|
Kanukoka-p tusarniaanermut akissutaa - una tooruk 29. novembari 2003
Kultureqarnermut, Ilinniartitaanermut, Ilisimatusarnermut Ilageeqarnermullu Pisortaqarfiup allakkatigut nr. 1280 24. novembari 2003-meersutigut nassiuppaa Danmark-imi efterskolemiittarnermii tapiissutit pillugit nalunaarutissatut siunnersuutip tusarniaassutigineqarnera. Tusarniaanermut atortussat tiguneqartut kalaallisuunngorlugit danskisuunngorlugillu ilanngunneqarput.
Pisortaqarfimmiit allakkiami nalunaarutigineqarpoq, atualersinnaanermut piumasaqaatit sukateriffigineqassasut ilaatigut siunertaralugu efterskolemiinnermit unitsitsiinnartarnerit amerlassutsimikkut ikilisinneqarnissaat aammalu siunerataralugu efterskolemiittarnernut aningaasanut inatsimmi atugassiissutigineqartartut ikililerneqarnissaat.
Maannamut atuussimasoq atuarfiit inassuteqartarnerat atorunnaassaaq, aammalu efterskolemiinnissamut tapiiffigineqarsinnaanermut piginnaasatut piumasarineqartartut siunissami taamaallaat tassaajumaarput atualernissaq sioqqullugu kingullermeerutaasumik danskisut karakteriliunneqarsimasoq. Ilinniartut oqaluttariarsornermi allattariarsornermilu 6, 7 aamma 8-imik karakterillit siunissami kisimik efterskolemiinnissaminnut tapiiffigineqarnissartik angusinnaavaat.
KANUKOKA-ip paasisinnaavaa, ilinniartut ilinniarnerminni malinnaassagunik danskillu efterskoleanni ulluinnarni inooqataassagunik tunngaviusumik oqaatsitigut annertujaartumik piginnaasaqartariaqartut, KANUKOKA-lli eqqarsarnartoqartippaa ilinniartup allatigut piginnaaneqarfii isiginiarneqarpasinngimmata.
Efterskolemiittarnerit amerlasuunut oqaatsit saniatigut aamma inuttut ineriartornermut sunniuteqartarput. Efterskolemiinneq amerlasuunut sunniuteqarluartarpoq ilinniagaqalernissamut piareersarfittut tassunga ilanngullugu angerlarsimaffigisamiit allamut nuunnissamut illoqarfimmilu ilinniagaqarfigisami ilinniartut inaanni ineqarnissamut ineriffiusarluni. Efterskolemiinneq oqaasiinnaviit pillugit atuarnertut isigissallugu KANUKOKA-ip isumaa malillugu uungaannaq isigineruvoq, ilinniarnerup pissarsiassartai eqqarsaatigalugit. Efterskolemiinnermut sipaarniutaasut kinguneqariaannaapput taamaatitsiinnarnernit, soorlu gymnasiami ilinniarnermiit.
Namminersornerullutik Oqartussaniit tapiissutaasartussat qinnuteqarnerup nalaani qanoq annertussuseqassanersut siunissami ilisimaneqarsinnaajunnaassapput. Tapiissutit annertussusaasa aallaavigisalissavaat aningaasat aningaasanut inatsimmi atugassiissutaasimasut amerlassusaat efterskolemilu atuartussatut akuerineqarsimasut qanoq amerlatiginerat. Qinnuteqarnerup nalaani aningaasatigut qanoq atugassaqartitaajumaarnermik ilisimasaqannginneq angajoqqaanut naammaginanngilaq.
Angajoqqaat akiliuteqartarnerannut Namminersornerullutik Oqartussat tapiissutigisagaat
Pissuseq taanna inuttut atukkatigut artorsartitsivoq, tassami ilaqutariit arlallit meeqqamik efterskolemiitinnissaat akissaqartinngimmassuk. Taamatut ineriartortitsineq tulluusimaarutissaanngilluinnarpoq. Ilumoorsinnaanngilaq inuusuttunnguup ilinniagaqarnissaminut periarfissai angajoqqaat aningaasatigut piginnaaneqarnerannik taama annertutigisumik killilersorneqassappata.
Taamaattumik Namminersornerullutik Oqartussat efterskolemiittarnermut tapiissutaasa amerlineqarnissaat pisariaqarpoq - immaqa akinik nalimmassaanikkut. Tapiissutinik ataasiakkaanut annertusaaneq taanna pisariaqartoq atuarnissamut akuerineqarsinnaanermut periarfissanik taama annertutigisumik killiliineq tunngavigalugu ilinniartunik ikilisaanerinnakkut pisariaqanngilaq.
Kommunit qinnuigineqarput kingusinnerpaamik tallimanngorneq 19. decembari 2003 -imi nalunaarutissatut pillugu tusarniaaneq akissuteqarfigeqqullugu, taamaalilluni KANUKOKA ataasinngornermi 22. decembari 2003 ataatsimoorussamik tusarniaassummut akissummik Namminersornerullutik Oqartussanut tunniussisinnaaqqullugu.
Kommunit qinnuigineqarput tusarniaanermut akissuteqarnerminni oqaaseqaateqarfigeqqullugu, siuliini allaaserineqartut malillugit KANUKOKA-p isummersorneranut isumaqataanerlutik. Taassuma saniatigut soorunami nalunaarummut siunnersuut pillugu kommunit oqaaseqaataat allat ilanngullugit.
Tusarniaaffigineqartut: |
