|
Siunnersuut kommuninut tamanut tusarniutigineqarpoq. Kommunit arfinillit akissutaat Kattuffiup tigusimalerpai. Kommune ataaseq (Nuup Kommunea) nalunaarpoq siunnersuut politikkikkut soqutiginaateqartoq, aatsaalli kommunalbestyrelsip tullianik ataatsimiinnissaani 30. septembari 2002-mi pisussami periarfissaqassallutik tamatuma oqallisiginissaanut. Kommunit allat tallimat nangaassuteqaratik tusarniaanermut akissut manna akuerisinnaanerarpaat. Aqutsinissamik inatsimmi § 16 imm. 1 naapertorlugu kommunalbestyrelsimut ilaasortap sinniisussaa borgmesterip ataatsimiigiaqqusussaavaa ilaasortaq sivikinnerpaamik qaammatini marlunni kommunimi pisussaaffimminik suliaqarsinnaassanngippat. Ilaasortaq piffissap qinigaaffiusup sinnerani pisinnaanngittuassappat taassuma sinniisussaa kommunalbestyrelsimut ilaasortanngussaaq, ilaasortaajunnaartullu qinigaaqatigisimasaasa ataatsimiititaliani inissat inuttaaruttut inuttalissavaat. Kommunalbestyrelsimi peqataasinnaannginneq ataavartuunngippat ilaasortap sinniisussaa ilaasortanngorallassaaq, Aqutsinissamilli inatsimmi § 18 imm. 2 naapertorlugu sinniisussatut toqqagaasimasoq ataatsimiititaliani ataavartuni ilaasortanngussalluni.
Inatsisartunut ilaasortap Olga Poulsenip siunnersuutigisimavaa Aqutsinissamik inatsimmi § 16 imm. 2 ima allanngortinneqassasoq sivikinnerpaamik qaammatini marlunni peqataasinnaanngitsoqarneratigut sinniisussatut ilaasortanngorallartoq aamma peqataasinnaanngitsup ataatsimiititaliani ilaasortaaffiinik tigusisinnaanngorlugu. Siunnersuutigaali apeqqutaatinneqassasoq Aqutsinissamik inatsimmi§ 18 imm. 2 naapertorlugu sinniisussatut toqqagaq tamatumunnga akerliunnginnersoq. "Piffissap qinigaaffiup ingerlanerani ataatsimiititaliamut ilaasortaq tunuarpat ataatsimiititaliami inissaq inuttaaruttoq kommunalbestyrelsimi gruppimit ilaasortap tunuartup toqqagaaffigisimasaanit inuttalerneqassaaq. Ataatsimiititaliami ilaasortaq sivikinnerpaamik qaammatini marlunni peqataasinnaanngippat gruppe toqqagaaffia aalajangiisinnaavoq peqataasinnaannginnerani ilaasortaq alla ataatsimiititaliami ilaasortaassasoq." Kattuffiup siunnersuutaa imm. 2 taanna Aqutsinissamik inatsimmi § 16 imm. 2-p nassuiarneqartarneranut naapertuuppoq, tamannali kommunini nalornisoorutigineqarajuppoq.
Inussiarnersumik
Lars Olsen
siunnersorti
|
