|
Una toorukku Kanukoka-mit akissut atuarsinnaavat 27. juuni 2003
STI-mi ilinniarneq pillugu nassuiaat aamma ilinniartitaaneq inuussutissarsiuninullu piareersarneq ilitsersuussinerlu pillugit nassuiaat Inatsisartut 1999-imi suliaraat akuersissutigalugillu. STI-mi ilinniarneq pillugu nassuiaammi inassutigineqarpoq inuussutissarsiutinut ilinniartitsinermi iluarsaasseqqinneqassasoq inuussutissarsiutinut ilinniartitaanermi suliani pisinnaasaqarnerup pitsanngorsaavigineqarnissaa siunertaralugu. Pisinnaasaqarnerup taamatut pitsanngorsaavigineqarnera pissalluni ilaatigut tigutinnissamut piumasaqaatit sakkortusitinneqarnerisigut aammalu ilaatigut atuartitsinerup pitsaanerusunngortinneqarneratigut. Kingulliullugu taaneqartup ilaatigut kinguneqassalluni atuartitsinerup, STI-mik aaqqissuussinermi ingerlanneqartup, brancheni atuarfinni imaluunniit nunap immikkoortortaani atuarfinni amerlanngitsuni, annertunerusumik ingerlanneqalernissaa. STI pillugu nassuiaatip kingornatigut inuussutissarsiutinut ilinniartitsinerup aaqqissuuteqqinneqarnera ingerlanneqarsimavoq, tamannalu sumiiffinni inuussutissarsiutinut atuarfiit arlaqartut maannakkut ikittuinnarnik ingerlataqalernerannik tamatumanilu pisinnaasanik atuinngiffiulernerannik kinguneqarsimalluni. Ilinniartitaaneq inuussutissarsiutinullu piareersarneq pillugit nassuiaammi inassutigineqarpoq ilitsersuussinermik ingerlatsinerup annertuumik annertusaavigineqarnissaa. Pitsaanerusumik ilitsersuussisalerneq ilinniartut ilinniakkaminnik taamaatitsiinnartarnerata annikillisaavigineqarnissaanut aqqutissiuussisooqataassaaq, tassami ilinniartut amerlasuut ilinniagassaminnik toqqaanerminni naleqquttumik pitsaasumillu ilitsersuunneqarneq amigaatigisarsimammassuk. Nassuiaammi inassutigineqarpoq sumiiffinni ilinniartitsinermik ilitsersuussinermillu ingerlatsivinnik pilersitsisoqarnissaa. Nassuiaammi inassutigineqarpoq ilinniartitaaneq ilitsersuussinerlu sumiiffinni inuussutissarsiutinut ilinniarfinnut kommunimi katerillugit ingerlanneqarnissaat imaluunniit tamatumunnga tunngasunik taakkunani ataqatigiissaarineqalissasoq. Nassuiaammi aamma inassutigineqarpoq ilitsersuussinermut atatillugu ilinniagaqarnissamut inuussutissarsiutinullu ilinniarnermut aallarnisaanermik, sulisinnaasunut atuarnermik, ilinniarnermik sulinermilluunniit ingerlataqanngitsunut tamanut, neqeroorteqarnermik pilersitsineqassasoq. Ilinniarnermik inuussutissarsiutinullu ilinniarnissamut piareersarnermik ingerlatsinissamut neqeroorutit inuit ataasiakkaat qanoq iliuuseqarnissamut piareersaasiornermikkut ilinniagaqarnissaminnut sulinermilluunniit aallartinniarnerminnut toqqaasinnaanissamut piukkunnarsarnissaannut periarfississavaat. Ilinniagaqarnissamut inuussutissarsiutinullu aallarnisaanermut neqeroorutitigut eqqarsaatigineqarsimavoq siusinnerusukkut assingusutigut iliuusaasarsimasut soorlu inuusuttunut sullissiviit, sammisassaqartitsinermi allatigut neqeroorutit, faginik ataasiakkaanik atuartitsinerit kommuninilu ilinniagaqarnissamut inuussutissarsiuteqarnissamullu siunnersuisarneq, ataatsimoortunngorlugit katersornissaat. Matuma qulaani nassuiaatini inassutigineqarpoq sumiiffinni inuussutissarsiutinut atuarfiit, 1988-imiilli Namminersornerullutik Oqartussanit kommuninillu ataatsimoorlutik, aningaasartuutinik suliassanillu agguaassinissamut isumaqatigiissutit tunngavigalugit, ingerlanneqarsimasut kommuninit tamakkiisumik ingerelanneqalissasut. Namminersornerullutik Oqartussat inussutissarsiutinut ilinniartitaanermut immikkoortortaanut (KIIIP) aammalu suliffissaqartitsiniarnermut immikkoortortamut (INUUPI) sinniisuusut kommunini amerlanerni angalaarsimapput, sumiiffinni inuussutissarsiutinut atuarfiit kommuninit ingerlanneqalernissaat pillugu eqqarsaatit ilisimatitsissutiginiarlugit. Namminersornerullutik Oqartussat aamma inuussutissarsiutinut ilinniarnerit ilaannut tunngatillugu nunap immikkoortortaani atuarfeqarnerup ingerlanneqarnissaa pillugu kommunit ilaannut isumaqatigiissuteqarsimapput. ./. Ilanngullugu nassiunneqartumi ”Kommunini piareersarfiit” takussutissartaqartumi, KIIIP-ip INUUPI-llu KANUKOKA suleqatigalugu taamatut ingerlatsiveqalernissami suliassat, sinaakkutit piginnaasaqarnerillu allaaserineqarsimapput. Tamakkua matumuuna kommuninut tusarniaanermut atatillugu nassiunneqarput, kingornatigullu akissutaasut tunngavigalugit sumiiffinni inuussutissarsiutinut atuarfiit kommuninit tamakkiisumik ingerlanneqalernissaanni piumasaqaataasut pillugit KANUKOKA Namminersornerullutik Oqartussanik isumaqatiginninniarnermik ingerlatitseqqissalluni. Siunertarineqarpoq isumaqatigiinniarnermi tamatumani assigiissumik isumaqatigiissutip ilusissaanik, Namminersornerullutik Oqartussat kommunillu ataasiakkaat akornanni isumaqatigiissuteqarnissani tunngaviusussamik, isumaqatigiissuteqartoqassasoq. Tusarniaanermut akissuteqarnissaq 25. septembari 2003-mut killilerneqarpoq. Siunertarineqarporlu tamatuma kingorna suliaq 1. novembari 2003 nallertinnagu naammassineqareersimassasoq, tamannalu pereerpat kommunit ataasiakkaat Namminersornerullutik Oqartussanut isumaqatigiissuteqarsinnaalissallutik, kommunit ataasiakkaat namminneq qanoq annertutigisumik isumaqatigiissuteqarusunnertik najoqqutaralugu. Kommunit qinnuigineqarput tusarniaanermut akissuteqarnerminni minnerpaamik makkua nassuiaateqarfigeqqullugit:
Nassiussanut allatigut oqaaseqaatit aamma tusarumaneqarput. Nassiunneqartut pillugit apeqqutaasinnaasut Ejvind Christoffersen-imut imaluunniit Muke Overgaard-imut KIIIP-imi, Siiva Fleischer-imut INUUPI-mi imaluunniit Karl Nielsenimut, KANUKOKA, saaffiginnissutigineqarsinnaapput. Kommunit ilaanni ilinniarnermut inuussutissarsiutinillu aallarnisaavinnik ingerlatsivinnik misiligutaasumik ingerlatsinissamik suliniutigineqarneq aallartinneqareerpoq, kommunillu allat aallartitserusullutik. Misiligutaasumik ingerlatsinerit ingerlatseqqinneqarnissaat misileraanernilluunniit allanik KIIIP aamma INUUPI suleqatigalugit aallartitsisoqarnissaa KANUKOKA-p ajornaqutissaqarsorinngilaa. KANUKOKA-lli kommunit siunnersorusuppai sivisoorsuunngitsumik milileraanissamik isumaqatigiissuteqartaqqullugit, misileraanermillu ingerlatsinerup nalaani sulisunik tigusinissamik isumaqatigiissuteqartoqassanngitsoq. |
