Una toorukku Kanukokap tusarniaanermut akissutaa atuarsinnaavat
Kanukokamit nassuiaatit inissianik attartortitsisarneq pillugu inatsisartut peqqussutaata allanngortineqarnissaanik siunnersuut pillugu:
Allannguutit kommuninut tunngassuteqartut pingaarnerit tassaapput isumaginninnermut tunngatillugu inissanik innersuussisarnermut malittarisassat nutaat, aningaasaliissutinit iluanaarutit annerpaaffissalerneqarnerat aammalu akileeqqaarutissanik taarsigassarsisarnermut malittarisassat nutaat.
Isumaginninnermut tunngatillugu inissanik innersuussisarnermi attartortut pisussaaffiisigut annaasaqarnissamut kommunit qularnaveeqqusiisalissapput qaammatini aqqaneq-marlunni ineqarnermut akiliutit nalingannut, annerpaamilli 60.000 kr.-inut, sivisunerpaamik ukiumi ataatsimi. Attartortoq attartulernerup nalaani isumaginninnikkut ikiuutisisinnaatitaappat taava kommunit akileeqqaarutissaq tamakkerlugu akilissavaat. Imaappoq taamaattoqartillugu akileeqqaarutissanik taarsigassarsisitsisoqarsinnaanngilaq.
Aningaaliissutinik iluanaarutit maanna kvadratmeterimut 15.000 kr.-inut annerpaaffissalerneqassapput. Taakku akit allanngorarnerat ilutigalugu iluarsineqartartussaanngillat.
Akileeqqaarutissanik taarsigassarsisitsisarnermut tunngasut allanngortinniarneqarput. Piffissaq naafferartumik akilersuiffiusoq ukiumit ataatsimiit qaammatinut arfinilinnut sivikillineqassaaq, taamaallaallu attartortut isertitakinnerpaat (180.000/280.000) periarfissinneqassapput aaqqissuussinermik tamatuminnga atuinissaminnut. Akileeqqaarutissanik attartortitsisarnikkut annaasat aningaasaliissutinik iluanaarutitigut matussuserneqassapput.
Inatsisisip allannguutissaatut siunnersuutip kommuninut aningaasatigut kingunerisassai tassaaput isumaginninnermut tunngatillugu inissianik innersuussisarnermi aningaasartuuteqarnerulernissaq, akileeqqaarutissanik taarsigassarsiatigut akilersorneqanngitsutigut annaasaqarnerit kiisalu annaasaqarnissamut qularnaveeqqusiinikkut kommunit aningaasanik piareersimasuuteqarnerat oqimaannerulersinneqassaaq.
Tusarniaaneq 5. aggusti 2002-mut killilerneqarpoq, taamaattumillu kommunit akissutaat Kanukokamut nassiunneqarsimasariaqarput kingusinnerpaamik 2. aggusti 2002.
