Maniitsoq Tulugaq-dokumentimut tapersiivoq

Kommunalbestyrelsip sulissutiginiarpai:

• Kommunip pilersaarusiortagaanut isumalluutit uumassusillit piujuartitsinermik tunngaveqarluni iluaqutigineqarnissaat anguniagassatut ilanngunneqassasoq anguniagaasorlu ukiut tamaasa iluarsiivigineqartassasoq.
• Kommunimi pilersinneqassasoq suleqatigiiffik/tunuliaqutsersorfik siunnersortitut atorneqartussaq, soorlu ”Piujuartitsinermik tunngaveqarluni isumalluutit uumassusillit iluaqutigineqarnissaannut siunnersuisoqatigiit”, tassani sinniiseqartinneqassallutik soqutigisaqaqatigiit soqutiginnittut tamarmik. Siunnersuisoqatigiit tunngavissaattut suliassiissummik suliarinnittoqassaaq.
• Oqaloqatigiisitsilluni ataatsimiisitsinermi innuttaasunit siunnersuutigineqartunit ataatsimik arlalinnilluunniit ingerlatitseqqinneq / imaluunniit ukiumut ataasiarluni innuttaasunut aaqqissuussaqartarneq piujuartitsinermik tunngaveqarluni iluaqutiginninnermut tunngasunik.
• Meeqqanut ukiumut ataasiarluni isumalluutit uumassusillit taakkunanngalu aqutsineq pillugit sapaatip akunnera sammisaqartillugit ingerlataqartarnissaq.
• Ukiumoortumik soqutigisaqaqatigiiffinnik ullormut pikkorissartitsisarneq, sammitinneqartarlutik isumalluutit uumassusillit iluaqutigineqarnerannut inatsisit nutaat atuutereersullu pillugit ilinniartitsissutigineqarlutik.

Maniitsup Kommunia kommunini siullerpaavoq Tulugaq pillugu allagaqaammut atsiortoq. Siunertaavoq, kommunit atsiortut imminnut attaveqartarnissaat tunuliaqutsersorfissamittut ikioqatigiinnermikkullu isumassarsioqatigiiffigisinnaasaminnik, qarasaasiallu atorlugit atassuteqaqatigiittarfissamik pilersitsisoqassaaq KANUKOKA’p nittartagaa atorlugu.

KANUKOKA’p siulittaasuata siunissami nassuiaatigisassavaa kommunit atassuteqaqatigiittarfimmi ilaasut takussutissiivimmi suliassiissutaasutigut sumut killissimaneri pillugit, tamannalu ilannguttassavaa kattuffiup ataatsimeersuarnerani nalunaaruteqarnermini.

Maniitsumi Sisimiunilu Kommunalbestyrelsit siullersaapput allagaqaammik saqqummiivigineqartut. Takussutissiivittaaq aamma Upernaviup Uummannallu Kommuninut nassiunneqarpoq kaammattuutigineqarlunilu allagaqaammik tapersiinissaq eqqartuiffigissagaat, taamatullu Tulukkap Paamiunut Qaqortumullu paasisitsiniaajartornerani allagaqaat nassarneqassaaq, paasisitsiniaaqatigiit januar 2004-mi kommunit taakku marluk tikeraarpatigit.

Paasisitsiniaanermik aqutsisoq Tine Pars oqarpoq:

- Nuannaarutigaara Maniitsumi kommunalbestyrelsi tamarmiusoq piujuartitsinermik tunngaveqarluni isumalluutit uumassusillit iluaqutiginissaannut suliniuteqarnermik tapersersuimmat. Pingaartorujussuuvoq, paasisitsiniaanerup sumiiffinni ataasiakkaani nammineerluni suliniutinik ingerlatitseqqiffiusarnissaa.

Annertunerusumik paasisaqarusukkuit taava takuuk Tulukkap takussutissiivia uani www.nanoq.gl/tulugaq aamma/imaluunniit attaveqarfigiuk Maniitsumi borgmesteri Siverth Heilmann oqarasuaat 81 78 00/52 16 53 imaluunniit attaveqarfigiuk paasisitsiniaanermik aqutsisoq Tine Pars uunga mobil 557 557.