Una toorukku Kanukokap tusarniaanermut akissutaa atuarsinnaavat

 

1) Missiliuut - Aktieselskabit pillugit inatsisip Kalaallit Nunaanni atortuulersinneqarneranik peqqussut
2) Missiliuut - Anpartsselskabit pillugit inatsisip Kalaallit Nunaanni atortuulersinneqarneranik peqqussut
3) Missiliuut - Sulliviit inuussutissarsiutitut ingerlatat pillugit inatsisip Kalaallit Nunaanni atortuulersinneqarneranik peqqussut
4) Missiliuut - Aningaasaateqarfiit inuussutissarsiutitut ingerlatat pillugit inatsisip Kalaallit Nunaanni atortuulersinneqarneranik peqqussut

Tusarniaaneq 1. aggusti 2002-mut killiligaavoq, taamaattumillu oqaaseqaataasinnaasut kommuneqarfiit kattuffianni tiguneqareersimasariaqarlutik kingusinnerpaamik 30. juuli 2002.

Peqqussutissatut missiliuutit inatsisinik nalunaarutit ilusilerneqartarnerattut ilusiligaapput, tassa peqqussutini paragrafit inatsimmik nalunaarummi paragrafit taakkuusut maliinnarpaat.

Aalajangersakkanut oqilisaassissutaasunut tunngatillugu ingerlatseqatigiiffinnut nunami EU-mut ilaasortaasumi inatsisit ataanniittunut innersuussutit ilaneqarsimapput ingerlatseqatigiiffinnut Kalaallit Nunaanni inatsisit ataanniittunut innersuussutitalerlugit, taamaalillutik Kalaallit Nunaanni ingerlatseqatigiiffiit aalajangersakkanik oqilisaassissutaasunik atuisinnaaniassammata EU-mut ilaasortaasuni ingerlatseqatigiiffittulli. Nunanik EU-mut ilaasortaasunik Kalaallit Nunaannut tunngatillugu immikkut isumaqatigiissuteqartoqarsimasinnaanera aalajangersakkani naatsorsuutigineqareerpoq.

1) Aktieselskabit pillugit inatsit:

Danmarkimi inatsimmik nalunaarutip nr. 9-p, 9. januaari 2002-imeersup imarisaanut naapertuuttumik nutarterisoqarpoq. Namminersornerullutik Oqartussat siunnersuuteqarsimapput missiliuut imatut allanngortinneqassasoq Erhvervs- og Selskabsstyrelse Kalaallit Nunaanni naalakkersuisut inassuteqarneratigut aalajangiisinnaanngorlugu aktieselskabit ilaat Namminersornerullutik Oqartussanit ilaatigut imaluunniit tamakkiisumik pigineqartut aktieselskabit naalagaaffimmit pigineqartut pillugit malittarisassani pineqartunut ilaatigut imaluunniit tamakkiisumik ilanngunneqarsinnaassasut.

2) Anpartsselskabit pillugit inatsit:

Danmarkimi inatsimmik nalunaarutip nr. 10-p, 9. januaari 2002-imeersup imarisaanut naapertuuttumik nutarterisoqarpoq.

3) Sulliviit inuussutissarsiutitut ingerlatat pillugit inatsit:

Danmarkimi inatsimmik nalunaarutip nr. 11-p, 9. januaari 2002-imeersup imarisaanut naapertuuttumik nutarterisoqarpoq. 

4) Aningaasaateqarfiit inuussutissarsiutitut ingerlatat pillugit inatsit:

Danmarkimi inatsimmik nalunaarutip nr. 1062-p, 14. decembari 2001-imeersup imarisaanut naapertuuttumik nutarterisoqarpoq.