Una pillugu: Atuarfimmi immikkut ittumik atuartitsineq allatullu immikkut perorsaanikkut ikiorsiineq pillugu nalunaarutissatut siunnersuut

Pisortaqarfiup ulloq 29. oktobari 2002 allagaqarluni nassiuppaa Atuarfimmi immikkut ittumik atuartitsineq allatullu immikkut perorsaanikkut ikiorsiineq pillugu nalunaarutissatut siunnersuut, tusarniutigalugu 29. novembari 2002-p tungaanut piffissaliilluni.

Kattuffiup tusarniaaneq kommuninut ingerlateqqippaa ulloq 30. oktobari 2002, kommunillu arfineq-marluk akissuteqarput.

Akissutit ilarpassuini malunnarpoq immikkut ittumik atuartitsinerup nalinginnaasumik atuartitsinermut ingerlaqqiffiusumillu atuartitsinermut immikkoortiterneqartannginnera iluarineqanngitsoq. Allannguut tamanna atuarfik pillugu peqqussummi aalajangerneqarsimagaluartoq Kattuffik isumaqarpoq immikkut ittumik atuartitsinissamik il. il. pisariaqartitsinerit assigiinngitsut erseqqinnerusumik nassuiarneqarnissaat pisariaqartoq, tassami nalunaarut najoqqutassaaniartussaammat peqqussummi tunngaviusumik aalajangersakkat qanoq eqqortinneqarnissaannut.

§§ 6, 8, 10 aamma 12 naapertorlugit PPR-ip immikkut ittumik atuartitsinissamik allatullu immikkut perorsaanikkut ikiorsiinissamik inassuteqaatit tamaasa nalilersortartussaavai, taamatullu immikkut ittumik atuartitsineq aammalu immikkut perorsaanikkut ikiorsiineq ingerlanneqartoq PPR-ip ukiumoortumik nalilertassallugit ingerlaqqissanersut unitsinneqassanersulluunniit. PPR-ip akuutinneqarnerata annertussusissaa naammassiuminaatsorujussuussagunarpoq PPR-eqarfinni sulisut qassiunissaannik aalajangersakkat eqqarsaatigissagaanni - pingaartumik ullumikkut sulisut qassiunerat eqqarsaatigissagaanni - aammami taama annertutigisumik akuutinneqarnissaa ilaatigut soorlu pisariaqassanngitsoq. Aalajangersakkat maannamut atuuttut naapertorlugit atuarfiit namminneq immikkut ittumik atuartitsinerup nalinginnaasup tungaatigut pisariaqartitsinernik isumannanngitsumik naliliillutillu, aaqqissuillutillu nalileeqqissinnaasarput.

Nalunaarutissamut missiliuummi § 8 naapertorlugu atuarfiup pisortaa ilinniartitsisut angajoqqaallu inassutaat tamaasa tunuliaqutaralugit PPR qinnuigisassavaa nalilersueqqullugu. Atuarfiup pisortaa aalajangiisinnaatitaasariaqarpoq nalilersuinissaq tamanna pisariaqarnersoq, tassami aalajangigassat atuartunut tunngasut tamaasa atuarfiup pisortaata aalajangertarmagit.

§§ 11-imi aamma 12-imi amigaataavoq immikkut ittumik atuartitsinermi ilinniartitsisup qaqugukkut iliuuseqartarnissaanik erseqqissaanissaq. Klassip ilinniartitsisua, fagimi ilinniartitsisoq, immikkut ittumik atuartitsisoq ilinniartitsisullu allat taasariaqartut taaneqartariaqaraluarput.

Piffissaq suliffiusoq pillugu isumaqatigiissummut atuuttumut - immaqalu aamma atuutilersussamut - tunngatillugu aammalu atuartut "annertusisamik" immikkut ittumik atuartinneqarnissaminnik pisariariaqartitsisut sapinngisamik eqqarsaatigalugit aningaasaliisarnissamik atuarfeqarneq pillugu peqqussummi oqaatigineqartunut tunngatillugu pisariaqassaaq immikkut atuartitsinerup immikkoortortalersugaanissaa, taamaalilluni paasiuminarnerulissammat atuartut kikkut piffissamik atuinerup/akissarsiaqarnerup tungaatigut taarsiiffigisariaqartumik atuartittariaqarnersut atuartullu kikkut kommunit akornanni aningaasatigut agguataarinissami naatsorsuutigineqassanersut. Maanna annertusisamik immikkut atuartitsinerup inissisimanera pillugu oqallinneq tunngavimmigut naammassereerpoq, suleriaqqinnissami - soorlu nalunaarusiornermi - aaqqissuussisoqartariaqarpoq atuartoq eqqarsaatigalugu aalajangiisoqartartussanngorlugu immikkut atuartitsinermi allatullu immikkut perorsaanermi tamatigut.