Atuarfiit siulersuisuini angajoqqaat sinniisissaannik qinersisarnermut nalunaarutissaq

30. oktobari 2003 

Kulturimut, Ilinniartitaanermut, Ilisimatusarnermut aamma Ilageeqarnermut
Pisortaqarfik
Postboks 1029
3900 Nuuk

Pisaq: Meeqqat atuarfiini siulersuisuni angajoqqaat sinniisissaannik qinersisarnermut nalunaarutissatut siunnersuut .

Pisortaqarfiup allakkatigut 002154-kkut ulloq 7.10. 2003 tusarniaassutigaa Meeqqat atuarfiini atuarfinni siulersuisuni angajoqqaat sinniisissaannik qinersisarnermut nalunaarutissatut siunnersuut qinnutigalugu akisoqareersimassasoq kingusinnerpaamik 2003-mi oktobarip ulluisa 31-ani.

Siunnersuut kommunini tusarniaaffigineqareersimalerpoq qisuariarpullu kommunit arfineq-marluk. Tusarniaanermi akissutigineqartut paasissutissiissutitut ilanngunneqarput.

Tusarniaanermi akissutit ilaat KANUKOKA-p allagaanut tusarniaanermi paasissutissanut ilanngullugu nassiunneqartumut innersuussipput. Tusarniaanermi akissutit tamakkiisooqqullugit immikkut allakkiaasimasup assilisartaa aamma ilanngunneqarpoq.

Tusarniaanermi akissutigineqartut tunngavigalugit aammalu KANUKOKA-p nammineq misilittagai tunngavigalugit nalunaarutissatut siunnersuummut oqaaseqaatit makku ilanngunneqarput:

Pinissaa piareersarfissarlu qinersinissamut:
Atuarfinnut amerlavallaanut qinersisinnaasut allattorsimaffiinik aggustip ulluisa aallaqqaataani saqqummiussinissaq ajornartorsiutaassaaq. Siullermik atuarfiit allaffippassui tamatuma nalerpiaani aasami sulinngiffeqarfiummat matoqqasarput aappassaanillu atuarfiup ukiup nutaap aallartinnerini atuaqatigiiaat allanngorsimagajuttarput taamaasillutillu aamma paasissutissat angajoqqaanut tunngasut, qinersisinnaasut kikkuunerisa allattorneqarneranni tunngaviusartut.

Taamaattumik siunnersuutigineqassaaq, qinersisinnaasut allattorsimaffiinik saqqummiussisussaatitaaneq septembarip aallaqqaataanut kinguartinneqassasoq malittaanillu pilersaarusiornermut, qinersinermut atuarfiullu siulersuisuini ilaasortassatut qinigaasut inissitsiternissaannut ulluliunneqartoq qaammammik ataatsimik kinguartinneqassasoq. Qinersinermullu tunngasunik kommunalbestyrelsip juulip ulluisa 31-ani aalajangersaareersimanissaa aalajangiusimaneqarusuppoq, aalajangernerit taakku qinersinissap piareersarnissaanut ingerlannissaanullu tunngaviusarmata (§ 1, imm. 2-4, § 4, imm. 1 aamma § 5, imm. 1).

Qinersisinnaasut qinigassanngortissinnaasullu
Nalunaarusiassatut siunnersuutip § 7-ata imm. 2-ani, maannamut atuuttup § 5-ani imm. 1, pkt. 1-a assigalugu periarfissaareerpoq, angajoqqaarsiat qinnuteqareernerup kingorna akuerineqarsimagunik qinersisinnaanerat. Meeqqat atuarfii pillugit peqqussutip § 29-ata, imm. 2-ani allaqqavoq, atuarnerup aallartinnera sivisussusaalu pillugit apeqqutip saniatigut atuarfiup meeqqamik isumaginnittoq, angajoqqaatut oqartussaaffillit sinnerlugit iliuuseqarsinnaatikkaa. Taamaattumik pissusissamisoortussaavoq naapertuullunilu, angajoqqaarsiat qinersisinnaatitaappata qinerneqarsinnaatitaappataluunniit, angajoqqaarsiammi taakkuummata, atuartup atuarnera pillugu atuarfimmit suleqatigineqartut. Pisariaqartutut isigineqanngilaq, angajoqqaarsiat qinersisinnaanissaminnut qinigassanngortissinnaanissaminnulluunniit qinnuteqaqqaartarnissaat taamatuttaaq qinersineq atortussaatinniarlugu qanoq sivisutigisumik angajoqqaarsiaasimanerup paaseqqaarneqartarnissaa pisariaqartutut isigineqanngilaq.

Nalunaarutissatut siunnersuummi eqqarsaatigineqanngillat, meeqqat ajornartorsiuteqarnerup kinguneranik børnehjemini assigisaanniluunniit inissinneqartariaqarsimatillugit pissutsit atuuttartut. Meeqqanut børnehjeminut inissinneqartariaqarsimasunut angajoqqaatut oqartussaanermik tigummiaqartut qinersisinnaallutillu qinigassanngortissinnaasutut nalunaarutissatut siunnersuummi allaqqapput. Tamanna tulluartutut isiginanngilaq angajoqqaat meeqqaminnut pilersuisuujunnaartarmata. Amerlanertigut aamma angajoqqaat kommunimi allami najugaqarajuttarput, qitornartik ulloq unnuarlu angerlarsimaffimmi angerlarsimaffeqartoq najornagu, atuarneralu malinnaaffigisinnaanagu taamaasillutillu qinersinermi peqataasinnaaneq ajortarput sualummillu atuarfiup siulersuisuini suleqataanissartik inorsarfigisartussaavaat angajoqqaat sinniisaattut siulersuisunut qinigaassagaluarunik. Meeqqat angajoqqaaminniit peerutitat pitillugit angajoqqaat suleqatiginagit, angajoqqaarsianngorallartut atuarfimmit suleqatigineqartarput aamma taamaappoq meeqqat ulloq unnuarlu angerlarsimaffimmiilersimasut pitillugit, tamatumanimi børnehjemi suleqatigineqartarpoq.

Piffissap ingerlanerani pisussat il.il. pillugit Nalunaarut.
Nalunaarutip § 4-ata immi. 2-ani allassimavoq, kommunalbestyrelsi pisussaasoq atuarfinni allanilu qinersineq qaqugu pinissanersoq, sumilu qinersisoqassaneranik allagarsiilluni nalunaaruteqarnissamut. Tamatuma saniatigut qinersisinnaasut allassimaffiani nalunaarsorsimasut allakkatigut nalunaarfigineqassapput.

Allagarsiinerup siunertarimmagu piaarnerpaamik qinersisinnaasut tamarmik anguneqarnissaat, kommunalbestyrelsip allagarsiissutaa illoqarfimmi nunaqarfinnilu allagarsiivinnut naliginnaasunut nivinngarneqartariaqartassaaq atuarfimmi qinersivissamiluunniit taamaallaat nivinngarneqarani.

§ 8, nr. 2:
Tusarniaanermut atatillugu akissutini arlalinni ujartorneqarpoq angajoqqaat atuartuuteqanngitsut qinigassanngortissinnaanerisa najoqqutassiuunneqarnissaat.

§ 9:
Ilanngunneqartariaqarpoq, atuarfiup pisortaa angajoqqaat sinniisaattut aamma qinerneqarsinnaassanngitsoq. Ilassutissaq pisariaqarpoq, atuarfinni annerni atuarfiup pisortaa atuartitsisussaatitaaneq ajorajummat.

Atuutilerfissaa:
§ 38-mi immikkoortoq 3-mik nutaamik ilanngussisoqartariaqarpoq imatut nipilimmik:

Imm. 3: Meeqqat atuarfiini, atuarfinni siulersuisuni angajoqqaat sinniisaannik qinersisarneq pillugu Namminersornerullutik Oqartussat nalunaarutaata nr. 16-ip 20. aggusti 1997-meersup § 1-ata imm. 3-a piuinnassaaq 2005-mi juulip 31-ata tungaanut.

Nalunaarup imartuallaarnera aalajangersakkallu mikisualuit amerlavallaarnerat tusarniaavigineqartunit arlalinnit uparuarneqarpoq. Taamaattumik pisariillisarneqarnissaa eqqarsaatigillaqqunarpoq.

Inussiarnersumik
Karl Nielsen