|
4. septembari 2002 Ingerlaavartumik naliliineq pillugu nalunaarutissatut siunnersuut Ingerlaavartumik naliliineq pillugu nalunaarutissatut siunnersuut pillugu tusarniaalluni pisortaqarfiup allagaa nr. 001546 14. juuni 2002-meersoq Kattuffiup tiguaa ulloq 17. juuni 2002. Tusarniaaneq killilerneqarsimavoq 15. aggusti 2002-mut. Pisortaqarfik allakkamini nr. 1910 16. juuli 2002-imeersumi nalunaarpoq tusarniaanerup killinga 2. septembari 2002-mut kinguartillugu. Tusarniaassutigineqartut Kattuffiup kommuninut ingerlateqqippai, kommunillu tallimaannaat akissuteqarput, tamannalu soorunami piffissap tusarniaaviusup naleqqutinnginneranut attuumassuteqarpoq. Akissutini erserpoq nalornisoorutigeqaqisoq atuartunut ataasiakkaanut iliuusissatut pilersaarusiat ingerlaavartumillu naliliisarnissaq aammalu uppernarsaasiortarnissaq qanoq ingerlanneqassanersut. Amerlasuut isumaqarput tamanna suliakkersuutaavallaassasoq aalajangersakkanullu maannamut atuuttunut naleqqiullugu suliassaqarnarnerungaalissalluni. Tusarniaanermut akissutini tamangajanni ujartorneqarput atuartut ataasiakkaarlugit iliuusissanik pilersaarusiorfigisarnissaannut, ingerlaavartumik naliliisarnissamut uppernarsaasiortarnissamullu atortussat ilitsersuutillu/pikkorissarnerillu. Ilinniartitsisut/atuarfiit/kommunit akornanni nalornisooqqaneq akunnattuunganerlu tamanna iluarsiniassammat, aammalu piffissamut suliffiusumut tunngasut isiginiarneqarpallaannginniassammata, Kattuffiup Pisortaqarfik Inerisaavillu matumuuna kajumissaarusuppai atortussat ilitsersuutillu Inerisaavimmit suliarineqassamaartut pillugit piaarnerpaamik ilisimatitseqqullugit – atuarnerup immikkoortui naggataarlugit qitiusumit suliarineqartunik naliliisarnissat misilitsittarneq pillugu nalunaarutitaassami ilaatinneqartussaagunartut pillugit nassuiarneqarnissaat aamma eqqarsaatigalugu. Tamatumunnga tunngatillugu innersuussutigineqassapput kommuninit allakkat, pingaartumik atuarfinnit ilanngussat suut erseqqinnerusumik paasissutissiivigineqartariaqarnerannik takussutissiisut. Taamatut paasissutiinissaq qularnanngivissumik aamma iluaqutaajumaarpoq piffissat suliffiusut pillugit isumaqatigiissutissaq nutaaq pillugu isumaqatigiinniarnerni aallartilersuni pissutsit ilaasa qulaajarneqarnissaannut. Nalunaarutissamut missiliuutip imarisaa nalinginnaasumik iluarinartinneqarpoq ilimagineqarlunilu atuartitsinerup pilersaarusiorneqarnera aammalu ingerlaavartumik naliliisarneq uppernarsaasiortarnerlu pitsaanerulerumaartut ilinniartitsisut pisariaqartunik tunngavissinneqarpata, atortussinneqarpata periarfissinneqarlutillu. Kisiannili nalunaarutissamut siunnersuummi ataaseq iluarineqanngivippoq. Tassa atuartitsissutini tamani atuartut akulliit aallartinneranniilli karakterilersuinissarsuaq. Kissaatigineqarpoq karakterilersuinissaq pivallaarnagu nalunaarusiortarnerup pingaartinneqarnerunissaa atuartup inuttut inooqateqarnikkullu atuarnerup tamarmi ingerlanerani ineriartornera aammattaaq eqqarsaatigalugu. Atuarfiit/kommunit isumaat taaneqartut Kattuffiup pingaartilluinnarpai, naatsorsuutigalugulu nalunaarutissap inaarsarneqarnerani isummat taakku eqqarsaatigineqarumaartut. Kattuffiup kajumissaarutigissavaattaaq qulaani taaneqartutuut erseqqinnerusumik paasissutissiisoqassasoq Inerisaaviullu sulisuisa paasissutissiiartorlutik ataatsimiisitsisarnissaminni paasissutissiisarnissaq oqallitsitsisarnissarlu pingaartissagaat.
Inussiarnersumik
Karl Nielsen
siunnersorti
|
