Danmarkimi angallannermut ministereqarfik nunatsinni Rigsombudsmandi aqqutigalugu oqaaseqaqqusisimavoq nalunaarutissamut missiliuut qulaani taaneqartoq pillugu. Oqaaseqarnissamut killigitinneqarpoq 10. septembari 2003, taamaattumillu oqaaseqaataasinnaasut Kattuffiup tigoreersimasariaqarpai kingusinnerpaamik 8. septembari 2003.

Nalunaarutissap imarai nalunaaqutsersuutit atorneqarfissaat aqutsinissarlu pillugit aalajangersakkat erseqqinnerusut, aamma nalunaaqutsersuutit qanoq suliaanissaat ikkussornissaallu pillugit.

Nalunaarutissaq nalunaarummut nr. 852-imut 30. septembari 1994-imeersumut tunngassuteqarpoq, tassani Kalaallit Nunaanni aqqusinernik nalunaaqutsersuineq malittarisassiorneqarsimammat nalunaaqutsersuutit isumaat pillugit erseqqinnerusunik maleruagassiisunik.

Nalunaarutit taakkua marluk aaqqissuussaanerat Danmarkimi atuuttunut naapertuuppoq.

Aqqusineqarnermut pisortaqarfik nalunaarpoq nalunaarutissami malittarisassiat periaatsinut Kalaallit Nunaanni atuutereersunut naapertuuttuusut, taamaattumillu oqaatigineqartut naapertussagaanni nalunaarutissaq kommuninut aningaasartuuteqarnerulersitsisussaanngitsoq aqqusinernik nalunaaqutsersuisarnermi.