Kanukokap tusarniaanermut akissutaa

Sullivinni avatangiisit pillugit inatsit nr. 295, 4. juuni 1986-imeersoq atuutilerpoq ulloq 1. juuli 1986. Inatsisip taassuma nutarterneqarnissaanik, Kalaallit Nunaanni Danmarkimilu inatsisit assigiikannilernerannik kinguneqartussamik, siunnersuut kommuninut faxikkut nassiunneqarpoq ulloq 11. juuni 2002.

Aalajangersakkanut maannamut atuuttunut sanilliullugit allannguutit pingaarnerit makku taaneqarsinnaapput:

1) Piniarneq inatsimmut ilaalissaaq. Taamaattorli sullivinni avatangiisit pillugit inatsit pingaarnerusutigut taamaallaat nunami suliffinnut atuummat immami angallatit, umiatsiaaqqat il. il. atorlugit piniarneq inatsisissami pineqanngilaq. Aammalu sunngiffimmi piniarneq inatsisissami pineqanngilaq .

2) Suliffinnik nalilersuisarneq. Suliffiit isumannaallisaanikkut nakkutilliisoqartussaatitaasut, tassa qulit sinnerlugit sulisoqartut, kisimik suliffimmik nalilersuummik allakkiortussaatitaassapput.

3) Sullissisut akisussaaqataanerat. Sullissisut (soorlu entreprenørit) sullivinni avatangiisinut akisussaaqataalissapput.

4) Sanatitsisut (illuliortitsisut) akisussaaqataanerat. Sanatitsisup aaqqissuusseqateqarnissamut pisussaaffini allamut tunniussinnaassanngilaa.

5) Piffissamik qasuersaarfeqarnissamik aammalu ullormik sulinngiffeqarnissamik malittarisassat iluarsineqassapput. Angalanerup nalaa aamma sulisup suliffiatut isigineqalissaaq.

6) Inuusuttut 18-it inorlugit ukiullit. Inuusuttuaqqat 15-it inorlugit ukiullit atuartussaatitaasut nalinginnaasumik sulisinneqaqqusaanngillat. Qassinilli ukioqalersimanissamik piumasap tamatuma piniarnermut tunngatillugu avaqqunneqarsinnaanissaanut pisinnaatitsissuteqalissaaq. Sulisitsisoq angajoqqaanut ilisimatitsinissaminut pisussaatitaassaaq. Taamatut allannguuteqartitsiniarnerup siunertaraa ILO-mi konventionip nr. 138-ip atortuulersinnissaanut Kalaallit Nunaata inatsisitigut tunngavissaqalernissaa. Inuit sulisorineqassagunik minnerpaamik qassinik ukioqarnissaat isumaqatigiissummi tassani aalajangersagaavoq. Meeqqat sulisitaasarnerat nunani tamalaani akerlilersorneqartorujussuanngorpoq meeqqallu navianartunik sulisitaasarnerat inerteqqutaalersinniarneqarluni.

7) Sullivinni avatangiisit pillugit siunnersuisoqatigiit ilaasortaat 6-iniit 8-nut amerliniarneqarput.

8) Maalaaruteqarsinnaaneq. Maalaarummik aalajangiineq suliassanngorteqqinneqarsinnaalissaaq. Maalaaruteqarnissamut piffissaliussaq sap. ak. arfinilinnut sivikillineqassaaq.

Naatsorsuutigineqarpoq inatsit nutaaq atuutilerumaartoq 1. maaji 2003.

Sulisitsisut (soorlu kommunit) aningaasartuuteqarnerulissapput malittarisassanik eqqortitsiniarnerminni, pingaartumik suliffinnik nalilersuisarneq, sullissisutut akisussaaffiit, sanatitsisutut akisussaaffiit, piffissamik qasuersaarfeqartitsineq, ullormik sulinngiffeqartitsineq inuusuttullu 18-it inorlugit ukiullit eqqarsaatigalugit.