Ilanngullugu nassiunneqarpoq uumasunik illersuineq pillugu Inatsisartut inatsisissaattut missingiut 6. maj 2002-meersoq tassungalu nassuiaatit.
Uumasunik illersuinermi oqartussaaneq Qimmit uumasunillu illersuineq pillugit Kalaallit Nunaannut inatsisikkut Namminersornerullutik Oqartussanit tiguneqarpoq. Inatsit taanna 16. december 1998 Margrethe R.-mit 1. januar 1999 atuutilersussatut atsiorneqarpoq.
Ullormi tassanittaaq Qimmit qimuttut kiisalu qimmeqarneq qitsuuteqarnerlu pillugit Inatsisartut inatsisaat nr. 18, 30. oktober 1998-imeersoq atortuulerpoq. Tassani qimmit qitsuillu, kisianni uumasut allat pinnagit, illersuinissamut aalajangersagaqarpoq. Uumasunik illersuineq pillugu inatsisartut inatsisissaattut missingiummi maanna saqqummiunneqartumi uumasut kalaallit nunaata nunataani imartaanilu uumasuutigineqartut tamarmik pineqarput. Kalaallit Nunaanni pinerluttulerinermik inatsisip § 65-iani uumasunik naalliutsitsinerit pillugit aalajangersagaqarpoq, inatsit nutaaq sinaakkusiussatut inatsisitut isigisariaqarpoq uumasut illersorneqarnissaannut maleruagassanik, kattuffiit susassaqartut isummerfigeqqusissuteqarfigineqareernerisigut, Naalakkersuisut aalajangersaanissaannut periarfissiissutaasoq.
Inatsisip suliareqqinneqarnissaa pillugu nassiussivigineqartut piumaffigineqarput inatsisissatut missingiummut tassungalu atasunut nassuiaatinut oqaatigiumasaminnik saqqummiusseqqullugit, taakku kingusinnerpaamik 1. oktober 2002 pisortaqarfimmi tiguneqareersimassapput. Kommunit isummerfigeqqusissummut pisortatigoortumik akissutaat KANUKOKA aqqutigalugu nassiuteqquneqarput.
Inussiarnersumik inuulluaqqusillunga
Carl Anton Henriksen
Nersutit nakorsaasa qullersaat
