|
KANUKOKA-p tusarniaanermut akissutaa (siunnersuut ilanngussallu quppernerup matuma ataaniipput): 25. juuni 2003
16. juuni 2003-meersoq allagaqaat nr. 001532 ilinniartut aningaasarsiaqartarnerannut tunngasoq, inatsisartut peqqussutissaattut siunnersuusiaasoq, Pisortaqarfiup tusarniaatitut nassiussimavaa.
Peqqussutissatut siunnersuummut atatillugu ataasiakkaatigut KANUKOKA oqaasissaqarpoq, KANUKOKAlli eqqarsarnartoqartippaa, peqqussutissamut ilanngullugu nassiussami ersermat allannguutissaq 9,5 mio. kr-inik sipaaruteqartussaq ilanngullugu aatsaat allannguisoqassasoq. Sipaarutissatut siunnersuutigisimasat ilaat naleqqutinngilluinnarsoraagut. Ilinniartut aningaasarsiaannut tunngatillugu iluarsartuusseqqinnermut nalunaarusiami siunnersuutigineqarpoq iluarsartuussinikkut ilinniartut ilinniakkaminnik naammassinnikkaangamik nunatsinni sulerusussuseqalertillugit aaqqiisoqartariaqartoq. Peqqussutissatut siunnersuusiami tamakku ilaatinneqarsimanngillat. § 5: Oqaaseqaatini maluginiarneqarpoq Namminersornerullutik Oqartussat assigiiaartumik angissusilimmik ilinniartup ataatsip ilinniarnera tamaat atuuttussamik sulisitsisumut aningaasaliisoqartarniartoq, apeqqutaatinnagu ilinniartoq ataaseq qaqugukkut misiliilluni sulinersoq ilinniarfimmiinnersorluunniit. Soorlu siusinnerusukkut ilisimatitsissutigineqarnikuusoq KANUKOKA isumaqarpoq ilinniagaq sunaanersoq malillugu nalilersuisoqartassasoq qaqugukkut ilinniarfimmiittarneq sungiusarlunilu suliffeqarfinniittarnermut tulluussaqqissaakkamik. Siunnersuummut atuuttussamut naleqqiukkaanni periaaseq taanna naleqquttuullunilu pisariunerunngilaq. Naatsorsueriaaseq siunnersuutigisarput malikkaanni aamma aningaasaliisutinut tulluussaanissaq pisariinnerussaaq, soorlu ilinniartup ilinniarfimmiinnissaa misiliilluniluunniit sulinissaanut tunngasutigut allannguisoqaraluarpat. Ilinniarnersiutit allannguiffigineqarneranni ilinniartut ilinniarfimmiikkaluarunik misiliigaluarunilluunniit assigiimmik aningaasarsiaqartartut tulluarsaaffigineqartussaapput. Taanna allannguiffigineqassaguni isumaqatigiissutigisassat nutaamik isumaqatigiissuteqarfigineqartariaqarput, aningaasartuutaanngitsumillu isumaqatiginnittoqarsinnaanersoq aamma suli qulakkeerneqarnikuunngilaq. Allannguinermi aningaasartuutaassanngippat, taava ilinniartup misiliilluni sulinermini aningaasarsiai siornarnit annikinnerulertariaqassapput. Ilinniarnersiuteqartarnerit allannguiffineqarnerisa kingunerannik siornarnik akissarsiaqartitsinerulersitsissappat, Namminersornerullutik Oqartussat siornarnit annertunerusumik sulisitsisumut tapiissuteqalertariaqassaaq. Isumaqatigiissutaasut nutaat malillugit ilinniartut aningaasarsiaannik allannguisoqartillugu sulisitsisunut aningaasaliissutit malinnaatinneqartartussaapput. Oqaaseqaatini malunnarpoq isumaliutigineqarsimasoq sulisitsisunut aningaasaliissutaasartut qanoq akulikitsigisumik tunniunneqartassanersut, qaqugulu tapiissutit peerneqartassanersut. Sulisitsisut aningaasat atoriaannaatigisartagaat pillugit qaammatikkaartumik aningaasaliiffigineqartariaqassapput. Ilinniarnerup naammassineranut unitsinneranulluunniit atatillugu ilinniartoqarnerup nalaaniinnaq aningaasaliisoqartariaqartoq KANUKOKA isumaqarpoq. Allaffissornermut tulluarsaanikkut qaammatikkaaginnartumik aningaasaliisoqartassappat qaammatip 15-ani killeqartitsisoqartariaqarpoq siunnersuutitulli 20-nani. Ilinniarneq naammassineqassappat taamaatinneqarluniluunniit 15-ni siusinnerusumiluunniit, qaammat taanna sulisitsisoq aningaasaliiffigineqartassanngilaq. Qaammatilli 15-ta kingorna ilinniarneq naammassineqaruni qaammat taanna tamakkerlugu sulisitsisoq aningaasaliiffigineqartassaaq. Taamaalillutik sulisitsisut Namminersornerullutillu Oqartussat naligiimmik pineqassapput. § 17: Danmarkimi sivisuumik ilinniarsimasut nunatsinnukartinnissaat anguniarneqarsinnaavoq ilinniarnerup nalaani aningaasat atorniarsimasat ilaannik matussuteqartitsinikkut, matussutissat annertussusaannut aalajangiisuusassaaq ukiuni qassini nunatsinni suliumalluni isumaqatigiissuteqarneq. Soorunalimi aningaasat atorniakkat matussusernissaat aningaasartuutaasassaaq, taamaaliornikkulli nunatsinnik ilisimasallit attavillillu pigiinnarnissaat aggersinnissaallu qulakkeerneqarsinnaavoq. Ilanngussaq 2-mut atatillugu erserpoq FSA/FSUA soraarummeerutiginiarlugit sammisat ataasiakkaarlugit ilinniarsinnaasanut atatillugu 6,9 mio. kr sipaarutiginiarneqartut. Taakkua sipaarutiginiarneqarneri KANUKOKAp isumaqatiginngilai, suli arlalissuaqarmat taakkunannga atuarnissaminnik soraarummeeruteqarnissaminnillu pisariaqartitsisunik, allamut ilinniaqqissagunik pigisariaqartikkaat taakkua soraarummeerfigissallugit. Suliniutit ilinniaqqinnissamut inuutissarsiuteqalernissamulluunniit aqqutissiuussisussat ingerlanniarneqartut KAKUKOKAp ilisimaarai, aamma sammisanut ataasiakkaanut ilinniartitsissuteqartarnissamik imaqartussaasut. Taamaakkaluartoq KANUKOKA isumaqarpoq suli pisariaqartitsisoqartoq atuarnikkut qaffassartariaqartunik, ullumikkut ingerlatat aqqutigalugit, taakkualu ilinniarteqqitassanut inuutissarsiutissaqalersussatullu ilinniarteqqitassanut ilaasariaqarneq ajorput. Tamakkualu pisariaqartittarpaat fagit ataasiakkaat atuarnissaat, atuartitsinerit piffissaliunneqartarnerat malillugu tamakkiisumik suliffeqarsinnaaneq ajoramik. Ilinniartut meeqqatik ilaginagit ilinniariarsimasut juullisioriartarnerannik 1,8 mio. kr sipaaruteqarnissaq KANUKOKAp navianartutut nalilerpaa. Ilinniartut meerallit meeqqaminnut juullimi tikeraarsinnaanerannik piiaaffigineratigut taamaatiinnartartut amerlisarneqarsinnaammata, tamannalu iluarsartuussinikkut anguniagaanngilaq. Kommunenut aningaasatigut sunniutissat: Kommunet sulisitsisuugaangata aningaasatigut sunniuteqartassanngilaq makkua qulakkeersimagaanni:
Qulaani piumasaqaatigineqartut marluusut qulakkeerneqarsimanngippata KANUKOKA taarsiiffigineqarnissaminut pisinnaatitaaffeqarpoq. KANUKOKAp innersuussutigissavaa piaarnerpaamik isumaqatiginnissutigisassat oqaloqatigiissutigineqalissasut, isumaqatigiissut nutaaq atuutilerniassammat peqqussutip atuutilernissaa eqqorlugu tassa 1. januaari 2004. Nutaamik isumaqatigiittoqareerpat sulisitsisunut tapiissutaasartussat annertussusissaat naatsorsorneqarsinnaavoq, ilinniartumut akissariatitassat isumaqatigiissutaasimasut naapertorlugit, ilinniakkamilu aalajangersimasumi ilinniarfimmiinnerit sapaatip akunneri qassiunersut naatsorsornerisigut. Taamaammat KANUKOKAp piumasaqaatigaa ilinniakkat pilersaarusiorneqarneri nutaanerpaat isumaqatigiissummut attuumassuteqartut ilinniarnerup misiliillunilu sulinerup suvisussusissaanik nalunaarusiorfiusimasut piumallugit. |
