|
Ataatsimiinnerni piujuaannartitsineq tunngavigalugu pisuussutinik uumassusilinnik iluaquteqarniarnissaq pillugu innuttaasut sumiiffinni suliniutissatut siunnersuutinik isummiussanillu arlalinnik namminneq aallartissinnaasaminnik saqqummiussaqarput. - Sisimiuni sinerissap eqqaani piujuaannartitsineq tunngavigalugu aalisartarnissamut iliuusissatut pilersaarusiortoqassaaq. Siunnersuutit ilaat taamaattoq innuttaasut Tulukkamik taaguuserlugu paasisitsiniaanermi Sisimiuni oqallitsitsinermi saqqummiunneqarpoq. Tulukkamik taaguuserlugu paasisitsiniaasut Maniitsup Sisimiullu kommunii ulluni 3.-12. novembarimi tikeraarpaat. Oqallikkumasoqarluartoq apeqqutissaqarluartorlu Tulugaq Maniitsumi Sisimiunilu kommunalbestyrelsinik isumasioqatigiissitsivoq, KNAPP-mik, TPAK-mik soqutigisaqaqatigiinnillu allanik isumasioqatigiissitsilluni, innuttaasunik ataatsimiititsilluni kiisalu ataatsimoortitsilluni oqaloqatiginnitsitsilluni. Paasisitsiniaallutik angalasut kommunini taakkunani marlunni soqutigineqarluarlutik pimoorussilluartumillu ilassineqarput.
- Tulukkamik taaguuserlugu paasisitsiniaanerup aallartinneqarnera iluarinarluinnarpoq, piujuaannartitsinermi tunngavigalugu eqqarsartalersissimavaatigut, taama oqarpoq KNAPP-p siulittaasua, Johannes Rosing, Maniitsumi soqutigisaqaqatigiinnik isumasioqatigiissitsinermi. Innuttaasunut, pisortaqarfinniillumi, paasisitsiniaaneq iluaqutaavoq. Pisuussutit uumassusillit pillugit sukumiinerusumik ilisimasaqartariaqarpugut, aamma namminersulernissamut pimoorussineq eqqarsaatigalugu, namminersulernissamimi pisuussutit uumassusillit tunngaviusussaapput, taama oqarpoq Gerth Lyberth, kommunalbestyrelsip isumasioqatigiissinneqarnerani. Innuttaasut ataatsimiitinneqarneranni innuttaasut 60-70-it peqataapput, imalu apeqqutissaqartoqartigaaq, ataatsimiinnerit tamangajammik akunnerni sisamani tallimanilu sivisussuseqartarlutik. Angalaartitat, Pinngortitaleriffimmeersut, Aalisarnermut Piniarnermullu Pisortaqarfimmeersut, Avatangiisinut Pinngortitamullu Pisortaqarfimmeersut Maniitsumiillu Greenland Tourismimiit kiisalu Tulukkamik taallugu paasisitsiniaasuneersunit Tine Parsimit aamma Jonna Odgaardimit peqataaffigineqartoq siunnersuutinik isummiussanillu arlalissuarnik angerlaassaqarput. Paasisitsiniaaneq kommunini pituttugaassaaq Suliniutip ingerlanneqarnerata sinnerani paasisitsiniaanermi pingaarnerpaatinneqassaaq paasisitsiniaanerup najukkani pituttugaanissaa, taamaalilluni paasisitsiniaaneq unitsinneqarpat kommunit innuttaasullu paasisitsiniaanerup sammisaanik anguniagaanillu nangitsiniassammata. Taamaattumik paasisitsiniaasut ”Tulugaq pillugu Allagaqaammik” taasamik suliaqarsimapput. Allagaqaat piujuaannartitsineq tunngavigalugu iluaquteqarniarnissaq pillugu suliniutinik ingerlatassanillu arlalinnik siunnersuutitaqarpoq, kommunit allagaammik atsiuisussat ingerlatissallugit pisussaaffigisassaannik. Maniitsumi Sisimiunilu borgmesterit siullersaallutik allagaqaammik saqqummiussivigineqarput, suliniummullu taakkua marluk ilassinnilluarput. Allagaqaat maanna kommunalbestyrelsini taakkunani marlunni oqaluuserineqassaaq. Kommunini taakkunani marlunni pasisitsiniaanerup sammisaanik najukkani nangitseqqinnissamut piumassuseqarluarneq tupigusuutigaarput. Tamatuma ersersippaa, paasisitsiniaanerup suliniutit aallaqqaammulli neriuutigisimasavut aallartitissimagai, taama oqarpoq paasisitsiniaanermi pisortaq Tine Pars. Paasissutissat sukumiinerusut: Paasisitsiniaanermi pisortaq Tine Pars, tlf. mobil 557 557. Angalanermi assit Tulukkap nittartagaani tusagassiorfinnut assitassatigut ullualuit ingerlaneranni immiussuunneqarumaarput. |
