Timmissat pillugit nalunaarut - missiliuusiaq

Tusarniaaneq: Namminersornerullutik Oqartussat timmissat illersorneqarnerat pillugu nalunaarutaannut missingersuut.

Naalakkersuisut kissaatigisimavaat timmissat illersorneqarnerat pillugu Namminersornerullutik Oqartussat nalunaarutaat nr. 38, 6. december 2001-imeersoq nutarterneqassasoq. Tammana inuuttaasut, kattuffiit, peqatigiiffiit naalakkersuinermillu sammisallit akornanni oqallinnerup kinguneraa.

Missingersuut ilanngullugu nassiunneqartoq naalakkersuisunit tusaniaassutigalugu nassiutassatut akuerineqarpoq.

Missingersuut Avatangiisinut Pinngortitamullu Pisortaqarfimmit suliarineqarpoq naalakkersuit, naalakkersuisunut ilaasortap periarfissaliutaat tunngavigalugit aammalu Qaanaap kommuniata, Ittoqqortoormiit kommuniata, Tasiilap kommuniata aammalu kalaallit kommuniisa KANUKOKA-mi kattuffeqartut kisaatigisaatigalugit saqqummiutaat malillugit.

Taagorneqartut tassaapput malittareqquneqartut aammalu qanoq ilillugit nalunaarutissamut missingersuummut ilanngunneqarnerat:

1) Naalakkersuisut kissaatigisimavaat appaliassunniarnermut tunngatillugu ”erniornerisa nalaanni eqqissisimatitsineq” Qaanaap Ittoqqortoormiillu kommuniini atuutissanngitsoq. Tamanna ilanngunneqarpoq Qaanaap Ittoqqortoormiillu kommuniini ukioq kaajallallugu appaliarsuit piniagaalersillugit.

2) Naalakkersuisut kissaatigisimavaat Ittoqqortoormiut kommuniat pitsaanerusumik nerlerniarnissamut periafissinneqassasoq. Taanna ilannguanneqarpoq nerlerit siggukitsut nerlernallu ingerlaat 31. maj ilanngullugu pisaasinnaanngorlugit.

3) Naalakkersuisut kissaatigisimavaat aaqqissuussineqassasoq timmissat inaasa eqqaanni illersuutitut killilersuinerit umiartorlunilu aqqutit kornuseruuklkunnaarsillugit. Tamanna ilanngunneqarpoq illersuutitut killilersuinermi peqqussutit qanoq ikkaluarpataluunniit umiatsiat aqqutaanni nalunaaqutsersuutit atorlugit umiartortoqartuarsinnaanngorlugu

4) Naalakkersuisut kissaatigisimavaat amerlasuut aqerlut inerteqqutaalernissaat kinguartinneqassasoq amerlasuut aqerlut aatsaat 1. januar 2005 inerteqqutaalersillugit.

5) Naalakkersuisut kissaatigisimavaat upernaanera tamaat ”pisariaqartitsineq naapertorlugu timmiarsinnaaneq” ammaanneqassasoq. Tamanna atuutissaaq miternut, miternut siorakitsunut, allernut, appanut, serfanut taateraanullu. Upernaakkut timmissat åpiaqqiungajalerlutik piniagaanermit sunnernerlukkuminarseruttorfiani ammaassinissaq pissutigalugu sukatsinernik allanik pilersitsinissaq pisariaqartinneqarpoq timmiarniarneq imminut nammassinnaajunnaarsitsissanngippat. Taamaattumik peqqussutit makku timmissat pillugit nalunaarutissamut missingersuummut ilanngunneqarput:

Ukiakkut ukiumilu aallaaniarneq:
1. septemberimiit 15. martsimut inuussutissarsiutigalugu piniarnermut allagartallit amerlanerpaamik ullormut timmissat assigiinngitsut katillugit 30-t, appaanerat, serfaanerat, mitiunerat , siorakiunerat, alliuneraat taateraajuneralluunniit apeqqutaatinnagu. Timmissat taakku tuniniarneqarsinnaassapput. Sunngiffimmi aallaaniarnermut allagartallit amerlanerpaamik ullormut timmissat taagorneqartut amerlanerpaamik katillugit qulit piffissami tassani pisarisinnaassavaat.

Upernaakkut aallaaniarneq:
Martsip 16-aniit 31. maj ilanngullugu inuussutissarsiutigalugu piniartutut allagartallit sunngiffimmilu aallaniarnermut allagartallit amerlanerpaamik timmissat, appat, serfat, mitit, siorakit, allerit taateraallu, katillugit tallimat sapaatip akunneranut pisarisinnaassavaat. Timmissat pisaasut taamaallat nammineq atugassaapput.

6) Naalakkersuisut kissaatigisimavaat Qaanaaq, Tasiilaq Ittoqqortoormiillu immikkut isigineqassasut. Tamanna pillugu imaalivoq:

Qaanaaq:
- Appaliarsuit piaraallu aasaq tamaat pisarineqarsinnaallutillu katersorneqarsinnaapput.
- Appaliarsuit mannissaarnissaannut akuersissuteqassaaq.
- Nammineq atugassanik appanniartoqarsinnaavoq 15. junip tungaanut ukiakkullu piniarneqarsinnaalissapput 1. septemberimiit.

Tasiilaq:
- Tasiilaq aaqqiivigineqarpoq Kalaallit Nunaata sinneratut periarfissillugu massakkut nalunaarummi atuuttumisut Tasiilaq Avannaanisut periarfissinnagu.

Illoqqortoormiut:
- Appaliarsunniarneq piaqqanillu katersineq aasaq tamaat.
- Appaliarsuit mannissaarnissaannut akuersissuteqassaaq.
- Nerlerit siggukitsut nerlernallu ingerlaat 31. maj tikillugu piniarneqarsinaassapput.

Missingersuut Piniarneq pillugu Siunnersuisoqatigiinnut 18. oktober 2002 ataatsimiinnissaannut tusarniaatigalugu nassiunneqarpoq.

Suliap inerlaqqinnissaanut pisariaqarmat nassinneqartut qinnuigineqarput missingersuummut oqaaseqaateqaqqullugit taakkualu kingusinnerpaamik 20. november 2002 Pisortaqarfimmeereersinnaanngorlugit nassiuteqqullugit. Kommunit pisortatut tusarniaanermut akissutaasa KANUKOKA-kkortinneqarnissat kissaatigineqarpoq