Una pillugu: Atuartitsinerup ingerlanneqarnissaata naammassineqarnissaa atuarnerullu nalaani atuarfiup atuartunut nakkutilliisussaatitaanera pillugit nalunaarutissatut siunnersuut

Pisortaqarfiup ulloq 29. oktobari 2002 allagaqarluni nassiuppaa Atuartitsinerup ingerlanneqarnissaata naammassineqarnissaa atuarnerullu nalaani atuarfiup atuartunut nakkutilliisussaatitaanera pillugit nalunaarutissatut siunnersuut,  tusarniutigineqartoq 29. novembari 2002-p tungaanut piffissaligaasumik.

Kattuffiup tusarniaaneq ulloq 30. oktobari 2002 kommuninut ingerlateqqippaa. Kommunillu arfineq-marluk akissuteqarput.

Nalunaarutissatut siunnersuut Kattuffiup marlussuinnartigut oqaaseqarfigerusuppaa:

§ 8, imm. 1, nr. 1 aamma § 10, imm. 1:
Nalunaaqquttap-akunnerini ataasiakkaani imaluunniit ullup sinnerani atuartitsinermut allamut nuussisoqassatillugu atuarfiup angajoqqaanut sioqqutsisumik ilisimatitsissutaasarnissaa Kattuffiup ajornassangatippaa. Tassami tamatumani pinasuartumik iliuuseqartoqartartussaavoq. Naleqqunnerussaarlu tamatuma malitsigisaanik angajoqqaat ilisimatinneqartarnissaannik pisussaaffiliineqarpat.

§ 12:
Kattuffiup nalunaarutissatut siunnersuummi amigaatitut maluginiarpaa pisariaqartillugu qaqugukkulluunniit ilinniartitsisup akuliunissamut pisussaatitaaneranik aalajangersakkap soorlu KUD-ip kaajallaasitaani 8/80-imi § 1-imi allassimasup ilaannginnera.