|
16. oktobari 2003
Allakkatigut ullulerneqarsimasutigut 27. juuni 2003, KANUKOKA-p nassiuppai tusarniaanermut atatillugu paasissutissat sumiiffinni inuutissarsiutitaarnissamut ilinniarfiit kommuninut oqartussaaffigilersinnissaannut tunngasut.
Tamatuma kinguneranik kommunit inuutissarsiutitaarnissamut atuarfillit tamarmik qisuariaatiminnik nassiussipput. Akissutini erserpoq isumaqatigiissutigineqartoq inuutissarsiutitaarnissamut ilinniarfiit kommuninit oqartussaaffigineqalernissaat isumaqatigiissutaasoq, akissutilli amerlanersaanni aamma erseqqissarneqarpoq, tusarniaanermut atatillugu paasissutissatut nerliutigineqartut kommunini ataasiakkaani periarfissanik kingunerusussanillu nalilersuiniarnermi atussallugit amingarpallaartut taamaattumillu kommunit isummernissaannut tunngavigissallugit amingartut. Sualummik kommunit atuarfiit assigiinngitsut arlariit sinnerlugit nunap immikkoortortaaneersunik eqiteruffiullutik ilinniartitsinermik aallussiviusut nalornisigaat, ilinniarfinni- ilitsersuisarfinnilu pilersinneqartusatut takorloorneqartuni aallutatik ilumut kaputartuunneqarsinnaassanersut.
Aallaqqaammut eqqarsaataasimagaluapoq, tusarniaanermi qisuaariaatigineqartut, inuutissarsiutitaarnissamut atuarfinnik kommunit ataasiakkaat Namminersornerullutik Oqartussaniit tigusisinnaanissaat pillugu isumaqatigiinniartoqalerpat tunngavissatut atorneqarumaartut. Tusarniaanermili akissutigineqartut assigiinngisitaaqisut takutippaat tamanna pisinnaanngitsoq – kommunini pissutsit takorluuinerillu assigiinngisitaarpallaarmata.
Taamaattumik KANUKOKA-p KIIIP aamma INUPI isumaqatigiissuteqarfigai, pisortaqarfiit taakku marluk kommunini ataasiakkaani ilinniarfinnik ilitsersuisarfinnillu pilersitsinissaq pillugu kommuninut ataasiakkaanut attaveqassasut periarfissat piviusorsiortut oqaloqatigiissutiginissaat siunertaralugu. Oqaloqatigiinnerni pisussani taakkunani ilinniarfiit sungiusarfiillu ilusissaat piviusorsiortut isumaqatigiissutigineqassapput kiisalu oqaloqatigiissutigineqassapput periusissanut, illutassanut, aningaasanut sulisussanut allanullu tunngassuteqartut, isumaqatigiissuteqartoqarsinnaappallu tamakku isumaqatigiissusiarineqarumaartussamut kaputartuullugit.
Tamaattumik avaqqunneqarsinnaanngilaq KIIIP-ip INUPI-llu kommuninut ataasiakkaanut orniguttarnissaat kommunini ataasiakkaani periarfissat piviusorsiortut oqaloqatigiissutigiartorlugit, tamannalu tunngavigalugu taamaattumik qularineqarpoq 2004-mi januaarip ulluisa aallaqqaataaniit atuutilersussanik isumaqatigiissusiortoqarsinnaassasoq, periusissaqqinnerusorineqarporlu isumaqatigiittoqaraangat, kommunit ataasiakkaat Namminersornerullutik Oqartussallu isumaqatigiissusioqatigiittarpata.
KIIIP-ip INUPI-llu 2003-mi oktobarip 15-ani 16-anilu sumiiffinni assigiinngitsuni inuutissarsiutitaarniartunut ilinniarfinni ittuusut ataatsimeeqatigilerunikkit ilisimatitsissutigissavaat maannamut ingerlanneqartut suliat siunissamilu pilersinneqarumaartussani ilinniarfinni sungiusarfinnilu suliarineqartalerumaartussat.
KIIIP-ip INUPI-llu peqatigiillutik kommunit ataasiakkaat attavigisarumaarpaat pissussallu tulliinik isumaqatigiissuteqarfigalugit.
KANUKOKA-p siunnersuutigerusuppaa, kommunit KIIIP INUPI-lu oqaloqatigalugillu isumaqatiginialerunikkit ataani allanneqartut qulakkeerniassagaat isumaqatigiissusiarineqarumaartussanilu pissutsit paasissutissallu pingaarutillit sapinngisamik tamaasa ilaatillugit.
Inuussutissarsiutitaarniartut tunngaviusumik ilinniarfiinut attuumassuteqartut naliginnaasut:
Kommunip inuutissarsiutitaarnissamut tunngaviusumik ilinniarfinniititaasa ukiumoortumik naammassisartagassaattut KIIIP-ip suut suliassat aalajangersimasut suliaritittarusuppai (ilinniartunngortarneq, ilinniakkamut atatillugu sungiusaatigalugu suliffissap akuerineqarnissaa, ilinniarnermut atatillugu ilitsersuisarfissamik suliffissarsiuussisarneq, ilinniartut sungiusaatigalugu sulineranni ilitsersuisoqartarneq, ilinnialikkamut paasissutissiisarneq il.il. eqqarsaatigalugit) ?
Suliassat taakku naammassineqassappata atuartitsiviit suut pisariaqartinneqarpat ?
Suliassat taakku naammassineqassappata sulisussat sorliit pisariaqartinneqarpat ?
Namminersornerullutik Oqartussat sinnerlugit kommunit suliassanik isumaginnittuunertik qanoq akissarsissutigerusuppaat aamma qanoq akiliisoqartassava, akiliullu sunut tunngava ? Akiliutissaq ukiumoortuussava imaluunniit atuartut qassiuneri apeqqutaasassava ?
Kommunip nammineq qanoq aningaasartuuteqarnissi naatsorsuutigaa ? takuuk, STI-mi ilinniartitsinermi kommunip nammineq nammattagai (eqqarsaatigalugit atuartitsiviit, allaffissornermi atortut allaffimmiullu, atuartitsiviit aserfallattaalinerat – ilanngullugit pedel-imut eqqiaasunullu aningaasartuutit kiisalu kommunip nunaqarfimmiortaasa inissaqartinneqartarnerat).
Kommunit ilaannut inuutissarsiutitaarnissamut tunngaviusumik ilinniartitaanerup iluani eqiteruffittut ataatsimut ilinniarfiuteqartunut tunngasut:
Inuussutissarsiutitaarniartunut tunngaviusumik ilinniarfik imaluunniit ilinniarfiit sinnerlugit ukiuni tulliuttuni suliarineqartartussatut KIIIP-ip suut takorloorpai ? Kommunimi sulisoqarniarneq atuartitsiveqarnissarlu ilaatigut eqqarsaatigalugit ungasinnerusoq eqqarsaatigalugu suliat annertussusissaasa ilusissaasalu pilersaarusiornissaat pingaaruteqarluinnarpoq.
Namminersornerullutik Oqartussat sinnerlugit kommunit suliassanik isumaginnittuunertik qanoq akissarsissutigerusuppaat aamma qanoq akiliisoqartassava, akiliullu sunut tunngava ? Akiliutissaq ukiumoortuussava imaluunniit atuartut qassiuneri apeqqutaasassava ?
Nunap immikkoortuisa arlaanni isumagisaqarnermut qulaani taaneqartunut akiliuteqartarnerup saniatigut Namminersornerullutik Oqartussat allanik sunik akiliuteqartinneqassappat
(eqqarsaatigalugit atuartitsinermi atortut, atuartitsiviit ilusilersornerat, atuartitsinermi atortussat immikkut ittut, nunap immikkoortortaani atuagarsorfiusumi ilinniartitsisut ilinniaqqittarnissaat aammalu ilitsersorneqartarnissaat il.il.)
Ilinniartut nunap immikkoortuini allaneersut, nunap immikkoortuineersut atuarfianni atuartillutik qanoq ineqartinneqassappat ineqartitaanerinnilu suut piumasaqaataassappat ? Ilinniartut ineqartinneqarnissaat kommunip isumaqatigiissuteqarneq tunngavigalugu qilersorneqaatigippagu, pingaarluinnarpoq ungasinnerusoq isigalugu pilersaarusiornissaq, ilinniartullu ineqartinneqarneranni atuartut namminneq Namminersornerullutik Oqartussallu akiliutigisartagassaasa aalajangersaqqissaarnissaat. Eqqaasitsissutigineqassaaq, Namminersornerullutik Oqartussat tunngaviusumik pisussaaffigimmassuk atuartut/ilinniartut Namminersornerullutik Oqartussat ilinniarfiutaanni ilinniartut inissaqartinnissaat.
Pikkorissartarnernut ilinniaqqittarnernullu tunngasut:
Namminersornerullutik Oqartussat atuagarsortarfiutaanni namminermi imaluunniit kommunit inuutissarsiutitaarniarfittut ilinniarfiutaat/sumiiffinni ilinniarfiit peqatigalugit suut pikkorissarnissat ilinniaqqinnissalluunniit ingerlatassasut pilersaarutigineqarpat kiisalu piumasaqaatit suut tunngavigalugit ingerlanniarneqarpat ?
Piareersarfinnut tunngasut :
Atuartussatut toqqakkagut aallaavigalugit akuerisaasumik (taamaalillunilu tapiiffigineqarsinnaasumik) ilinniarfimmik inuutissarsiutitaarniartunullu ilitsersuisarfimmik qanoq iliorluta pilersitsisinnaavugut ? Sulerisassappat, atuartitsiviit qanoq ittut pilersissavagut aammalu sulisussat qanoq ilinniarsimasut pisariaqartinneqarpat ?
Piareersarfittut atortussatut allaaserineqartoq Namminersornerullutik Oqartussaniit tapiissutinik qanoq ittunik pisinnaatitaassava tapiissutillu qanoq tunniunneqartassappat ?
Kommunimi ilinniartunut siunnersuisarfimmut tunngasut:
Sumiiffimmi ilinniarfimmik ilisersuisarfimmillu pilersitsiniarnermik eqqarsarnermut tunngatillugu aamma eqqarsaatigineqartariaqarpoq, ilinniartunngorniarnut suliffissarsiortunullu kommunit siunnersuisussaatitaanerata malinnaatinneqarnissaa.
Sumiiffimmi ilinniarfiup- ilitsersuisarfiullu illutassaata sumiiffissaanut tunngasut:
Sumiiffimmi ilinniarfimmik ilitsersuisarfimmillu pilersitsiniarluni eqqarsaasersornermi aallaaviuvoq naatsorsuutigineqarlunilu, tunngaviusumik inuutissarsiutitaarnissamut ilinniarfinnut peqqussut allanngortinneqarpat (STI aqqutigalugu ilinniarnerit) pilersinneqartussat sumiiffissaqarlutillu sulissussaqarnissaat, taamaattumillu pissusissamisoorsorinarsinnaavoq ilinniarfik- ilitsersuisarfillu pilersinneqartussaq inuutissarsiutitaarniarluni tunngaviusumik ilinniarfiusimasumi toqqavilerneqarpat. Tamannali piumasaqaataanngilluinnarpoq, ilinniarfiit ilitsersuisarfiillu pilersinneqartussat sumiiffimmi pisariaqartinneqartunik, kissaatigineqartunik periarfissarititaasunillu tunngaveqartussaammata. Tamatumunnga atatillugu pingaarnerpaavoq, pilersinniarneqartumut ilinniarfimmut – ilitsersuisarfimmullu attuumassuteqartut sammisassat sumiiffimmi tamarmik torersumik ataqatigiissaarneqarnissaat. Sammisassat sumiiffimmi ataatsimi aallunneqartassanersut imaluunniit assigiinngitsuni ingerlanneqartassanersut matumani pingaarnerpaajunngilaq pingaarnerpaavorli ingerlanneqartartussat ataatsimoortumik ataqatigiissaarneqarsimanersut. Soorunami pinngitsoorneqarsinnaasussaanngilaq sumiiffimmi periarfissarititaasut tunngavigalugit pitsaanerpaamik aaqqissuussisoqarsimanissaa tamatumalu atuisunit – ilinniarfissarsiortuni suliffissarsiortunillu ilisimaneqarnissaa.
Sumiiffinni inuutissarsiutitaarniartunut ilinniarfinni sulisunut, Namminersornerullutik Oqartussanit atorfeqartinneqartunut tunngasut:
Sumiiffimmi ilinniarfinni ilitsersuisarfinnilu aallunneqartussat ilisimaleraanni nalilersorneqarsinnaanngussaaq sulisussat aalajangersimasut nattaqqallisaartumillu sulisussat qassiunissaat.
Tamanna tunngavigalugu kommunip nalilertariaqassavaa, inuussutissarsiutitaarniartunut atuarfinni, inuusuttunik sullissivinni aammalu peqalissappat ilinniarfimmi- ilitsersuisarfimmilu sulisut amerlassusaat piginnaanerilu siunissamik pisariaqartinneqalerumaartussanut tulluunnersut.
Sumiiffimmi inuutissarsiutitaarnianut ilinniarfiit kommuninit oqartussaaffigineqalissappata soorunami Namminersornerullutik Oqartussat piareersimapput sulisuminnik kommunimut nuussinissaminnut. Kommunit ilinniarfiutaanni ilitsersuisarfiinilu piumasaqaatinut naapertuuttunik Namminersornerullutik Oqartussat atorfiliutaat piginnaaneqarpata aamma pissusissamisuuginnartussaavoq sulilersussap, kommunip Namminersornerullutik Oqartussallu, isumaqatigiissutigisarpassuk kommunimi atorfinittoqarnissaa. Kommunilli eqqarsaatigilluaqqissaartariaqarpaa naapertuuttuliornerussanersoq, atorfiit nutaat taama nuussinikkut inuttalerneqartassappata imaluunniit tulluarnerussanersoq allagarseeqqaartoqartarpat. Namminersornerullutik Oqartussani atorfillit kommunimi atorfeqalersinnaapput atorfinittussaq nammineq akuersisinnaappat.
Inuutissarsiutitaarniartunut ilinniarfimmik tigusereernerup kingorna Namminersornerullutik Oqartussani atorfilinnik kommuni kingornusserusunngippat, Namminersornerullutik Oqartussat pisussaapput allamik suliffissarsiuussinissaminnut imaluunniit atorfeqartitanik, atorfeqartitsinermi malittarisassat naapertorlugit soraarsitsinissamut.
Piareersarfinni sulisussat akissarsiassaat pillugit isumaqatigiissutinik allanillu naqitanik isumaqatigiissutinik soqanngimmat pisariaqalersussaavoq atorfiit nutaat eqqarsaatigalugit suliassanik allaaserisaqarnissaq, oqartussaaffiillu agguataarnissaat pillugit pilersaarusiornissaq, Namminersornerullutik Oqartussat isumaqatigiinniartartui naliliisinnaaqqullugit, atorfinngortussat inuutissarsiutitaarniarluni atorfinni atorfinnut allanut kakkersuunneqarsinnaanersut imaluunniit atorfiit qaffasissusissaat pillugit nutaamik isumaqatigiinniartoqartariaqassanersoq.
Namminersornerullutik Oqartussat kommunillu isumaqatigiissutissaata ilusilersornissaanut KANUKOKA-p ikiuunnissaa kommunip kissaatigippagu, sukkulluunniit KANUKOKA kommunimit attavigineqarsinnaavoq.
|
