Sanaartornermut atatillugu ujaqqat qaartiterlugit piiakkat pisortanit pigineqarput.

 

Sanaartortitsisup ujaqqat qaartiterinermi piiakkat nunaminertamut kommunimit innersuunneqarsimasumut inississavai, tamannalu nunaminertamik atugassinneqarnermut imaluunniit sanaartornissamut akuerineqarnermut atatillugu erseqqissarneqarsimasariaqarluni.

 

Ujaqqat piiarneqartut sanaartortitsisumut allamut tunissallugit kommuni periarfissaqarpoq, kommunimilu pineqartumi aningaasarsiutigalugu ujaqqanik piiaaveqarpat, pineqartumut tunngatillugu unammillernermut ajoqutaanngitsumik akeqartitsilluni tamanna pisariaqarluni.

 

Kalaallit Nunaanni nuna ataatsimoorussamik pigineqarpoq, taamaattumillu namminersortunit pisiarineqarsinnaananilu tuniniarneqarsinnaanngilaq. Nunaminertamik atuinerni tamani, aamma sanaartornermut atatillugu, nunaminertat pillugit nalunaarut naapertorlugu nunaminertat pillugit oqartussaatitaasup nunaminertaq aalajangersimasoq pillugu atuisinnaanermut piginnaatitsissummik nalunaaruteqassaaq. Nunaminertamik atuisinnaatitaaneq akeqanngilaq, nunaminertarlu atugassiissutigineqartoq tunngaviatigut naliliunani. Tamatuma pissusissamisoortumik kingunerisaanik sanaartornermut atatillugu issoq aamma qaarsoq sinneruttut ataatsimoorussamik pigisaapput, tassalu pisortanit pigineqarlutik. Oqartussaaffeqarfik taamaallaat nunaminertat pillugit inatsisitigut aqammalu inuussutissarsiutit pillugit nalinginnaasunik inatsisitigut malittarisassaqartinneqarpoq. Illoqarfiit nunaqarfiillu nunataanni nalinginnaasumik sanaartornermi imaluunniit sanaartornermi atugassanik ujaqqanik piiaaneq aatsitassat pillugit inatsimmi malittarisassaqartinneqanngilaq.

 

Akerlianilli kommunalbestyrelsip nunaminertamik atugassiinermini piumasaqaatitut sanaartortitsisoq akuerisinnaavaa ujaqqanik qaartiterinermi piiakkaminik inummut allamut tunisisinnaaneranik, tamannali aningaasarsiutigalugu ujaqqanik piiaanissamut akuersissutitut taaneqarsinnaavoq. Tamanna kaammattuutigineqarsinnaanngilaq makku pissutigalugit:

 

•  Akuersissut sanaartortitsisup sanaartornermi aningaasartuutaanut tapiissutitut paasineqarsinnaavoq, taamaasillunilu akuersissut sanaartortitsisumut ataasiinnarmut tunniunneqarpat, innuttaasut kikkuugaluarnersut assigiinngisinneqarnerattut isigineqartussaalluni. Taamaattumik taamatut suleriaaseqarneq suliani tamani malinneqartussaassaaq, tamannalu pillugu aalajangersakkat kommunip nunaminertanik atugassiinermini malittarisassaanut ilanngunneqassalluni.

 

•  Pineqartumi nalinginnaasumik suleriaaseqartoqarpat tamatuma kingunerisinnaavaa pisariaqanngitsumik qaartiterisoqapiloortoqarnera nunaminertanillu iluarsaassisoqartarnera, ujaqqat qaartiterinermi piiarneqartut sinnerinik tuniniaanissaq siunertaralugu.

 

•  Taamatut nalinginnaasumik suleriaaseqartoqarpat, kommunimi aningaasarsiutigalugu ujaqqanik piiaasup piiaasulluunniit niuernermi tunngavigisaat neriorneqarsinnaassapput.

 

Qulaani nassiuiaammut makku tunngavigineqarput:

1)  Aningaasaqarnermut Pisortaqarfimmiit Aasiaat Kommuneannut fax 22. april 1993-meersoq.

2)  Aningaasaqarnermut Pisortaqarfimmiit Sisimiut Kommuneannut fax af 27. januar 1997-meersoq.