuisartut oqaaseqarfiginninnissaannik makku pillugit:

• Piniagassanut aalajangersimasunut pisassiissutinik kommunip nammineq iluani inatsisit atuuttut naapertorlugit agguaanermi.
• Nutaamik inatsisiliassatut siunnersuusiortoqarnerani tusarniuteqarnermi, Namminersornerullutik Oqartussaniit nassiussamik imaluunniit kommunimi ileqqoreqqusaliornermi.
• Nammineq najugarisami apeqqutini atuinermut, aqutsinermut kiisalu isumalluutit uumassusilit illersorneqarnerannut tunngasuni.

Siunnersuisartut aamma namminneerlutik suliassanik aallartitsisinnaapput. Soorlu assersuutigalugu makkuusinnaallutik:

• Kommunalbestyrelsimut siunnersuuteqarneq suliassiissutinik aalajangersimasunik imaluunniit susassaqartitsiniutinik kommunimi piujuartitsinissaq tunngavigalugu iluaquteqarniarnermut sammisunik.
• Siunnersuuteqarneq saaffiginneqqusilluni Namminesornerullutik Oqartussanut imaluunniit qitiusumi oqartussaasunut allanut suliassat aalajangersimasut pillugit imaluunniit inatsimmut nutaamut tunngasinnaallutik.

Siunnersuisartuni ilaasortaq kinaluunniit siunnersuisartut suliassaannik siunnersuuteqarsinnaavoq.

Siunnersuisartut sapinngisamik isumaqatigiissuteqarnissartik anguniartassavaat kommunalbestyrelsimut innersuussuteqalernerminni. Tamanna ajornassappat taava nalinginnaasumik taasisitsinermi amerlanerussuteqartut isumaat malinneqassaaq.

Siunnersuisartut katitigaanerat

Siunnersuisartut kommunalbestyrelsimit pilersinneqartassapput qinigaaffimmi ataatsimi atuuttussatut.

Siunnersuisartut katitigaanermikkut sapinngisamik amerlasuunit tunuliaqutaqartinneqassapput.

Siunnersuisartut iluminni namminneq siulittaasussartik toqqartassavaat kiisalu tullersortissaa aamma taamatut qinerneqarsinnaalluni. Siulittaasoq taassumalu tullersortaa ukioq ataaseq atuuttussamik qinerneqartassapput.

Allatseqarfeqarneq ataatsimiiffissallu piffissalersorneqarneri

Kommunimi inuutissarsiuteqarnermut immikkoortortaqarfik siunnersuisartunut allatseqarfittut atuutissaaq, tassalu ataatsimiigiaqqusilluni aggersaasartutut kiisalu ataatsimiinnerit imaqarniliorneqarnerini.

Siunnersuisartut ataatsimiittassapput kommunalbestyrelsip pisariaqarsorinninnera naapertorlugu, taamaattorli minnerpaamik ukiumut ataasiarlutik ataatsimiittassapput.

Ilaasortat tamarmik namminneq piumassusertik atorlugu peqatigiiffittik imaluunniit suliniaqatigiiffitsik sinniisuuffigalugu peqataassapput. Ataatsimiinnerni peqataanerni aningaasarsiassaqartitsisoqanngilaq imaluunniit ullormusiassaqartitsisoqarani.

Suliassiissummut atatillugu oqaatigiumasat:

Siunnersuisartut suliassaat pillugit:

Kommunalbestyrelsi pisussaatitaanngilaq siunnersuisartut unnersuussutaannut pinngitsoorani malinnittussaatitaasutut.

Kommunalbestyrelsimit piumaffiginninneq tunngavigalugu siunnersuisartut suliarisinnaasaasa makku ilagisinnaavaat:

Nammineq najugarisami apeqqutini atuinermut, aqutsinermut kiisalu isumalluutit uumassusilit illersorneqarnerannut tunngasuni assersuutigineqarsinnaapput piniagassanut aalajangersimasunut eqqissisimatitsiniarnerit imaluunniit nunaminertanik, piniagassanut aalajangersimasunut piniutit aalajangersimasut atorneqarnissaannut imaluunniit piniagassanik aalajangersimasunik killilersuinerit inatsisit atuuttut iluini. Siunnersuisartut apeqqutit suliarisinnaasaat aamma eqqagassalerinermut tunngasuusinnaapput.

Siunnersuisartut sammisassatut imminnit ingerlassinnaasaat soorlu makkuusinnaapput:

Siunnersuuteqarneq susassaqartitsiniutinik kommunimi piujuartitsinissaq tunngavigalugu iluaquteqarniarnermut sammisunik, siunnersuuteqarneq piniagassanut aalajangersimasunut eqqissisimatitsiniarnerit imaluunniit nunaminertanik, piniagassanut aalajangersimasunut piniutit aalajangersimasut atorneqarnissaannut imaluunniit piniagassanik aalajangersimasunik killilersuinerit inatsisit atuuttut iluini. Siunnersuisartut apeqqutit suliarisinnaasaat aamma eqqagassalerinermut tunngasuusinnaapput.

Siunnersuuteqarneq saaffiginneqqusilluni Namminesornerullutik Oqartussanut imaluunniit qitiusumi oqartussaasunut allanut suliassat aalajangersimasut pillugit tassaasinnaapput assersuutigalugu inatsimmik nutaamik pilersitsinissamik siunnersuuteqarneq, Kommunit Kattuffiannut saaffiginnissuteqarneq tassaasinnaavoq kommunit sinnerlugit apeqqummik ingerlatitseqqerusunnermik kissaateqarneq, Nunatsinni Pinngortitaleriffimmut saaffiginissuteqarneq suliamut aalajangersimasumut atatillugu il.il.

Katitigaanerat pillugu:

Siunnersuisartut katitigaanermikkut sapinngisamik amerlasuunit tunuliaqutaqartinneqassaannut siunertaavoq qulakkeerniassallugu kommunimi innuttaasut sapinngisamik amerlanerpaat siunnersuisartuni sinniiseqartinneqarnissaat. Sinniisit soqutigisaqaqatigiinnit kommunimi soqtutiginnittunit sapinngisamik tamanit tunuliaquteqartut peqataanissaannut aggersarneqassapput, assersuutigalugu makkuninngaaneersuusinnaallutik; inuutissarsiutigalugu piniartut peqatigiiffianiit, saniatigooralugu piniartartut peqatigiiffianiit, takornariartitsinermut peqatigiiffimmiit, umiatsiaararsortuneersut, qimussersartuneersut, utoqqaat peqatigiiffianeersut, arnat peqatigiiffianeersut, inuusuttut sinniisaat, aturfiit/ilinniagaqarfiit, atuisartut siunnersortaanniit kiisalu suliffeqarfiit attuumassuteqarsinnaasut.