|
Kommunini arfinilinni Kommunalbestyrelsit maanna pisussaaffilersimapput oqallinnermik ingerlatitseqqinnissamut aammalu piujuartitsinissaq tunngavigalugu isumalluutinik uumassusilinnik iluaquteqarniarnermik kommunerisami suliamik nangitsinissamik Tulugaq pillugu allagaqaammut atsiornermikkut. Qulaani pineqartut saniasigut Maniitsup aamma Upernaviup kommunii siusinnerusukkut allagaqaammut atsioreerput. Suliniutit tallimat naammassineqassapput Atsiornermi kommunit pisussaaffilerput suliniutit tallimat makkuusut naammassineqarnissaannut:
· Piujuartitsinissaq tunngavigalugu isumalluutinik uumassusilinnik iluaquteqarniarneq pillugu anguniakkat kommunimut pilersaarummut ilanngunneqarnissaat ukiullu tamaasa anguniakkat iluarsiivigineqartarnissaat. Kommuneqarfik Upernavik maannamut suliniutinik arlalinnik naammassinnereerpoq, massakkullu piujuartitsinissaq tunngavigalugu iluaquteqarniarnermi siunnersuisooqatigiit pilersikkaluttuarlugit. Kommunit suli amerlanerusut ilanngutissapput Paasisitsiniaaqatigiit kommuninut tikeraartarnerminnut atatillugu Tulugaq pillugu allagaqaat aammattaaq Sisimiut, Ilulissat aamma Nuup kommuniisa borgmesteriinut tunniuttarpaat, allagaqaammut ilanngunnissaannik kaammattuutitalimmik. Ataatsimut isigalugu borgmesterit ajunngitsumik isumaqarfiginnittarput, oqaaseqartarlutillu naatsorsuutigigitsik ilanngunnissaq kommunalbestyrelsimit tapersersorneqarumaartoq. KANUKOKA, kommunit kattuffiat, Tulugaq pillugu allagaqaammik tapersersuivoq. KANUKOKA’p siulittaasuata kattuffimmi aallartitaasut ataatsimiisinneqarnerini ukiut tamaasa nalunaarusiamini naliliissutigisarniarpaa, kommunit sumut killissimanerinik allagaqaammi pisussaaffiliissutini. Kommunit sinneri, paasisitsiniaaqatigiit tikinngitsuugaat, allagaqaammik nassitsivigineqassapput ilanngunnissaannut kaammattuutitalimmik. Tamatuma saniatigut Tine Pars Kangerlussuarmi nunaqarfiit pillugit martsimi ataatsimeersuarnermi paasisitsiniaaneq pillugu saqqummiussaqarnermini nunaqarfimmiut kaammattorpai, suliamut peqataaqqullugit Tulugaq pillugu allagaqaat immikkut nunaqarfinnut naleqqussagaq aqqutigalugu. Allagaqaammut taamaattumut siunnersuut KANUNUPE’p siulersuisuinut nassiunneqassaaq siunnersuummut isummerfiginninnissaq isumagalugu. Paasisitsiniaanermik aqutsisoq Tine Pars nuannaarutiginnippoq, kommunit allagaqaammut ilannguttartut amerliartortuinnarmata: - Siunissamut tamanna assut neriunarpoq piujuartitsinissarlu tunngavigalugu iluaquteqarniarnermi suliamik ingerlatseqqinnissamut, kommunit taama amerlatigisut KANUKOKA-llu allagaqaammut tapersiinerisigut. Isumaqarpugut, paasisitsiniaanerup ingerlateqqinnissaa pitsaanerpaasoq nammineq najugarisami suliniuteqarnertigut sammisassaqartitsinertigullu ingerlanneqarnermigut. Taamalu siullertut anguneqassalluni piujuartitsinissaq tunngavigalugu iluaquteqarniarneq pillugu akisussaassuseq inuiaqatigiinni amerlanerpaanut siaruarneqassalluni, aappaatullu sulineq innuttaasunut qaninniararsuanngussalluni, taamalu aamma annertunerusumik periarfissiissalluni suliamut pimoorussinerunissamut piujuartitsinissaq tunngavigalugu iluaquteqarniarnerup qulakkeerneqarnissaani. Paasissutissat amerlanerusut ukunani pineqarsinnaapput: Paasisitsiniaanermik aqutsisoq Tine Pars, mobil 557 557 Borgmesteri Lars Sørensen, Paamiut, tlf. 68 12 77 Borgmesteri Tommy Marø, Qaqortoq, tlf. 64 22 77 Borgmesteri Jakob Petersen, Uummannaq, tlf. 54 91 60 Borgmester Lars Karl Jensen, Qeqertarsuaq, tlf. 92 12 02/92 17 50 Tulugaq pillugu allagaqaammut paasissutissat amerlanerusut uani takukkit: www.nanoq.gl/tulugaq Tulugaq pillugu allagaqaammik Paamiuni aamma Qaqortumi borgmesterinut tunniussinermit assit takuneqarsinnaapput Tulukkap alakkartagaani uuma ataani Assit/ Paamiut aamma Qaqortoq. |
