Kanukokap tusarniaanermut akissutaa - una tooruk
Kalaallit Nunaanni eqqagassalerinermut iliuusissatut pilersaarummut siunnersuutip tusarniaatigineqarnera.
Matumuuna Avatangiisinut Pinngortitamullu Pisortaqarfiup Kalaallit Nunaanni eqqagassalerinermut iliuusissatut pilersaarummut siunnersuutit tusarniaatigaa.
Pisortaqarfik upernaakkut 2002-p ingerlanerani Kalaallit Nunaanni eqqagassalerinermut iliuusissatut pilersaarummut siunnersuummik nutaamik suliaqarpoq. Siornatigut siunnersuummut missingiut kommuneingeniørit aprilimi 2002-mi ataatsimiinneranni oqaluuserineqarpoq. Naapisimaaqatigiinnerup nalaani isumassarsiat oqaaseqaatillu tusarniaanermi siunnersuummut matumunnga ilanngunneqarput.
Pisortaqarfiup Kalaallit Nunaanni eqqagassalerinermut iliuusissatut pilersaarummut siunnersuutissaq nutaaq manna toqqarpaa, pisortaqarfiummi kommunillu arlallit eqqagassalerinermut iliuusissatut pilersaarutip 1996-imeersup nalilerneqarnissaa iluarsaanneqarnissaalu pisariaqartutut nalilermassuk. Siunnersuut taanna iliuusissatut pilersaarummut atuuttumut Inatsisartunit 1996-imi ilalerneqartumut nangitsineruvoq. Ilaatigut paasinarsivoq, 1996-imi aningaasaliinissamut pisariaqartitsinermut nalilikkani pilersaarutip ingerlanneqarnissaa pisinnaanngitsoq. Taamatuttaaq pilersaarummi 1996-imeersumi ingerlatsinissamut kommuninut ataasiakkaanut, KANUKOKA-mut Namminersornerullutik Oqartussanullu aningaasatigut aqutsinikkullu sunniutissat erseqqissaavigineqarnissaat amigaatigineqarpoq. Tamatuma kinguneraa, nukissanik pisariaqartunik immikkoortitsisoqannginnera, iliuuseriniakkallu aqutsinikkut pimoorussinissamik pisariaqartitsisut ingerlanneqarsimannginnerat.
Siunnersuut aallaqqaasiutitut eqqagassalerinermut iliuusissatut pilersaarutip 1996-imeersup naatsumik nalilerneqarneranik imaqarpoq. Kingorna eqqagassalerinermut iliuusissatut siunnersuut nutaaq pineqarpoq - siullermik pilersaarutip pingaarnerusumik anguniagai anguniakkat ilaannik qulinik malitseqartoq. Anguniakkat ilaannik immikkuualuttuni allaaserineqarpoq, suliassat suut anguniakkat ingerlanneqarnissaanni kommuninut ataasiakkaanut, KANUKOKA-mut Namminersornerullutik Oqartussanullu kinguneqarumaarnissaat. Kingorna pingaarnerusumik salliutitassanik anguniakkanillu tunngaveqartumik piffissartaliussassanut ingerlatassanullu pilersaarusiortoqarpoq. Siunnersuut Kalaallit Nunaanni eqqagassalerinermut pilersaarutissatut siunnersuutip aningaasaqarnikkut allaffissornikkullu kommuninut ataasiakkaanut, KANUKOKA-mut kiisalu Namminersornerullutik Oqartussanut sunniutissanik allaaserinninnermik naggaserneqarpoq.
Pisortaqarfiup kommunit qinnuigai siunnersuutip misissuataarneranut atatillugu ilaatigut aningaasaqarnikkut aqutsinikkullu kommuninut sunniutissaasa eqqagassalerinermut pilersaarutip anguniagaasa malitsigisassai naliliiffigeqqullugit.
Pisortaqarfiup pilersaarutigaa Kalaallit Nunaanni eqqagassalerinermut iliuusissatut siunnersuutip Inatsisartut 2002-mi ukiakkut ataatsimiinnissaannut saqqummiunneqarnissaa. Taamaammat pisortaqarfiup kissaatigaa, siunnersuummut oqaaseqaatit 5. august 2002 nallertinnagu pisortaqarfimmeereernissaat.
Inussiarnersumik inuulluaqqusillunga
Per Ravn Hermansen
Fuldmægtig
