Sammisap siunertarisimavai

• kalaallini illuni radonip ajornartorsiutaanera pillugu nassuiaanissaq,
• illumi aalajangersimasumi radonip annertussuserisaa illup inissisimanera sananeqaataalu tunuliaqutaralugit missiliorneqarsinnaaneranik nassuiaaneq,
• Kalaallit Nunaanni illuni pioreersuni nutaatullu illuliani radonip annertussusaata annikillisarnissaanut iliuuserisassanut pisariaqartitsinerit pillugit innersuussuteqarnissaq.

 Siusinnerusukkut kalaallini illuni radoneqarneranik annertunerusunik misissuisoqarsimanngilaq. Taamaattumik Kalaallit Nunaanni radonip ajornartorsiutaanera nassuiarniarlugu 2003-mi maajimit 2004-mut maajimut uuttortaanermik suliniut naammasillugu ingerlanneqarsimavoq. Illoqarfinni pingasuni Narsami, Nuummi Qaqortumilu agguataarlugu illuni 258-ini radoneqassuseq uuttortarneqarpoq. Illuni radoneqassutsip uuttortarnerata saniatigut illut sananeqaataannik atugaanerinillu paasissutissarpassuit nalunaarsorneqarput. Paasissutissat taakku radoneqassutsip uuttortarneqarneranut sanilliullugit naatsorsueqqissaarinermik misissuiffigineqarput. Naatsorsueqqissaaraluni misissuineq illuni radoneqassutsip annertussusaanut pingaarutilinnik pissutsinik sunik paasissutissiivoq. Kiisalu kalaallini illuni radonip annertussusaata annikillisarnissaanut iliuuserisassanut pisariaqartitsinernik naliliisoqarsimavoq. Naliliineq taanna radonip annertussusaannik uuttortagaasunik nunani allani misilittakkanut iliuuserisartakkanullu sanilliussinermik tunngaveqarpoq.

Nunani allani atorneqarlutik killissaqassutsit nalinginik/sunniuffissaata inissisimaffiinik naliliinissaq, imaluunniit Kalaallit Nunaanni sunniuffissaata inissisimaffissaata sukutsitaaniittariaqarneranut isummernissaq misissuinerup ilagisimanngilai.

Misissuinermit nalunaarusiaq Asiap nittartagaani takuneqarsinnaavoq.