Una toorukku Kanukokap tusarniaanermut akissutaa atuarsinnaavat
Siunnersuutip taarsissavaa suliffissarsiuussisarneq pillugu Inatsisartut peqqussutaat nr. 11, 16. decembari 1988-imeersoq. Peqqussutip maannamut atuuttup suliffissaqartitsiniarneq pillugu ataatsimiititaliamik pilersitsisarnissamik aalajangersagaa aqutsinermut inatsimmi aalajangersakkat ilaannut akerliuvoq. Kommunalbestyrelsit nunaqarfinnilu aqutsisut il.il pillugit Inatsisartut inatsisaanni nr. 20-mi 3. novembari 1994-imeersumi paragraf 18-imi aalajangersagaavoq kommunalbestyrelsit pingasunik imaluunniit tallimanik ilaasortallit ataatsimiititaliamik pilersitsisinnaanngitsut. Maanna siunnersuutip paragrafiisa sisamaanni allassimavoq suliffissarsiuussisarnissaq kommunalbestyrelsip isumagisassarigaa, aqutsinermulli inatsisinut naapertuuttumik allassimalissaaq kommunalbestyrelsip nammineq aalajangigassarigaa suliassaq tamanna qanoq aaqqissuutissanerlugu.
Nalunaarsuinermut aalajangersagaqarneq eqqarsaatigalugu siunnersuut inatsisitigut tunngavissiiniarpoq suliffissaqartitsiniarnermik misissueriaatsimut Suliaq-mut aammalu suliffissarsiuussinermi aaqqissuussinermut Isikkivik-mut. Kanukoka isumaqataavoq projektit taakku marluk inatsisitigut tunngavissaqartariaqarnerannut, tassami nipangiussisussaatitaaneq suliassat suliarineqartarnerannut inatsimmi paragraf 28-mi aalajangersagaasoq (paasissutissat pisortaqarfimmiit pisortaqarfimmut ingerlateqqinneqartarnerannut tunngatillugu) maannamut kommuninut akornusiisarsimammat inuit ataasiakkaat namminneq atugarisaat isumaginninnikkullu annertuumik ajornartorsiuteqarnerat pillugit paasissutissanik nalunaaruteqarniarneranni. Inuup sivisuumik suliffissaarusimanera isumaginninnermi ajornartorsiutitut angisuutut isigineqartarpoq taamaattumillu nipangiussisussaatitaanermi pineqartunut ilaalluni. Paasissutissanilli tamakkuninnga nalunaaruteqartoqarsinnaavoq inatsimmi aalajangersakkanilu allassimappat paasissutissat ingerlateqqinneqassasut.
Siunnersuut siusinnerusukkut kommuninut tusarniaassutigineqareerpoq, tassa Kanukokamit allakkatigut 21. januaari 2002-meersukkut. Kommuninit oqaaserineqartut tunngavigalugit Kanukoka pisortaqarfiup tusarniaaneranut akissuteqarpoq 15. januaari 2002. Taamaattumik allakkiat tusarniaanermi atortut kommuninut nassiunneqanngillat, kisiannili siunnersuut nassuiaatillu nalinginnaasut Kanukokap nittartagaatigut pineqarsinnaallutik: www.kanukoka.gl/tusarniaanerit
