Siunnersuut 17. decembari 2007-imiit 28. januaari 2008-mut tusarniaassutigineqaqqaarpoq.

 

Taarsigassarsiniartoq suliassanik nukissamik sipaarniarfiusunik suliaqarniarpat taarsigassarsiami saniatigut taarsigassarsinissamut periarfissinneqarnissaa politikerit tungaanniit kissaatigineqarmat, siunnersuut 2008-mi upernaakkut ataatsimiinnermi tunuartinneqarpoq. Suliassat nukissamik sipaarniarfiusut tassaapput atortut nukissamik sipaarutaasussat atorlugit inissialiat nutaat, kiisalu inissiani pioreersuni suliassat nukissamik sipaarniuteqarfiusut, allannguutissatut siunnersuummi ilaliussami sukumiinerusumik aalajangersarneqartut.

 

Nukissamik sipaarniarfiusunik sanaartornissamut taarsigassarsiarititassat annerpaamik sanaartornermut aningaasartuutit tamarmiusut 40%-iinik annertussuseqarsinnaapput. Taamatuttaaq tamanna inissianik nutaanik, sananeqarnerminni nukissamik sipaarniarfiunngitsunik sananermut atuutissaaq. Taarsigassarsiarititassat aningaasanut inatsit naapertorlugu aningaasaliissutissatut aalajangersagaareersunit taarsigassarsiaritinneqartassapput. Taamaalilluni siunnersuummi matumani aalajangersakkat tusarniaassutaareersunut naleqqiullugu nutaartaqarput.

 

Kiisalu aalajangersakkat pingaarutillit allat najoqqutassatigut oqaasertamikkullu allannguuteqarput. Allannguutissatut siunnersuutip atuutilerneratigut inissianik aningaasalersuisarneq pillugu Inatsisartut peqqussutaannut allannguutissat katillugit 13-iussapput.

 

Taamaattumik siunnersuut tusarniaassutigineqaqqippoq. Siunnersuut ataatsimut allataavoq, taamaalillunilu siunnersuutitut ataatsimoortutut atuarneqassalluni.

 

KANUKOKA kingusinnerpaamik 15. februaari 2009 akeqquneqarpoq, taamaattumillu kommuninit akissutit kingusinnerpaamik tallimanngornermi 13. februaari 2009 KANUKOKA-mut tunniuteqquneqarput.