Una toorukku Kanukokap tusarniaanermut akissutaa atuarsinnaavat
Kommunalbestyrelsit aamma nunaqarfinni aqutsisut il.il. pillugit Inatsisartut inatsisaata allanngortinneqarnissaanik Inatsisartut inatsisissaattut siunnersuut (Aqutsinissamik inatsit).
Aqutsinissamik inatsimmi § 16 imm. 2 naapertorlugu kommunalbestyrelsimut ilaasortap sinniisussaa borgmesterip ataatsimiigiaqqusussaavaa ilaasortaq sivikinnerpaamik qaammatini marlunni kommunimi pisussaaffimminik suliaqarsinnaassanngippat. Ilaasortaq piffissap qinigaaffiusup sinnerani pisinnaanngittuassappat taassuma sinniisussaa kommunalbestyrelsimut ilaasortanngussaaq, ilaasortaajunnaartullu qinigaaqatigisimasaasa ataatsimiititaliani inissat inuttaaruttut inuttalissavaat. Kommunalbestyrelsimi peqataasinnaannginneq ataavartuunngippat ilaasortap sinniisussaa ilaasortanngorallassaaq, Aqutsinissamilli inatsimmi § 18 imm. 2 naapertorlugu sinniisussatut toqqagaasimasoq ataatsimiititaliani ataavartuni ilaasortanngussalluni.
Inatsisartunut ilaasortap Olga Poulsenip siunnersuutigisimavaa Aqutsinissamik inatsit ima allanngortinneqassasoq sivikinnerpaamik qaammatini marlunni peqataasinnaanngitsoqarneratigut sinniisussatut ilaasortanngorallartoq aamma peqataasinnaanngitsup ataatsimiititaliani ilaasortaaffiinik tigusisinnaanngorlugu. Siunnersuutigaali apeqqutaatinneqassasoq Aqutsinissamik inatsimmi§ 18 imm. 2 naapertorlugu sinniisussatut toqqagaq tamatumunnga akerliunnginnersoq.
Kisianni kommuneqarfiit kattuffiata siunnersuutigaa Aqutsinissamik inatsimmi § 18 imm. 2 allanngortinneqassasoq imm. 2-mik 3-millu imaattumik ilanngussinikkut:
"Piffissap qinigaaffiup ingerlanerani ataatsimiititaliamut ilaasortaq tunuarpat ataatsimiititaliami inissaq inuttaaruttoq kommunalbestyrelsimi gruppimit ilaasortap tunuartup toqqagaaffigisimasaanit inuttalerneqassaaq.
Ataatsimiititaliami ilaasortaq sivikinnerpaamik qaammatini marlunni peqataasinnaanngippat gruppe toqqagaaffia aalajangiisinnaavoq peqataasinnaannginnerani ilaasortaq alla ataatsimiititaliami ilaasortaassasoq."
Kattuffiup siunnersuutaa taanna Aqutsinissamik inatsimmi § 16 imm. 2-p nassuiarneqartarneranut naapertuuppoq, tamannali kommunini nalornisoorutigineqarajuppoq.
Inatsisissatut siunnersuut inatsisartunut ilaasortap Olga Poulsenip saqqummiussaa, siunnersuut pillugu nassuiaatit aammalu siullermeerlugu oqaluuserineqarnerani akissutaasimasoq kattuffiup nittartagaani uani atuarneqarsinnaallutillu naqiterneqarsinnaapput: www.kanukoka.gl/tusarniaanerit
Tusarniaanermut killiliunneqarpoq ulloq 20. septembari 2002, taamaattumillu oqaaseqaataasinnaasut kommuneqarfiit kattuffiata tigorusuppai kingusinnerpaamik 18. septembari 2002.
