|
Tusarniaanerup killigaa 14. juuli 2003, taamaattumillu oqaaseqaateqartoqarniaruni tamanna kattuffimmut tusarniunneqartariaqarpoq kingusinnerpaamik 10. juuli 2003.
Sullivimmi avatangiisit pillugit inatsit nr. 295, 4. juuni 1986-imeersoq, atuutilerpoq ulloq 1. juuli 1986.
Inatsisissatut siunnersuummi siunertaavoq Kalaallit Nunaanni sullivimmi avatangiisit pillugit inatsisip iluarsineqarnissaa aammalu Kalaallit Nunaanni Danmarkimilu assigiikannersunik inatsiseqalernissaa. Siunnersuut juunimi 2002-mi tusarniutigineqaqqaarpoq. Inatsisartunut qinersisoqarnera pissutigalugu siunnersuut aalajangiiffigineqanngitsoorpoq.
Aalajangersakkanut maannamut atuuttunut sanilliullugit allannguutit pingaartut makku taaneqarsinnaapput:
1) Aallaaniarneq piniarnerlu inatsimmi ilaalissapput. Piniartut namminersortut aamma tamatumani pineqarput. Taamaattorli sullivimmi avatangiisit pillugit inatsit pingaarnerusutigut nunami suliffeqarnermuinnaq tunngavoq. Umiarsuarnit, umiatsiaanit il. il. aallaaniarneq piniarnerlu inatsimmut ilaanngilaq. Aallaaniarneq piniarnerlu sunngiffimmi ingerlataq inatsimmut ilaanngilaq.
2) Suliffigisamik qanoq-issusersiuineq. Sulliviit isumannaallisaanermi aaqqissuussinernik pilersitsisussaatitaasut kisimik, tassa qulit sinnerlugit sulisoqartut, allaganngorlugu suliffimmik qanoq-issusersiuisussaatitaassapput.
3) Neqerooruteqartut akisussaatitaasalernissaat. Sullissinissamik neqerooruteqartut sullivimmi avatangiisinut akisussaaqataatinneqalissapput.
4) Sanatitsisutut akisussaaneq. Sanatitsisup aaqqissuusseqatigiinnermut pisussaaffini allamut tunniussinnaanngilaa taamalu nammineq akisussaajunnaarsinnaanani.
5) Piffissanik qasuersaarfinnik aammalu ulloq unnuarlu sulinngiffeqarnermik iluarsaaqqinneq. Piffissa angalaffiusoq piffissatut suliffittut isigineqalissaaq.
6) Inuusuttut 18-it inorlugit ukiullit. Inuusuttut 15-it inorlugit ukiullit imaluunniit atuartussaatitaasut pingaarnerusutigut sulisorineqaqqusaanngillat. Qassinik ukioqarnissamik piumasap saneqqunneqarsinnaaneranut piginnaatitsissut aallaaniarnermut piniarnermullu tunngatillugu ilanngunneqarpoq. Sulisitsisoq angajoqqaanut ilisimatitsisussaatitaavoq. Taamatut allanngortitsinermi siunertaavoq sulisorineqarsinnaanermi ukiukinnerpaaffissamik ILO-mi isumaqatigiissutip nr. 138-p Kalaallit Nunaannit atortussanngortinneqarnissaanut inatsisitigut tunngavissaliinissaq. Meeqqat sulisinneqartarnerat akiorniarlugu meeqqallu navianartunik sulisitaasarnerat inerteqqutaalersinniarlugu nunanit tamalaanit kimigiisertoqarpoq.
7) Sullivimmi Avatangiisit pillugit Siunnersuisoqatigiinnut ilaasortat amerlineqassapput 6-iniit 8-nut.
8) Naammagittaalliornissamut periaaseq allanngortinneqassaaq marluusunik ingerlatitseqqittarfigilerlugu. Naammagittaalliornissamut periarfissaq sap. ak. 6-inut sivikillineqarpoq.
Sulisitsisut, aamma kommunit, aningaasartuuteqarnerulissapput pingaartumik sullivinnik qanoq-issusersiuisarnermut, neqerooruteqarnermut, sanatitsisuunermut, qasuersaarfeqarnermut, ulloq unnuarlu sulinngiffeqarnermut inuusuttunullu 18-it inorlugit ukiulinnut tunngasutigut malittarisassat eqqortinniarneranni.
| 
